جوبانى ۇيىمداستىرۋشىلار پرەزيدەنت جانىنداعى مەملەكەتتىك باسقارۋ اكادەمياسىنىڭ وڭىرلىك فيليالىنىڭ قولداۋىمەن 45 اپتانىڭ ىشىندە ابايدىڭ 45 قاراسوزىن تۇشىنىپ وقىپ, بۇگىنگى ادام, قازىرگى قوعام مىنەزىمەن ساباقتاستىرا تالداۋدى كوزدەپ وتىر.
«ابايدىڭ قاراسوزدەرى» چەللەندجىن ءبىرىنشى بولىپ باستاپ بەرگەن وبلىس اكىمىنىڭ ورىنباسارى رينات مۇحامەتقاليەۆتىڭ ايتۋىنشا, وفلاين جانە ونلاين رەجىمدە ءجۇرىپ جاتقان تالداۋ ساباقتارىنا مەملەكەتتىك قىزمەتشىلەرمەن قاتار كوپتەگەن مۇعالىم, ستۋدەنت جاستار قىزىعۋشىلىق تانىتىپ وتىر.
«اباي كۇنىن» قالاي وتكىزسەك دۇرىس بولادى دەگەن ىزدەنىسپەن جۇرگەن ەدىك. دەمالىس كۇنى ۆەلوسيپەدپەن كەلە جاتىپ, ويىما وسى يدەيا ساپ ەتە قالدى. مۇنداي ءىس-شارالار ءبىر كۇنمەن شەكتەلىپ قالماۋى كەرەك. ەرتەڭىندە پرەزيدەنت جانىنداعى مەملەكەتتىك باسقارۋ اكادەمياسىنىڭ وڭىرلىك فيليالىنا حابارلاسىپ: «ابايدىڭ قاراسوزدەرى» اتتى چەللەندج ۇيىمداستىرايىق دەپ ەدىك. ونى ءوزىم باستاپ بەرگىم كەلەدى. سىزدەردە بىلىك-ءبىلىمىن جەتىلدىرىپ جاتقان مەملەكەتتىك قىزمەتشىلەر بار ما؟», دەپ سۇرادىم. ول كىسىلەر قازىر جيىرما ادام وقىپ جاتقانىن, ءبىرىنشى ءدارىستى سول توپقا وقۋعا بولاتىنىن ايتتى. سودان ءوزىم ءجيى قايتالاپ وقيتىن «ەگەر ەستى كىسىلەردىڭ قاتارىندا بولعىڭ كەلسە, كۇنىندە ءبىر مارتەبە, بولماسا جۇماسىندا ءبىر, ەڭ بولماسا ايىندا ءبىر, وزىڭنەن ءوزىڭ ەسەپ ال!» دەپ كەلەتىن ون بەسىنشى قاراسوزدى تاڭداپ الىپ, دايىندالا باستادىم. سلايد جاساپ, ءبىلىم باسقارماسىنان وزىمە كەرەك مالىمەتتەردى سۇراتىپ الدىم. ۇلكەن جەتىستىككە جەتكەن تۇلعالار, ولاردىڭ شىڭدالۋ, ءوسۋ جولى, ادامعا ءوز ماقساتىنا جەتۋىنە كەدەرگى كەلتىرەتىن كەسىر ادەتتەر, ودان ارىلۋدىڭ امال-جولدارى تۋرالى اقپارات جينادىم. ءدارىس وزىمە دە, تىڭداۋشىعا دا ۇنادى. قىزىقتى ويلار ايتىلدى, قىزۋ پىكىرتالاس تا بولدى. ودان كەيىن چەللەندج كەزەگىن وبلىستىق ءماسليحاتتىڭ دەپۋتاتى قىرمىزى ساپارقىزىنا ۇسىندىم. وسىلايشا, بۇل جوبا ءساتتى جالعاسىن تاۋىپ كەلە جاتىر», دەيدى رينات زاكي ۇلى.
قوستاناي وبلىسى
