پرەزيدەنتتىڭ وسى يگى باستاماسى وڭىردە وبلىستىق شاحمات فەدەراتسياسىنان تىس, جەكەلەگەن كاسىپكەرلەر تاراپىنان دا قولداۋ تاۋىپ جاتقانى قۋانتادى. ماسەلەن, تاياۋدا استاتوك استىعىمەن ايگىلى مەڭدىقارا اۋدانىنا قاراستى حاركوۆ اۋىلىندا جىلدام شاحماتتان قازاقستاننىڭ ەڭبەك ەرى سايران بۇقانوۆتىڭ كۋبوگى ءوتتى. سايران بالكەن ۇلىنىڭ ءوزى دەمەۋشىلىك ەتكەن اشىق تۋرنيرگە استانالىق نۇرلان ىبىراەۆ, قوستانايلىق پەتر كوستەنكو سىندى حالىقارالىق دارەجەدەگى كاسىبي شاحمات شەبەرلەرى دە قاتىستى. ەكەۋى دە – فيدە گروسسمەيستەرى. كۋبوكتان ۇمىتكەر 60 ادامنىڭ ۇلكەنى – 85 جاستاعى اسحات زاكىروۆ اقساقال, ەڭ كىشىسى – سەگىز جاستاعى جاس تالاپكەر اڭسار دەمەسىنوۆ.
اياداي اۋىلداعى ۇلكەن شاحمات مەرەكەسىنىڭ اشىلۋ راسىمىنە اۋدان اكىمى, وبلىستىق شاحمات فەدەراتسياسىنىڭ وكىلدەرى ارنايى كەلىپ, اۋىل سپورتىن دامىتۋعا ۇزبەي قولداۋ كورسەتىپ كەلە جاتقان ەڭبەك قاھارمانىنا العىس ايتتى. سايران بالكەن ۇلى ءوز سوزىندە سپورتشىلارعا ساتتىلىك تىلەي كەلىپ, اتالعان سپورتتىق ءىس-شارانىڭ ەل ومىرىندە الاتىن ماڭىزى زور ەكەنىنە توقتالدى.
«پرەزيدەنت سپورتتى دامىتۋ ماسەلەسىن ءجيى ايتىپ, كوپتەگەن تاپسىرما بەرىپ جاتىر. سپورت تومەننەن, وسى ءبىزدىڭ حاركوۆ سياقتى شاعىن اۋىلداردان باستالۋى كەرەك. قازىر ۇلكەن سپورتقا ۇلكەن قارجى جۇمسالىپ جاتىر. ال اۋىل سپورتى, وكىنىشكە قاراي, كوبىنە كوڭىلدەن تاسا قالىپ قويادى. بۇل ءتۋرنيردىڭ باستى ماقساتى – قالتالى ازاماتتاردى, ءىرى كاسىپورىن باسشىلارىن اۋىل سپورتىن دامىتۋعا ۇندەۋ. مەن بۇگىن ءوز اتىمنان شاحمات كۋبوگىن وتكىزسەم, ەرتەڭ باسقا ءبىر كاسىپكەر ءوز اۋىلىندا قازاق كۇرەسىن, ەكىنشىسى بوكستان جارىس ۇيىمداستىرىپ جاتسا, نەلەرى كەتەدى. اۋدان باسشىلارى وسىعان باسا نازار اۋدارۋى كەرەك. بيىل پرەزيدەنت ايتقانداي, 200 مەكتەپكە شاحمات ساباعىن ەنگىزەدى. بارا-بارا بارلىق مەكتەپتە شاحمات ءپانى وقىتىلىپ, جاتتىقتىرۋشىعا ارنايى جۇكتەمە بەرىلەدى. كاسىپكەرلەر وسى شارۋانىڭ ويداعىداي ىسكە اسۋىنا اتسالىسىپ, جاردەمدەسۋى كەرەك», دەدى كانىگى ديقان.
