كينوتەاترلاردا «ۆەنوم. سوڭعى بي» تۋىندىسى قازاق تىلىندە كورسەتىلەدى

اتى دا ايتىپ تۇرعانداي, بۇل – «ۆەنوم» تريلوگياسىنىڭ قورىتىندى ءبولىمى. العاشقى ەكى ءبولىمى ۇلكەن قىزىعۋشىلىق تۋدىرعان.

«Sony Pictures كومپانياسىندا دۋبلياج بەن لوكاليزاتسيا ءاردايىم حالىقارالىق ماركەتينگ ستراتەگياسىنىڭ اجىراماس بولىگى بولاتىن. بۇرىننان كەلە جاتقان سەرىكتەسىمىز, «مەلومان» كومپانياسىمەن بىرلەسكەن جۇمىسىمىزدىڭ ارقاسىندا, فرانشيزانىڭ جاڭا ءبولىمى «ۆەنوم: سوڭعى بي» تۋىندىسىندا ۆەنوم قازاق تىلىندە سويلەيتىنىنە قۋانىشتىمىز», دەيدى Sony Pictures كومپانياسىنىڭ حالىقارالىق ماركەتينگ جونىندەگى ۆيتسە-پرەزيدەنتى ناتاليا گرىموۆا.

«گولليۆۋد ستۋديالارى قازاق ءتىلىنىڭ دامىتۋعا بەلسەندى ۇلەس قوسىپ جاتقانى ءبىز ءۇشىن وتە ماڭىزدى! بيىل قازاقستاننىڭ ۇلكەن ەكراندارىنا جاڭا «ۆەنوم: سوڭعى بي» بلوكباستەرىن شىعارامىز. دىبىستالعان فيلمدەر تەك كوڭىل كوتەرمەيدى, سونداي-اق ولاردىڭ وراسان زور تانىمدىق الەۋەتى بار! ەلەستەتىپ كورىڭىزشى: سۇيىكتى سۋپەرقاھارماندار سىزگە جاقىنداي تۇسەدى! ۆەنومنىڭ ءوزى انا تىلىڭىزدە سويلەيدى. بۇل عاجاپ قوي! ال ستۋديالارعا كورەرمەندەردىڭ قازاق دۋبلياجىنا دەگەن سۇيىسپەنشىلىگىن كورسەتىپ, كەلەسى جىلى قازاق تىلىندە شىعاتىن دۋبلياجدار مەن عاجايىپ شىتىرمان تۋىندىلاردى كۇتەمىز», دەپ پىكىر ءبىلدىردى MARWIN/مەلومان باس ديرەكتورى ۆاديم گولەنكو. 

«قازاق تىلىنە اۋدارىلىپ جاتقان فيلمدەردى كەڭىنەن ناسيحاتتاپ, كينوتەاترلارعا بارىپ, قازاق دۋبلياجىن قولداۋعا شاقىرامىز. الەمدىك ستۋديالاردىڭ قازاقتىلدى ورتانىڭ قىزىعۋشىلىعىن ەسكەرىپ, تۋىندىلارىن ءوز ەسەبىنەن اۋدارىپ, ۇسىنۋى – ءبىز ءۇشىن وتە جاقسى جاڭالىق. بيىلعى الەمدىك پرەمەرالاردىڭ قازاق تىلىندەگى اۋدارماسى بۇرىن-سوڭدى بولماعان رەكوردتىق كورسەتكىشتەرگە جەتتى. قازاقشا كينو قاراۋعا ىقىلاستى قاۋىمنىڭ كوبەيگەنى انىق بايقالدى. الداعى ۋاقىتتا تانىمال تۋىندىلاردى قازاق تىلىنە اۋدارۋ ءداستۇرى جالعاسا بەرەدى. بۇل ءتىلىمىزدىڭ اسىرەسە بالالار مەن جاستار ءۇشىن تارتىمدىلىعىن ارتتىرۋعا جانە كەڭىنەن تاراتۋعا باعىتتالعان ءتيىمدى ءتاسىل دەپ سانايمىن», دەيدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.

قازاق تىلىندەگى دۋبلياجدى وتاندىق Movie Dalen دۋبلياج ستۋدياسى جاسادى.

حالىقارالىق «قازاق ءتىلى» قوعامىنىڭ ءباسپاسوز قىزمەتىنىڭ مالىمدەۋىنشە بۇعان دەيىن Disney, Pixar سىندى حالىقارالىق ستۋديالار الەمدىك تانىمال تۋىندىلارىن ءوز ەسەبىنەن قازاق تىلىنە اۋدارىپ, كاسىبي دۋبلياج جاسادى. «ويجۇمباق 2» ءفيلمى العاشقى 4 كۇندە 40 000 000 تەڭگەدەن استام قاراجات جيناپ, بۇعان دەيىن كورسەتىلگەن تۋىندىلار اراسىندا رەكورد ورناتتى. قىرعىزستان, ارمەنيا, گرۋزيا, ازەربايجان, وزبەكستان, تاجىكستان ەلدەرى اراسىندا قازاقستان جينالعان سوما بويىنشا ءبىرىنشى ورىندا تۇردى.

ايتا كەتسەك, «ۆەنوم: سوڭعى بي» فيلمىندە توم حاردي ۆەنوم رولىندە ورالادى. تريلوگيانىڭ سوڭعى بولىمىندە ەددي مەن ۆەنوم قاشۋعا ءماجبۇر بولادى. دۇشپاندارى جەردە دە, باسقا الەمدەردە دە قىر-سوڭدارىنان قالار ەمەس. جاۋلار شەڭبەرى تارىلعاندىقتان, ولار تاعدىر وزگەرتەتىن شەشىم قابىلداۋى كەرەك. بۇل ولاردىڭ سوڭعى ءبيى بولۋى مۇمكىن.

رەجيسسيور: كەللي مارسەل.     

باستى رولدەردە: توم حاردي, چيۆەتەل ەدجيوفور, دجۋنو تەمپل, ريس يۆانس, پەگگي لۋ, الاننا يۋباك, ستيۆەن گرەم.

ترەيلەردىڭ سىلتەمەسى يۋتۋبتا.