مەكتەپتىڭ اشىلۋ راسىمىنە وبلىس, اۋدان باسشىلارى, سالا ارداگەرلەرى, اۋىل تۇرعىندارى, جاڭا مەكتەپكە قابىلدانعان بالالار, ۇستازدار قاتىستى. سالتاناتتى جيىندا ءبىر جىلدىڭ ىشىندە سالىنىپ, ەل يگىلىگىنە بەرىلىپ وتىرعان جاڭا مەكتەپتىڭ قۇرىلىسىنا 5 ملرد تەڭگە قارجى جۇمسالعانى, مۇندا بالانىڭ ساپالى ءبىلىم الۋىنا قاجەت بارلىق جاعداي قاراستىرىلعانى ايتىلدى.
سالتاناتتى ءىس-شارادا ءسوز العان وبلىس اكىمىنىڭ ورىنباسارى رينات مۇحامەتقالي كوپشىلىكتى قۇتتىقتاي كەلىپ, وڭىردە «جايلى مەكتەپ» ۇلتتىق جوباسى اياسىندا تاعى التى مەكتەپ اشىلاتىنىن ايتتى.
«جالپى, بۇل ۇلتتىق جوبا مەملەكەت باسشىسى قاسىم-جومارت توقاەۆتىڭ تىكەلەي باقىلاۋىندا جانە پرەزيدەنت بيىلعى جولداۋىندا ورتا ءبىلىمنىڭ ساپاسى تابىستى ۇلت بولۋدىڭ ماڭىزدى شارتى ەكەنىن, ءاربىر وقۋشىنىڭ ساپالى ءبىلىم الىپ, جان-جاقتى دامۋى ءۇشىن قولايلى جاعداي جاسالۋعا ءتيىس ەكەنىن ايتقان بولاتىن. 2025 جىلدىڭ سوڭىنا دەيىن وبلىستا سەگىز مىڭ وقۋشىعا ارنالعان 11 زاماناۋي مەكتەپ پايدالانۋعا بەرىلەدى. ونىڭ التاۋى «جايلى مەكتەپ» ۇلتتىق جوباسى شەڭبەرىندە سالىنادى. بۇگىن زارەچنىي اۋىلىنىڭ تۇرعىندارى ءۇشىن 900 ورىندىق مەملەكەتتىك تىلدە وقىتاتىن جاڭا مەكتەپ ەسىگىن ايقارا اشىپ وتىر. قازىردە اتالعان مەكتەپكە 500 استام بالا قابىلداندى. بۇل مەكتەپتە جۇمىس ىستەيتىن مۇعالىمدەردىڭ 60 پايىزدان استامى جوعارى بىلىكتى ماماندار ەكەنىن دە ايتا كەتكەن ءجون», دەدى رينات زاكي ۇلى.
جاڭا مەكتەپ ماتەريالدىق-تەحنيكالىق جابدىقتالۋى جاعىنان ءوڭىردىڭ وزگە مەكتەپتەرىنە ۇلگى بولىپ كەلە جاتقان نازارباەۆ زياتكەرلىك مەكتەبى مەن ء«بىلىم-يننوۆاتسيا» ليتسەي-ينتەرناتىنان كەم تۇسپەيدى. ۇلتتىق جوباعا سايكەس زاماناۋي فورماتتا سالىنعان ءۇش قاباتتى عيمارات باستاۋىش, ورتا جانە جوعارى بۋىنداعى وقۋشىلار جەكە-جەكە وقيتىن دەربەس ءۇش بلوكقا بولىنگەن. ءار بلوكتىڭ ءوز سپورت زالى بار. مەكتەپتە 100-دەن استام وقۋ كابينەتى جۇمىس ىستەيدى. فيزيكا, حيميا, بيولوگيا پاندەرى قابينەتتەرىنىڭ جەكە زەرتحانالارى بار. روبوتتەحنيكا كابينەتتەرى مەن كومپيۋتەرلىك سىنىپتارعا, STEM-زەرتحانالارعا تولىقتاي ەڭ سوڭعى ۇلگىدەگى وقۋ قۇرىلعىلارى ورناتىلعان. وقۋ كابينەتتەرىنىڭ ءبارى ينتەراكتيۆتى تاقتامەن, شەت تىلدەرى كابينەتتەرى لينگافونمەن جابدىقتالعان.
وقۋشىلاردىڭ جان-جاقتى دامۋىنا جول اشاتىن ءتۇرلى شەبەرحانالار, امبەباپ ءماجىلىس زالى, كىتاپحانا, ۇلكەن وقۋ زالى, وقۋشىلار مەن مۇعالىمدەرگە ارنالعان كوۆوركينگ زالدارى, جىلدامدىعى جوعارى ينتەرنەت – وسىنىڭ ءبارى جايلى مەكتەپتە وقۋشىنىڭ ساپالى ءبىلىم الۋىنا قاجەت دۇنيەنىڭ ءبارى بار ەكەنىن اڭعارتىپ تۇر. جاڭا مەكتەپ مۇمكىندىگى شەكتەۋلى بالالاردىڭ ءبىلىم الۋىنا دا جايلى ءارى قاۋىپسىز: پاندۋستار, تۇتقالار, كورۋ قابىلەتى ناشار وقۋشىلارعا باعدار كورسەتەتىن بەلگىلەر, تابلو, كورسەتكىشتەر بار.
ءبىلىم وشاعىندا مۇعالىمدەر مەن تەحنيكالىق قىزمەتكەرلەردى قوسقاندا 100 ادام جۇمىس ىستەيدى.
«بۇرىنىراقتا سالىنعان مەكتەپتەردە مۇنداي مۇمكىندىك بولمادى عوي. ءبىزدىڭ مەكتەپتە, مىسالى, وزگە ءبىلىم وردالارىندا جوق STEM لابوراتورياسى, بيوتەحنولوگيا زەرتحاناسى بار. وقۋشىنى بىلاي قويىپ, مۇعالىمدەردىڭ وزدەرى ساباعىمىز قىزىقتى وتەتىن بولدى دەپ قۋانىپ جاتىر. ويتكەنى بىزدە مۇعالىمگە دە, وقۋشىعا دا كەرەكتىڭ ءبارى بار», دەيدى مەكتەپ ديرەكتورى قارلىعاش الدامبەرگەنوۆا.
«جايلى مەكتەپ» ۇلتتىق جوباسى اياسىندا وڭىردە تاعى بەس مەكتەپ سالىنىپ جاتىر. ونىڭ ەكەۋى – قوستانايدا, قالعانى ارقالىق, رۋدنىي قالالارى مەن اۋليەكول اۋىلدارىندا.
قوستاناي وبلىسى
