مەرەكەلىك جيىندا سالا قىزمەتكەرلەرىن وبلىس باسشىلارى, ءوڭىر زيالىلارى, اۋىل شارۋاشىلىعى قۇرىلىمدارىنىڭ باسشىلارى قۇتتىقتادى. مىسالى, اۋىل كىتاپحاناسىنىڭ وتكەنى مەن بۇگىنى تۋرالى ءبىراز ماسەلەنىڭ باسىن قايىرعان بەلگىلى ديقان يبراش ەستاەۆ ءوز ويىن «سىزدەر مەنىڭ ەگىن ەگىپ, بيداي ورعانىمنان ءجۇز ەسە ارتىق, مىڭ ەسە ساۋاپتى ءىس اتقارىپ جاتىرسىزدار», دەپ تۇيىندەدى.
وبلىس اكىمىنىڭ ورىنباسارى رينات مۇحامەتقاليەۆ كىتاپحاناشى كۇنى ەلىمىزدىڭ ەڭ ۇلىق ۇلتتىق مەرەكەسى رەسپۋبليكا كۇنى قارساڭىندا كەلۋىن جاقسىلىققا جورىپ, كىتاپحانانىڭ ەل ومىرىندەگى ماڭىزى زور ەكەنىنە توقتالدى.
«زامانىمىزدىڭ زاڭعار قالامگەرى, مەملەكەت قايراتكەرى, ويشىل جازۋشى ءابىش كەكىلباي ۇلىنىڭ «ادامدى ادام ەتكەن – كىتاپ, ادامزات ەتكەن – كىتاپحانا» دەگەن قاناتتى ءسوزى – كىتاپحانانىڭ قانشالىقتى ماڭىزدى ەكەنىن ايشىقتاپ تۇر. كىتاپحانا قاشاندا مادەني-رۋحاني ءىس-شارالار ءجيى ۇيىمداستىرىلاتىن رۋحانيات ورداسى. دەمەك, كىتاپحاناشىلاردى قوعامنىڭ رۋحاني دانەكەرى دەسەك تە بولادى. بۇگىندە ءوڭىردىڭ مادەنيەت جانە ءبىلىم سالاسىندا 1252 كىتاپحاناشى جۇمىس ىستەيدى. قۇرمەتتى كىتاپحانا قىزمەتكەرلەرى! كاسىبي بىلىك-بىلىمدەرىڭىزدى تىنباي جەتىلدىرىپ, وسى باعىتتا اتقارىپ كەلە جاتقان ۇزدىكسىز ىزدەنىستەرىڭىزگە تابىس تىلەيمىن», دەدى رينات زاكي ۇلى.
مەرەكەلىك جيىنعا ارداگەر كىتاپحاناشىلار دا ارنايى قاتىسىپ, كەيىنگى بۋىنعا دەگەن ىزگى تىلەكتەرىن ارنادى.
«كۇن سايىن سەگىز ساعات بويى كوز مايىن تاۋىسىپ, كىتاپپەن, وقىرمانمەن جۇمىس ىستەۋ وڭاي ەمەس. كىتاپحاناشىنىڭ ەڭبەگى – كوزگە كورىنبەيتىن جۇمىس. كەلگەن كىتاپتى تۇپتەۋ, شيفرلاۋ, ەلەكتروندى كاتالوگكە سالۋ, وقىرمانعا جەتكىزۋ, كۇندەلىكتى گازەت-جۋرنالدىڭ بەتىندەگى وسى وقىرمانعا كەرەك بولىپ قالادى-اۋ دەگەن ماتەريالداردى جيىپ-تەرىپ, ونىڭ ەلەكتروندىق جانە كارتوچكالىق نۇسقاسىن جاساپ وتىرۋ ادامنان, ارينە, ۇلكەن ءتوزىمدى تالاپ ەتەدى. سوندىقتان ءوز ىسىنە شىنداپ بەرىلە الماعان ادام كىتاپحانادا كوپ تۇراقتاي المايدى. ال بۇگىنگى ءىس-شاراعا جينالعانداردىڭ دەنى وسى قالاداعى, سوناۋ شالعاي تۇپكىردەگى اۋىل كىتاپحانالارىندا تالاي جىلدان بەرى ادال ەڭبەك ەتىپ كەلە جاتقان ماماندار. ولاردىڭ ىشىندە مەنىڭ شاكىرتتەرىم دە ءجۇر», دەيدى گۇلجامەريا عالياسقارقىزى.
سالتاناتتى ءىس-شارا بارىسىندا 5 كىتاپحاناشى «مادەنيەت سالاسىنىڭ ۇزدىگى» توسبەلگىسىمەن, ون شاقتى كىتاپحاناشى مادەنيەت جانە اقپارات مينيسترلىگىنىڭ قۇرمەت گراموتاسىمەن جانە العىسحاتىمەن ماراپاتتالدى.
مەرەكەلىك كەشتە ل.تولستوي اتىنداعى وبلىستىق كىتاپحانا وتكىزگەن «ۇزدىك جاس كىتاپحاناشى» بايقاۋىنىڭ قورىتىندىسى جاريالانىپ, جەڭىمپازدارعا ارنايى ديپلومدار تابىس ەتىلدى.
قوستاناي وبلىسى
