قازاقستان پرەزيدەنتى قاسىم-جومارت توقاەۆ شەتەلدىك ينۆەستورلار كەڭەسىنىڭ 36-پلەنارلىق وتىرىسىنا قاتىسۋ ءۇشىن قازاقستانعا كەلگەن ەۋروپالىق قايتا قۇرۋ جانە دامۋ بانكىنىڭ باسشىسى وديل رەنو-باسسو حانىممەن كەزدەستى. كەزدەسۋ بارىسىندا رەنو-باسسو قور كومپانيالارى توبىنىڭ ساتىپ الۋ جۇيەسى الەمدىك ستاندارتتار مەن تاجىريبەلەرگە ساي ەكەنىن اتاپ ءوتتى. سونىمەن قاتار حالىقارالىق قارجى ينستيتۋتتارى قوردىڭ پروتسەدۋرالارىنا سەنىم بىلدىرەتىنىن, بۇل ولاردىڭ اشىقتىعىن كورسەتەتىنىن ايتتى.
استانادا وتكەن شەتەلدىك ينۆەستورلار كەڭەسىنىڭ وتىرىسىندا ءىرى حالىقارالىق كومپانيالار مەن قارجى ينستيتۋتتارىنىڭ باسشىلارى باس قوستى.
«حالىقارالىق قارجى ينستيتۋتتارىنىڭ مويىنداۋى جوبالاردى جۇزەگە اسىرۋدىڭ تيىمدىلىگىن ارتتىرۋعا جاڭا مۇمكىندىكتەر اشادى», دەدى «سامۇرىق-قازىنا» باسشىسى نۇرلان جاقىپوۆ ەققدب جانە ازيا دامۋ بانكى (ادب) باسشىلارىمەن كەزدەسۋدە.
ەۋروپالىق قايتا قۇرۋ جانە دامۋ بانكى قوردىڭ ەنەرگەتيكا, تاۋ-كەن, مۇناي-گاز جانە كولىك سالاسىنداعى جوبالارىنا قاتىسادى. سونداي-اق ەققدب باتىس قازاقستاننىڭ ەلەكتر جەلىسىن ەلدىڭ بىرىڭعاي ەنەرگەتيكالىق جۇيەسىنە قوسۋ جوباسىندا باستى ءرول اتقارادى. ازيا دامۋ بانكى سامۇرىق-ەنەرگو, KEGOC جانە قتج جوبالارى بويىنشا قورمەن بىرلەسە جۇمىس ىستەيدى.
قوردىڭ باسقارما توراعاسى ساتىپ الۋ جۇيەسى ەققدب جانە ادب-مەن جوبالاردى جۇزەگە اسىرۋ بارىسىندا حالىقارالىق وزىق ستاندارتتار مەن تاجىريبەلەرگە ساي دەپ تانىلعانىن اتاپ ءوتتى. قور جىل سايىن ساتىپ الۋ جۇيەسىن جەتىلدىرىپ وتىرادى, ءارى وتاندىق وندىرۋشىلەردى قولداۋدىڭ جاڭا جۇيەسى ازىرلەنگەن. قولداۋ شارالارىنىڭ ىشىندە – ساتىپ الىناتىن تاۋارلار مەن قىزمەتتەردىڭ جەرگىلىكتى ۇلەسىنە قاتىستى كومپانيا باسشىلارى ءۇشىن KPI بەلگىلەۋ, وففتەيك كەلىسىمشارتتار بار. جەرگىلىكتى قۇرامنىڭ ساقتالۋى بويىنشا تاۋارلار مەن قىزمەتتەردىڭ جەتكىزۋشىلەرىنە باقىلاۋ ەنگىزىلدى. جاڭا وندىرىستەردى قۇرۋ باعدارلاماسىنا دا وزگەرىستەر ەنگىزىلگەن, ول جەتكىزۋشىلەرمەن 20 جىلدىق وففتەيك كەلىسىمشارتتار جانە ينۆەستيتسيالار تارتۋ ماقساتىندا كەلىسىمشارتتار جاساۋعا مۇمكىندىك بەرەدى.
سونداي-اق نۇرلان جاقىپوۆ كەڭەس اياسىندا ءىرى كومپانيالاردىڭ توپ-مەنەدجەرلەرىمەن ەكىجاقتى كەزدەسۋلەر وتكىزدى. اتاپ ايتقاندا, ەۋروپالىق قايتا قۇرۋ جانە دامۋ بانكى, ازيا دامۋ بانكى, «TotalEnergies», «Solidcore Resources», ت.ب. اتالعان ۇيىم وكىلدەرىمەن سەرىكتەستىك جايى جانە اعىمداعى بىرلەسكەن جوبالار تالقىلاندى.
مىسالى, «TotalEnergies» كومپانياسىمەن قۋاتى 1 گۆت بولاتىن جەل ەلەكتر ستانساسىن سالۋ جوباسى, «Wabtec»-پەن لوكوموتيۆتەردى جەتكىزۋ جانە ءوندىرىستى قازاقستاندا اشۋ ماسەلەسى, «Solidcore Resources» كومپانياسىمەن تاۋ-كەن سالاسىنداعى جوبالار تالداندى.
* * *
«سامۇرىق-قازىنا» اق – جيىنتىق اكتيۆى 81 ميلليارد اقش دوللارىنان اساتىن الەمدەگى 22-ءشى ءىرى كومپانيا. سوڭعى بەس جىلدا قوردىڭ ارقاسىندا ەل ەكونوميكاسىنا 24 ميلليارد دوللار كولەمىندە شەتەل ينۆەستيتسياسى قۇيىلدى. قوردىڭ ينۆەستيتسيالىق پورتفەلىندە ەنەرگەتيكا, لوگيستيكا جانە كولىك, مۇناي جانە گاز, كوممۋنيكاتسيالار, ت.ب. سالالار بويىنشا قۇنى 100 ميلليارد دوللاردان اساتىن 130-دان استام جوبا بار.
* * *
شەتەلدىك ينۆەستورلار كەڭەسى – قازاقستان پرەزيدەنتىنىڭ جانىنداعى كونسۋلتاتيۆتىك-كەڭەستىك ورگان. كەڭەس «سامۇرىق-قازىنا» قورىنىڭ ۇزاقمەرزىمدى سەرىكتەستەرى «Total», «Eni», «CNPC», «Wabtec», «Solidcore», «Citi», ەققدب, ادب سياقتى 32 مۇشە جانە 7 باقىلاۋشىدان تۇرادى. نەگىزگى مىندەتى – قازاقستاننىڭ ينۆەستيتسيالىق ساياساتىنىڭ باستى باعىتتارىن ايقىنداۋعا, ينۆەستيتسيالىق كليماتتى جاقسارتۋعا جانە ەلدىك ينۆەستيتسيالار تۋرالى نورماتيۆتىك-قۇقىقتىق بازاسىن جەتىلدىرۋگە ارنالعان ۇسىنىستار مەن ۇسىنىمداردى ازىرلەۋ.
تاڭىربەرگەن ارعىن
