سۋرەتتى تۇسىرگەن – جۇماباي مۇسابەكوۆ
«ينۆاتاكسي» قىزمەتىنىڭ اۆتوكولىگى تالدىقورعان قالاسىنىڭ «بولاشاق» شاعىن اۋدانىندا ورنالاسقان 3 بىردەي ءۇيدىڭ اۋلاسىنا توقتاپ, گۇلنار نۇرعاليەۆا, جادىرا قاسىموۆا, نۇربەك تۇرعانوۆ سىندى مۇگەدەكتىگى بار جاندارعا قىزمەت كورسەتىپ, جۇمىسىنا جەتكىزدى. الدىمەن اتالعان شاعىن اۋدانداعى №24 ۇيگە كەلىپ, كولىك جۇرگىزۋشىسى مۇگەدەكتەر ارباسىنا تاڭىلعان گۇلنار نۇرعاليەۆاعا امانداسىپ, كولىككە وتىرۋىنا كومەكتەستى. گۇلنار تالدىقورعان قالاسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار بولىمىندەگى جۇمىس ورنىنا جەتۋگە 10 جىلدان بەرى «ينۆاتاكسي» قىزمەتىن پايدالانادى. تالدىقورعان قالاسىنداعى «اقجانەل» مەديتسينالىق ساۋىقتىرۋ ورتالىعىندا مەدبيكە بولىپ جۇمىس ىستەيتىن جادىرا قاسىموۆا دا «ينۆاتاكسي» قىزمەتىنە ءدان ريزا.
«تاعدىر تالقىسىن كورىپ جۇرسەك تە, ءبىزدىڭ دە ارقالاعان ارمان, العا قويعان ماقساتىمىز بار. تىرلىك ەتۋىمىز, قوعامعا پايدامىزدى تيگىزۋىمىز كەرەك. بۇل ورايدا «ينۆاتاكسي» قىزمەتىنىڭ وبلىس ورتالىعىندا جۇمىس ىستەيتىنىنە قۋانىشتىمىن. جۇرگىزۋشىلەر ءبىزدى كولىككە وتىرعىزىپ, دىتتەگەن جەرىمىزگە جەتكىزىپ ءجۇر. ولاردىڭ ك ۇلىمدەپ امانداسقانى, جىلى شىرايمەن تىلدەسكەنى, قىزمەتىن ەرەكشە شابىتپەن جاساعانى ءبىزدى قۋانتادى», دەدى قوس بالداقتى سەرىك ەتكەن اق حالاتتى ابزال جان.
جەتىسۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ ايتۋىنشا, «ينۆاتاكسي» قىزمەتى «مەملەكەتتىك ساتىپ الۋ تۋرالى» زاڭنىڭ 41-بابى 3-تارماعىنىڭ 2-تارماقشاسىنا, كولىك جانە كوممۋنيكاتسيا ءمينيسترىنىڭ 2013 جىلعى 1 قاراشاداعى №859 بۇيرىعىمەن بەكىتىلگەن «اۆتوموبيل كولىگىمەن مۇگەدەكتىگى بار ادامداردى تاسىمالداۋ جونىندە قىزمەتتەر كورسەتۋ قاعيدالارىنا» سايكەس جۇرگىزىلەدى. جالپى, جەتىسۋ وبلىسىندا «ينۆاتاكسي» قىزمەتىن 8 ۇكىمەتتىك ەمەس ۇيىم جۇزەگە اسىرادى. وبلىستا 2023 جىلى جەرگىلىكتى بيۋدجەت قاراجاتى ەسەبىنەن 293,4 ملن تەڭگە ءبولىنىپ, 14 جاڭا «ينۆاتاكسي» اۆتوكولىگى ساتىپ الىنىپ, بۇگىنگى كۇنى بارلىق 14 اۆتوكولىك قالالىق, اۋداندىق جۇمىسپەن قامتۋ جانە الەۋمەتتىك باعدارلامالار بولىمدەرىنە بەرىلدى. ناتيجەسىندە, وبلىستا «ينۆاتاكسي» سانى 1 جىلدا 2 ەسەگە ارتتى.
ايتا كەتەرلىگى, 2024 جىلدىڭ توعىز ايىندا «ينۆاتاكسي» قىزمەتىنە وبلىستا بارلىعى 60 مىڭنان استام ءوتىنىش كەلىپ تۇسكەن. بۇگىندە تالدىقورعان قالاسىندا 2 «ينۆاتاكسي» قىزمەتى جۇمىس ىستەيدى. ونىڭ ءبىرى – «ەرلىك» قوعامدىق بىرلەستىگى, مۇندا 8 كولىك بار, ال «قازاق زاعيپتار قوعامى» قب «تالدىقورعان» كورپوراتيۆتىك قورىندا 5 كولىك قىزمەت كورسەتەدى. اتالعان قىزمەت ءتۇرىنىڭ جۇمىس بارىسىمەن تانىسۋعا ارنايى شىققان ءوڭىر جۋرناليستەرىنە شارا بارىسىندا «ينۆاتاكسي» جوباسىنىڭ ۇيلەستىرۋشىسى نۇربەك تۇرعانوۆ تۇسىنىك بەردى.
«وسىدان 10 جىل بۇرىن «ەرلىك» مۇگەدەكتەر قوعامدىق بىرلەستىگىنىڭ توراعاسى روزا اقجاركەنوۆانىڭ باستاماسىمەن «ينۆاتاكسي» قىزمەتى قۇرىلدى. وسى جوبانى ىسكە اسىرا باستاعان جىلدارى 3 اۆتوموبيل ازاماتتارعا قىزمەت كورسەتسە, قازىر مەملەكەت قولداۋىنىڭ ارقاسىندا كولىك سانى 8-گە جەتتى. «ينۆاتاكسي» قىزمەتىنىڭ جۇرگىزۋشىلەرى مۇمكىندىگى شەكتەۋلى ادامداردى جۇمىسقا, وقۋعا, سپورتتىق ءىس-شارالارعا, وڭالتۋ ورتالىقتارىنا اپارىپ, كەيىن ۇيىنە جەتكىزىپ وتىرادى» دەي كەلە, ن.تۇرعانوۆ اتالعان الەۋمەتتىك قىزمەت مەملەكەت ەسەبىنەن تەگىن جۇرگىزىلەتىنىن ايرىقشا ايتتى.
«ينۆاتاكسي» قىزمەتىن پايدالانۋشىلار وسى قىزمەتتى قۇرۋعا, قولداۋعا, ىسكە اسىرۋعا, دامىتۋعا قاتىسقان بارلىق ادامدارعا العىس جاۋدىرىپ ءجۇر.
جەتىسۋ وبلىسى
