فوتولار: اقتوبە وبلىسى اكىمدىگى
«دۇنيە ديدارىنداعى ديماش» كورمەسىنىڭ اشىلۋ سالتاناتىنا الەمگە ايگىلى ءانشىنىڭ ۇستازى, قر ەڭبەك سىڭىرگەن قايراتكەرى مارات ءايتىموۆ, اكە-شەشەسى قانات ايتباەۆ پەن سۆەتا ايتباەۆا قاتىستى.
قۇتتىقتاۋ سوزىندە وبلىس اكىمى اسحات شاحاروۆ:
«ميلليونداعان كورەرمەندى ونەرىمەن ءتانتى قىلعان ديماش – اقتوبە وبلىسىنىڭ قۇرمەتتى ازاماتى. سوندىقتان دا ونىڭ شىعارماشىلىعىنا ارنالعان كورمە – قوناقتار مەن تۇرعىنداردى بەي-جاي قالدىرماسى انىق. كوپشىلىككە ۇسىنىلىپ وتىرعان كورمە ءومىرى مەن ونەردەگى جەتىستىكتەرىنەن قۇرالىپ وتىر. وسى ورايدا كورمەنىڭ استانادان كەيىن تۋعان جەرىندە ۇيىمداستىرىلۋىنا سەپتىگىن تيگىزگەن ديماشقا جانە اتا-اناسىنا شىنايى العىسىمىزدى بىلدىرەمىز», دەدى.
شارادا ديماش قۇدايبەرگەننىڭ رەپەرتۋارىنداعى حالىق ءانى «دايديداۋدى» ا.جۇبانوۆ اتىنداعى اقتوبە مۋزىكالىق كوللەدجىنىڭ وقۋشىلارى ورىندادى.
شاشۋ شاشىلىپ اشىلعان كورمەدە التىن داۋىستى ءانشىنىڭ قازاقى بولمىسىن, ونىڭ قايتالانباس ءۇنىن قالىپتاستىرعان ورتاسىن, جەكە وقيعالاردى قوزعاۋعا مۇمكىندىك بەرەتىن ەكسپوناتتار جانە تانىمال تۇلعالار مەن كوپتەگەن جانكۇيەردىڭ سىيلىقتارى ۇسىنىلدى.
كورمە مازمۇنى جاعىنان ءبىر-بىرىمەن بايلانىستى 4 بولىمنەن تۇرادى.
ءبىرىنشىسى «شابىت كوزدەرى» دەپ اتالادى. وندا ءارتىستىڭ ءومىربايانى, وسكەن ورتاسى, بالالىق شاعى, شىعارماشىلىق جولى كورسەتىلەتىن زاتتار (فوتوسۋرەتتەر, جەكەلەنگەن زاتتار);
ەكىنشىسى «داڭققا اپارار جولدا» – كاسىبي ءبىلىم جولىندا رەسپۋبليكالىق, حالىقارالىق بايقاۋلاردا جانە ت.ب. العان ديپلومدارى مەن ماراپاتتارى;
ءۇشىنشىسى «جانكۇيەرلەر ماحابباتى» - ءارتىستىڭ جانكۇيەرلەرىنىڭ تارتۋ ەتكەن سىيلىقتارى;
ءتورتىنشى ءبولىم «ۇلت مادەنيەتىنىڭ جارشىسى» دەپ اتالادى, الەمدىك ارەنادا ۇلتتىق مادەنيەت پەن برەندتىڭ تانىلۋىنا ىقپال ەتەتىن زاتتارى (ۇلتتىق مۋزىكالىق اسپاپتار, ۇلتتىق كوستيۋمدەرى, باسپا ماتەريالدارى جانە ت.ب.) قويىلعان.
كورمە جۇمىسى 24 جەلتوقسانعا دەيىن جالعاسادى.
