«التىن بەسىك» اتالعان تاربيە وشاعىنىڭ اشىلۋ راسىمىنە وبلىس اكىمى قۇمار اقساقالوۆ پەن «حالىق» قورىنىڭ باسقارۋشى ديرەكتورى ناريمان ابىلشايىقوۆ قاتىستى. سالتاناتتى جيىندا جاڭا ۇلگىدەگى مەكتەپكە دەيىنگى ءبىلىم نىسانىنىڭ بوي كوتەرۋى – يگى ءىستى جۇمىلا كوتەرىسكەن مەملەكەت پەن اتالعان قوردىڭ, جەرگىلىكتى بەلسەندى قاۋىمداستىق وكىلدەرىنىڭ بىرلەسكەن كۇش-جىگەرىنىڭ ناتيجەسى ەكەنى ايتىلدى.
«حالىق» قايىرىمدىلىق قورى ءىشى-سىرتى كەلىسكەن ءۇش قاباتتى بالاباقشانىڭ قۇرىلىسىنا 1,3 ملرد تەڭگە جۇمساعان. سونداي-اق 57 ملن تەڭگە قارجىعا عيماراتتى تۇگەلدەي جابدىقتاپ شىققان. ال اكىمدىك وبلىس قازىناسىنان 500 ملن تەڭگە قوسىمشا قارجى شىعارىپ, جاڭا نىساننىڭ اينالاسىن اباتتاندىرىپ بەرگەن.
«بۇگىن ءبىز مىناداي ۇلكەن بالاباقشانى اشىپ جاتىرمىز. وسى ورايدا بالاباقشاعا قابىلدانعان كىشكەنتاي بوبەكتەرىمىز بۇتىندەي ءبىر جاڭا الەمگە ەنىپ, جاڭا ءومىر باستايتىنىن دا ايتا كەتۋ كەرەك. بۇل – حالىق يگىلىگىنە, ەل بولاشاعىنا سالىنعان ينۆەستيتسيا. «التىن بەسىك» بالاباقشاسى كوپتەگەن اقىلدى, تالانتتى, باقىتتى بالانى تاربيەلەپ شىعاراتىنىنا سەنىمدىمىن», دەدى وبلىس اكىمى قۇمار اقساقالوۆ.
اۋدانى 4202 شارشى مەتر, ءۇش قاباتتى جاڭا بالاباقشاعا 1 جاستان 5 جاسقا دەيىنگى بالالار بارادى. مەكتەپكە دەيىنگى ءبىلىم مەن تاربيە مەكەمەسىندە بالالاردىڭ ۇيلەسىمدى دامۋى ءۇشىن بارلىق جاعداي جاسالعان: كەڭ ويىن زالى, جاتىن بولمەلەرى, مۋزىكا, سپورت زالدارى, مەديتسينالىق كابينەت, سونداي-اق قوسىمشا ساباقتارعا ارنالعان سىنىپتار بار. مۇندا قازاق, ورىس تىلىندە تاربيە بەرەتىن ون ەكى توپ جۇمىس ىستەيدى.
اۋليەكول اۋىلىنىڭ تۇرعىنى, كوپبالالى انا ىرىستى جانسۇگىروۆا بالالارىن قازاق توبىنا بەرىپتى. «ۇلتتىق مەرەكەمىز – رەسپۋبليكا كۇنى قارساڭىندا ۇلكەن قۋانىشقا كەنەلىپ جاتىرمىز. قاي اتا-انا بولسىن, كىشكەنتاي ق ۇلىنشاعىنىڭ جاقسى بالاباقشادا ساپالى تاربيە الىپ, مەكتەپكە دەيىن قاتاردان قالماي شيراپ, جەتىلگەنىن قالايدى. بۇگىن سول ارمانىمىز ورىندالىپ, قولىمىز ۇزارىپ جاتىر. جاڭا ىشىنە كىرىپ, ءبارىن ارالاپ, ءوز كوزىمىزبەن كورىپ شىقتىق, ناق ەرتەگىدەگىدەي, بالاعا كەرەكتىڭ ءبارى بار. اۋىلعا وسىنداي زاماناۋي بالاباقشا سالىپ بەرگەن ەل ازاماتتارىنا العىسىم شەكسىز. وتە قۋانىشتىمىن», دەيدى كوپبالالى انا.
بالاباقشا اۋماعى اباتتاندىرىلعان, زاماناۋي بالالار الاڭى, سپورت الاڭدارى بار. اسەم عيمارات بەينەباقىلاۋ جۇيەسىمەن, ورتكە قارسى دابىل كوتەرگىش قۇرىلعىمەن جابدىقتالعان.
ءدال وسى كۇنى قوستاناي قالاسىنىڭ ىرگەسىندەگى ميچۋرين اۋىلىندا دا مەملەكەت پەن جەكە مەنشىك يەسىنىڭ سەرىكتەستىگى اياسىندا جاڭا بالاباقشا ەسىگىن ايقارا اشتى. «ەركەتاي» دەپ اتالاتىن بۇل مەكتەپكە دەيىنگى ءبىلىم مەكەمەسىنە «ەلەكتروندىق بالاباقشا – ينديگو» اقپاراتتىق جۇيەسى ارقىلى كەزەكتە تۇرعان 1 جاستان 5 جاسقا دەيىنگى 100 بالا قابىلداندى.
قوستاناي وبلىسى
