سۋرەتتى تۇسىرگەن – جۇماباي مۇسابەكوۆ
قانشاما جىلدان بەرى حالىقتىڭ ۋايىمىنا اينالعان ەسكى كوپىر جوندەۋگە كەلمەيدى. ورنىنا جاڭا نىسان سالىنباسا, جاڭعىرتقانمەن كەيىن ءبارىبىر ىستەن شىعاتىنى انىق. مەملەكەت باسشىسىنىڭ جەتىسۋ وبلىسىنا جۇمىس ساپارى بارىسىندا بەرگەن تاپسىرماسىنىڭ ءبىرى وبلىستىق ماڭىزى بار اۆتوموبيل جولىنىڭ بويىندا ورنالاسقان 15 اپپاتتىق كوپىردى قالپىنا كەلتىرۋ بولاتىن. وسى رەتتە وبلىس اكىمدىگى جاڭا قۇرىلىستىڭ جوبالىق-سمەتالىق قۇجاتتاماسىن ازىرلەپ, مەملەكەتتىك ساراپتامانىڭ وڭ قورىتىندىسىن الدى.
«وتكەن جىلى ەسكەلدى اۋدانىنىڭ باقتىباي, كەربۇلاق اۋدانىنىڭ مايتوبە, كوكسۋ اۋدانىنىڭ جارلىوزەك اۋىلدارىندا ءۇش كوپىر سالىنىپ, قولدانىسقا بەرىلدى. ال سارقان مەن قاراتال اۋداندارىندا تاعى ەكەۋىنىڭ قۇرىلىسى بيىلعى جىلدىڭ قاراشا ايىنىڭ سوڭىنا دەيىن اياقتالادى. قالعان ونىنىڭ قۇرىلىسى 2025 جىلى باستالادى», دەيدى جەتىسۋ وبلىسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس دوسجانوۆ.
وسىدان بىرەر جىل بۇرىن مۇقان تولەباەۆ اۋىلىنىڭ تۇرعىندارى كوپىر سالۋ ماسەلەسىن وبلىس اكىمىمەن بولعان كەزدەسۋدە كوتەرگەن ەدى. بۇل – مۇقان تولەباەۆ, شۇبارتۇبەك, ۇلگى ەلدى مەكەندەرىن ورتالىقپەن جالعاستىرىپ تۇرعان ماڭىزدى وتكەل. وعان قوسا اۋىل بالالارى مەكتەپكە وسى كوپىر ارقىلى بارادى. سول سەبەپتى دە نىساننىڭ الەۋمەتتىك ماڭىزى باستى نازارعا الىنعان.
«بۇل كوپىر ءبىزدى باسقا اۋىلدارمەن, ورتالىقپەن بايلانىستىرادى. كوپىر ارقىلى كورشىلەس شۇبارتۇبەك اۋىلىنىڭ بالالارى ءبىزدىڭ اۋىلعا مەكتەپكە وقۋعا كەلەدى. سوندىقتان بۇل – اسا ماڭىزدى قۇرىلىس. قانشاما جىلدان بەرى ەسكىرىپ تۇر. قايتا سالاتىنىنا كوڭىلىمىز مارقايىپ قالدى», دەدى مۇقان تولەباەۆ اۋىلىنىڭ تۇرعىنى بەرىكبول شالتاەۆ.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, اتالعان كوپىردە جارىقتاندىرۋ مەن جاياۋ جۇرگىنشى جولى قاراستىرىلعان. قازىر قۇرىلىس الاڭىندا 25 مامان, 13 تەحنيكا جۇمىس ىستەپ ءجۇر. سول سياقتى قاراتال اۋدانىنداعى كوكدالا اۋىلىندا سۋارۋ كانالىنان وتەتىن جاڭا كوپىر سالىنىپ جاتىر. ۇزىندىعى 45 مەتر بولاتىن وتكەلدىڭ قۇرىلىسى 2023 جىلى باستالعان, بۇگىندە اياقتالۋعا جاقىن, قوسىمشا ەسكى كوپىردى بۇزۋ جۇمىستارى ءجۇرىپ جاتىر.
جەتىسۋ وبلىسى
