تۋ كوتەرۋ راسىمىنە وراي الاڭعا نيۋ-يورك مەرياسى, قازاق دياسپوراسى, ديپلوماتتار, ستۋدەنتتەر, قازاقستاننىڭ بىرىككەن ۇلتتار ۇيىمى جانىنداعى تۇراقتى وكىلدىگى مەن باس كونسۋلدىعى وكىلدەرى كەلگەن. سونداي-اق ديماشتىڭ جانكۇيەرلەرى دە وسى جەرگە جينالعان.
– بۇل ماڭىزدى ءىس-شاراعا باس كونسۋلدىڭ ءوزى New York Film Academy-دا وقىپ جاتقانداردىڭ بارلىعىن شاقىردى. ءبىرىمىز دە قالماي باردىق. مەگاپوليستىڭ مەرى ەريك ادامس باستاعان ءبىر توپ زيالى قاۋىم وكىلى جينالىپتى. ونسىز دا تۋريست اعىلعان Bowling Green الاڭىندا ينە شانشار جەر بولعان جوق. الدىمەن قۇتتىقتاۋلار ايتىلدى. ودان سوڭ ابايدىڭ «كوزىمنىڭ قاراسى» ءانىن, قۇرمانعازىنىڭ «اداي» كۇيىن تىڭداپ, تەگىن تاراتىلعان كوك شوكولادتان اۋىز تيدىك. اينالامىزدا – قازاقتىڭ شاپانى مەن كامزولىن كيگەن جىگىتتەر مەن قىزدار. كوزىڭ قۋانادى ەكەن. ال كوك بايراقتى اسپانعا كوتەرىپ ءانۇران ويناعاندا ەلدە جۇرگەندەي ءبىر مارقايىپ ءارى تولقىپ, ەرەكشە جاساپ قالدىق, – دەپ «بولاشاق» باعدارلاماسىمەن اقش-تا ءبىلىم الىپ جاتقان وتانداسىمىز عاني جاپىشەۆ ءوز اسەرىمەن ءبولىستى.
ونىڭ ايتۋىنشا, قالا مەرى ەريك ادامس جينالعانداردى رەسپۋبليكا كۇنىمەن قۇتتىقتاپ, ەكى ەل اراسىنداعى ىنتىماقتاستىقتى اتاپ وتكەن.
– ءدال قازىر كوك تۋىمىز مانحەتتان كوگىندە جەلبىرەپ تۇر. ادەمى كورىنىس. ءبىزدى ۇمىتپاي ارنايى شاقىرعان نيۋ-يوركتەگى ەلىمىزدىڭ باس كونسۋلى راۋان تىلەۋلين مىرزاعا كوپ راحمەت! ەلىمىزدىڭ ماقتانىشى ديماش قۇدايبەرگەننىڭ جانكۇيەرلەرى دە كوپتەپ كەلدى. مەن دە ديماشتىڭ تۋعان ءوڭىرى اقتوبەدەنمىن دەپ ەدىم, باس سالىپ سۋرەتكە ءتۇستى, – دەيدى وتانداسىمىز.
