فوتو: gov.kz
قالا اكىمدىگىنىڭ رەسمي سايتىنىڭ مالىمدەۋىنشە ءىس-شاراعا قر وڭىرلەرىنەن مەكتەپ پارلامەنتتەرىنىڭ 20-عا جۋىق پرەزيدەنتى مەن ەلوردالىق ءماسليحات دەپۋتاتتارى قاتىستى. اشىلۋ سالتاناتىندا استانا قالاسى ءماسليحاتى توراعاسىنىڭ م.ا. اسقار سماعۇلوۆ قۇتتىقتاۋ ءسوز سويلەدى.
«بۇگىن ءبىز جاستاردى, مەكتەپ وقۋشىلارىن تولعاندىراتىن ماسەلەلەردى تالقىلاۋ ءۇشىن جينالدىق. ارىپتەستەرىم ءماسليحاتتىڭ قىزمەتى تۋرالى ايتىپ, ءوز تاجىريبەلەرىمەن بولىسەدى. سىزدەردىڭ ارقايسىڭىز ءوز مەكتەبىڭىزدە ءتۇرلى ماسەلەلەر مەن قيىندىقتارعا كەزىگىپ, ولاردى شەشۋدىڭ بىرەگەي جولدارىن تاۋىپ, جاڭا يدەيالار ەنگىزىپ, مەكتەپ ءومىرىن قىزىقتى ءارى مازمۇندى ەتۋگە كومەكتەسەتىن ءىس-شارالار مەن جوبالاردى ۇيىمداستىرىپ جاتىرعاندارىڭىزعا سەنىمدىمىن. سىزدەردىڭ كۇش-جىگەرلەرىڭىز قازىردىڭ وزىندە جەمىسىن بەرىپ جاتىر, بىراق بۇل اتقارىلۋعا ءتيىستى جۇمىستاردىڭ باسى عانا ەكەنىن ءتۇسىنۋ ماڭىزدى», دەدى ول.
اسقار سماعۇلوۆ سونداي-اق مۇنداي كەزدەسۋلەر جاستار ءۇشىن پايدالى بولاتىنىن اتاپ ءوتتى.
«وسى ۋاقىتتى ءتيىمدى پايدالانىڭىزدار, جوبالارىڭىزبەن, تاجىريبەلەرىڭىزبەن ءبولىسىڭىز, سۇراقتار قويۋدان قورىقپاڭىز, تولعاندىراتىن تاقىرىپتاردى تالقىلاڭىز. بۇل كەزدەسۋ سىزدەرگە جاڭا دوستار مەن پىكىرلەستەردى تابۋعا, ءسىزدىڭ جالعىز ەمەس ەكەنىڭىزدى تۇسىنۋگە مۇمكىندىك بەرەدى. ال ءبىز ءوز تاراپىمىزدان سىزدەردىڭ يدەيالارىڭىزدىڭ جۇزەگە اسۋىنا قولداۋ كورسەتىپ, تابىسقا جەتۋلەرىڭىز ءۇشىن بار كۇشىمىزدى سالامىز», دەپ تۇيىندەدى ءسوزىن اسقار سماعۇلوۆ.
ءىس-شارانى ۇيىمداستىرۋشىلار اتاپ وتكەندەي, كەزدەسۋدىڭ نەگىزگى ماقساتى – جاستار مەن ءماسليحات وكىلدەرى اراسىنداعى بايلانىستى نىعايتۋ, سونداي-اق بالالار مەن جاسوسپىرىمدەردىڭ الەۋمەتتىك باستامالارعا بەلسەندى قاتىسۋى ءۇشىن جاعداي جاساۋ.