ءتۋرنيردىڭ جۇلدە قورى 2 ملن تەڭگەدەن اسادى. جارىس قورىتىندىسىندا استانالىق گروسسمەيستەر نۇرلان ىبىراەۆ 500 مىڭ تەڭگە سىياقى تاعايىندالعان باس جۇلدەنى ۇتىپ الىپ, كۋبوك يەگەرى اتاندى. 9 مۇمكىندىكتەن 8 ۇپاي جيناعان شاحمات شەبەرى شىڭعىسحان سارجانوۆتىڭ دا ويىن مانەرى ەرەكشە ەكەن. الايدا شىڭعىسحان ءبىر عانا ۇپاي ايىرماشىلىعىمەن ەكىنشى ورىنعا تۇراقتادى. ءۇشىنشى ورىن – قوستانايلىق گروسسمەيستەر پەتر كوستەنكونىڭ ەنشىسىندە. ءتورتىنشى, بەسىنشى ورىن العان پاۆەل دۋبروۆين مەن المات سەرعازينوۆقا دا اقشالاي سىيلىق تابىس ەتىلدى.
ايەلدەر اراسىندا وتكەن شاحمات سايىسىندا ساۋلە ساركيناعا قارسى قاۋقار تانىتار جان تابىلمادى. 12 جاسقا دەيىنگى بالالار اراسىندا يمان نابيەۆ, روديون فيليپپوۆ, ءالازيز سماعۇلوۆ سىندى جاس شاحماتشىلار جۇلدەلى ورىنداردى ءبولىستى. ال 18 جاسقا دەيىنگى جاسوسپىرىمدەر اراسىنان ءجانالى ءىزباسار, ايان ءومىرحانوۆ, باعدات تۇقاتوۆتار وزىپ شىقتى. سونىمەن قاتار, وزىق ويىن ورنەگىمەن ەرەكشەلەنگەن ءۇش تالاپكەر مەڭدىقارا اۋدانىنىڭ ۇزدىك شاحماتشىسى سىيلىعىنا يە بولدى.
«سايران بالكەن ۇلى وزگە كاسىپكەرلەرگە ونەگە بولارلىق جول كورسەتتى. تۋرنير وتە جوعارعى دەڭگەيدە ۇيىمداستىرىلدى. مۇنداي سىيلىعى قوماقتى جارىستار وبلىس ورتالىعىنىڭ وزىندە ءجيى بولا بەرمەيدى. قانشاما ادامدى جارىستى ۇيىمداستىرۋشىنىڭ ءوزى تاماقتاندىرىپ, جاقسى جاعداي جاساپ قويعان. جارىسقا قاتىسقان بالالاردىڭ دا تالابى جاقسى. ەڭ جوعارعى ناتيجە كورسەتكەن ماحاببات ەسىلوۆا ەسىمدى قىز بالا بولاشاعىنان ۇلكەن ءۇمىت كۇتتىرەدى. سونداي-اق قۋانىش بايعازينوۆ, قۋانىش بۇقانوۆ, مەدينا مولداحمەتوۆا ءتارىزدى جاس دارىندار وزىندىك ويىن ورنەگى بار ەكەنىن تانىتتى», دەيدى وبلىستىق شاحمات فەدەراتسياسىنىڭ اتقارۋشى ديرەكتورى پاۆەل رۋسانوۆ.
ايتۋلى تۋرنيردەن قارتتار دا قالىس قالمادى. ارداگەرلەر اراسىندا قۇرمەتتى كۋبوكتى جەڭىپ العان ۆلاديمير ەششەنكوعا 200 مىڭ تەڭگە قارجىلاي سىيلىق تابىس ەتىلدى. زەينەتكەر ۆالەري نيكولاەۆ ەكىنشى ورىندى ەنشىلەسە, ۆالەري پيليپپەنكو ءۇشىنشى ورىندى قاناعات تۇتتى. جۇلدەگەرلەردىڭ ءبارى ەسكەرتكىش مەدالدارمەن, قارجىلاي سىيلىقتارمەن ماراپاتتالدى.
قوستاناي وبلىسى,
مەڭدىقارا اۋدانى,
حاركوۆ اۋىلى
