فوتو: مادەنيەت جانە اقپارات مينيسترلىگى ءباسپاسوز قىزمەتى
ءىس-شارادا ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي مينيستر ايدا بالاەۆانىڭ قۇتتىقتاۋ حاتىن تابىس ەتتى.
«روزا قاجىعالىمقىزى – قازاق پروزاسى مەن دراماتۋرگياسىنا وزىندىك قولتاڭباسىن قالدىرىپ, وقىرماننىڭ جۇرەگىنە جول تاپقان قالامگەر. بۇگىنگى ءىس-شارا – روزا قاجىعالىمقىزىنىڭ ادەبيەت, تەاتر, كينو جانە پەداگوگيكاداعى جارقىن جولىن تەرەڭىنەن تانۋعا مۇمكىندىك بەرەدى دەپ سەنەمىن», دەلىنگەن ءمينيستردىڭ قۇتتىقتاۋ حاتىندا.
كونفەرەنتسياعا مەملەكەت جانە قوعام قايراتكەرلەرى, بەلگىلى ادەبيەتتانۋشىلار, كينوتەلەدراماتۋرگتەر, كينوتانۋشىلار مەن تەاترتانۋشىلار, ونەرتانۋشىلار جانە شەتەلدىك عالىمدار, ادەبيەت جانە ونەر قايراتكەرلەرى قاتىستى.
كونفەرەنتسيا اياسىندا روزا مۇقانوۆانىڭ شىعارماشىلىعى نەگىزىندە تۇرىك تىلىندە جازىلعان سابينا سايدتىڭ كىتابى مەن ۇجىمدىق مونوگرافيا جانە فوتوكورمەنىڭ تۇساۋكەسەرى ءوتتى. سونىمەن قاتار ساتىبالدى نارىمبەتوۆتىڭ روزا مۇقانوۆانىڭ اڭگىمەسى نەگىزىندە تۇسىرىلگەن «قىزجىلاعان» ءفيلمى كورسەتىلدى.
ءىس-شارا بارىسىندا كونفەرەنتسيا قاتىسۋشىلارىنا قر ۇلتتىق ءارحيۆىنىڭ ۇيىمداستىرۋىمەن «روزانىڭ ادەبيەت الەمى» اتتى جەكە قورىنان قۇجاتتار كورمەسى ۇسىنىلدى. كورمەدە جازۋشىنىڭ جۋرناليستيكا ماماندىعى بويىنشا ديپلومدارى, كۋالىگى مەن ماراپات قۇجاتتارى جانە «قىزجىلاعان», «ماڭگىلىك بالا بەينە», «مۋزا» سىندى تاعى دا باسقا درامالارىنىڭ قولجازبالارى, تەاترلىق افيشالار, اكەسى قاجىعالىم مۇقانوۆتىڭ قولجازبالارى, وتباسىلىق فوتوسۋرەتتەرى تانىستىرىلدى.
