فوتو: parlam.kz
دەپۋتاتتىڭ ايتۋىنشا كۆادروبەرلەر دەگەنىمىز – ادام بولۋدان باس تارتىپ, يتشە, مىسىقشا دىبىستاپ, كۇندەلىكتى ومىردە جانۋارلارعا ۇقساپ ءتورت اياقتاپ نەمەسە جانۋار كەيپىندەگى بەتپەردەمەن جۇرەتىن ادامدار. ولار سىرتقى كەيپىن وزگەرتىپ قانا قويماي, يتتەر سەكىلدى ادامدارعا شابۋىلداعان, ياعني, تىرناۋ, تىستەۋ فاكتىلەرى كەزدەسكەن. بۇنداي وقيعالار كورشى رەسەي جانە وزبەكستان ەلدەرىندە تىركەلىپ ۇلگەرىپتى. بۇندايدى بالالىق قىلىق دەپ قابىلداعانمەن, بالالاردىڭ پسيحولوگياسى مەن الەۋمەتتىك دامۋىنا كەرى اسەرىن تيگىزىپ, شەكتەن شىعىپ بارادى. بۇل – بالالار مەن جاسوسپىرىمدەرگە ءتونىپ تۇرعان قاتەر.
«باتىس ەلدەرىندە بالالار ساباقتا سويلەۋدەن باس تارتىپ, جانۋارشا دىبىستاۋدى شىعارعان. وسى سۋبمادەنيەت وكىلدەرىنە ارناپ ارنايى كەشتەر ۇيىمداستىرىلاتىن بولعان. سونىمەن قاتار, كۆادروبەر بولۋعا قاجەتتى زاتتاردى ساتۋ جاڭا بيزنەس كوزىنە اينالىپ, ينتەرنەتتە جوعارى باعادا ساتىلىپ جاتىر», دەدى ماجىلىسمەن.
داۋلەت تولەۋتاي ۇلىنىڭ سوزىنشە, ەڭ قورقىنىشتىسى – بالالار اتالعان ويىننان پسيحولوگيالىق زارداپ شەگىپ, ادام بولۋدان قالادى. ادامدىق پروبلەمالاردان قاشىپ, جانۋار بولۋعا اۋەستەنەدى.
ء«بىز الدىن الماساق, ۇرپاقتان ايىرىلۋ الدىندا تۇرمىز. بالا بويىنا ادامدىق قۇندىلىق ۇيالاتۋدىڭ ورنىنا, كەرى كەتۋ پروتسەسى العا شىقتى», دەدى ول.
ءماجىلىس دەپۋتاتىنىڭ ايتىنشا الەم ەلدەرى دابىل قاعىپ, بالالارعا ەرەكشە كوڭىل بولۋگە شاقىرىپ وتىر. بالالاردىڭ وعان قىزىعۋشىلىعى بايقالسا, اتا-انالارعا دەرەۋ ارەكەت ەتۋدى ەسكەرتىپ جاتىر.
«بۇل اتا-انانىڭ عانا ەمەس, بۇكىل قوعامنىڭ جانە مەملەكەتتىڭ نازار اۋدارارلىق ماسەلەسى. بۇگىندە رەسەيدە زاڭ قابىلداۋ تالقىلانسا, وزبەكستاندا اتا-اناعا مىندەتتەرىن دۇرىس ورىنداماعانى ءۇشىن ايىپپۇل سالۋ ماسەلەسى قولعا الىنعان. اتالعان ماسەلەگە الەۋمەتتىك جانە قۇقىقتىق توسقاۋىل جاساپ, الەۋمەتتىك جەلىلەردى قاتاڭ باقىلاۋىمىز قاجەت. مۇنداي الەۋمەتتىك ترەندتەر جىلدام ەتەك الۋىنا بايلانىستى, شۇعىل ارەكەتتەردى تالاپ ەتەدى. بالالارىمىزدىڭ بولاشاعى مەملەكەت پەن قوعامنىڭ ءجىتى باقىلاۋىندا بولۋى كەرەك. ءبىزدىڭ ەلدە دە قۇزىردى ورگاندار اتالعان ماسەلەنى جان-جاقتى زەرتتەپ, الدىن-الۋ شارالارى بويىنشا كەشەندى شارالار قابىلداۋى ءتيىس», دەپ تۇيىندەگەن دەپۋتات ساۋالىنا جاۋاپتى زاڭنامادا بەلگىلەنگەن مەرزىمدە جازباشا ۇسىنۋدى سۇرادى.
