فوتو: almaty.tv
وسى قاتاردا «وتان» وردەنى دە بار.
«بيىل «وتان» وردەنىمەن كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىنىڭ ديرەكتورى س.جوشىباەۆ پەن كورنەكتى اقىن, مەملەكەتتىك سىيلىقتىڭ لاۋرەاتى ن.ورازالين ماراپاتتالدى», دەلىنگەن اقوردا تاراتقان حابارلامادا.
سەيىتحان جوشىباەۆ - مەديتسينا عىلىمدارىنىڭ دوكتورى, اكادەميك, كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىنىڭ ديرەكتورى. سەيىتحان جوشىباەۆ 85 جاسىنا دەيىن 3 مىڭ ادامنىڭ جۇرەگىن قايتا سوقتىرىپ, ءالى كۇنگە دەيىن وپەراتسيا جاسايدى.
نۇرلان ورازالين - 1947 جىلى 13 ماۋسىمدا الماتى وبلىسى, ۇيعىر اۋدانى, ۇلكەن ديحان (قازىرگى كوكباستاۋ) اۋىلىندا دۇنيەگە كەلگەن. ول ەلىمىزدىڭ ساياسي, مادەني, ومىرىنە قويان-قولتىق ارالاسىپ, رۋحاني كەڭىستىگىمىز بەن ۇلتتىق ويلاۋ جۇيەمىزدىڭ تۇتاستىعىن ساقتاۋدا قايراتكەرلىك قارىم تانىتىپ جۇرگەن تۇلعا. العاشقى ولەڭدەرى «جاس كەرۋەن» (1969), «كوكتەم تىنىسى» (1975) ۇجىمدىق جيناقتارىنا ەنگەن. «بەيمازا كوڭىل», «كوكتەم كوشى», «جەتىنشى قۇرلىق», «ادامزاتقا امانات», «قۇرالايدىڭ سالقىنى», «عاسىرمەن قوشتاسۋ», «سىرنايلى شاق», «جۇرەكجاردى», «جاسىل وت» («زەلەنىي وگون» ورىس تىلىندە), «قوزداعى شوق» اتتى جىر جيناقتارى مەن ءۇش تومدىق تاڭدامالى جىر كىتابى, «ازاتتىق ايدىنى» اتتى كوركەم پۋبليتسيستيكالىق-ەسسە تولعاۋلار كىتابى, «قىرعىن» اتتى درامالىق شىعارمالار جيناعى جارىق كوردى.
