جاڭا ءوندىرىس مەملەكەت باسشىسىنىڭ «ادىلەتتى قازاقستان: قۇقىقتىق ءتارتىپ, ەكونوميكالىق ورلەۋ, قوعامدىق وپتيميزم» اتتى جولداۋىندا قويىلعان تالاپتارعا تولىقتاي جاۋاپ بەرەدى. پرەزيدەنت وتاندىق شيكىزات پەن قۇرامداس بولىكتەردى پايدالانىپ ونەركاسىپتىك الەۋەتتى تولىق اشاتىن جۇيەلى ءتاسىل قاجەت ەكەنىن اتاپ وتكەن بولاتىن.
اۆتوموبيل ونەركاسىبىنىڭ ءوسۋى قازاقستاننىڭ يندۋستريالىق ساياساتىنىڭ نەگىزگى باعىتتارىنىڭ بىرىنە اينالىپ كەلەدى. زاۋىتتىڭ ىسكە قوسىلۋى ءىرى ونەركاسىپتىك نىسانداردىڭ توڭىرەگىندە وڭدەۋدىڭ جوعارى ساتىلارىن دامىتۋعا جانە ساباقتاس وندىرىستەردى قۇرۋعا باعىتتالعان قادامداردىڭ ءبىرى بولىپ تابىلادى. كومپانيا «استانا موتورس» كومپانياسىنىڭ قۇرامىنا كىرەدى جانە وڭتۇستىك كورەيالىق سەرىكتەسى Motrex Co Ltd تەحنولوگيالارىن پايدالانا وتىرىپ جۇمىس ىستەيدى.
«مۋلتيمەديالىق جۇيەلەر – بۇل تسيفرلىق تەحنولوگيالار مەن ينجينيرينگ سالاسىنداعى ءبىرىنشى دارەجەلى مامانداردىڭ قۇزىرەتتىلىگىن تالاپ ەتەتىن جوعارى دالدىكتەگى ءوندىرىس. ءبىزدىڭ باستى ماقساتىمىز – جوعارى لوكاليزاتسيالانعان ءوندىرىس تسيكلىن قۇرۋ. ال ءبىز وتاندىق شيكىزات پەن كومپونەنتتەردى بارىنشا پايدالانامىز. سوندىقتان «Kazakhstan Mobility Engineering» زاۋىتىنىڭ ەل ءۇشىن ماڭىزى زور», دەدى زاۋىتتىڭ اشىلۋ سالتاناتىندا يندۋستريا جانە قۇرىلىس ءمينيسترى قانات شارلاپاەۆ.
وتاندىق تاۋار وندىرۋشىلەردى قولداۋ اياسىندا ۇكىمەت كەشەندى شارالاردى جۇزەگە اسىرىپ كەلەدى. اۆتوموبيل ونەركاسىبىندە مەملەكەت باسشىسىنىڭ تاپسىرماسىنا سايكەس سالانىڭ تۇراقتى وسۋىنە جانە سىرتقى نارىقتاعى ءونىمنىڭ باسەكەگە قابىلەتتىلىگىن ارتتىرۋعا ىقپال ەتەتىن كلاستەرلىك ءوندىرىستى دامىتۋ بويىنشا جۇمىستار جۇرگىزىلىپ جاتىر.
سونىمەن قاتار, اۋىلشارۋاشىلىق ماشينا جاساۋ سالاسىندا بيىلعى جىلى يمپورتتىق انالوگتاردى سۋبسيديالاۋ الىنىپ تاستالدى, جابدىقتىڭ ليزينگىنىڭ پايىزدىق مولشەرلەمەسىن سۋبسيديالاۋ بويىنشا سارالانعان ءتاسىل – وتاندىق تەحنيكا ءۇشىن تومەنىرەك قاراستىرىلدى. تەمىرجول ماشينا جاساۋ سالاسىندا قولجەتىمدى ليزينگتىك قارجىلاندىرۋ تەتىگى ىسكە قوسىلدى, سونىڭ ارقاسىندا 2024 جىلى ءوندىرىس 1,5 ەسەگە ءوستى.
«Kazakhstan Mobility Engineering» زاۋىتى الماتىنىڭ يندۋستريالدى ايماعىندا ورنالاسقان. كاسىپورىن 100 مىڭ شارشى مەتر اۋماقتا اۆتوكولىك بولشەكتەرىن شىعاراتىن ءىرى تەحنوپاركتىڭ ءبىر بولىگىنە اينالادى. بۇل جوبا ءوندىرىستى لوكاليزاتسيالاۋعا جانە قازاقستاندىق اۆتوموبيل ونەركاسىبىن قولداۋعا باعىتتالعان. سونداي-اق الماتى يندۋستريالدى ايماعى اۋماعىندا اۆتوكرەسلولار, اۆتوكولىكتەرگە ارنالعان رەزەڭكە جانە پلاستماسسا بۇيىمدارىن شىعاراتىن زاۋىتتار مەن لوگيستيكالىق حابتى ىسكە قوسۋ جوسپارلانعان.
تەحنوپاركتىڭ تەحنيكالىق وندىرىستىك قۋاتى جىلىنا شامامەن 100 مىڭ كومپلەكت بولادى. كلاستەر اۋماعىندا 90-نان استام مامان جۇمىس ىستەيدى, ال وندىرىستىك كەشەننىڭ شتاتى 400-گە جۋىق ادامدى قۇرايدى.
