فوتو: gov.kz
ەڭبەك جىنە حالىقتى الەۋمەتتىك قورعاۋ مينيسترلىگىنىڭ مالىمەتىنشە, جىل باسىنان قازاقستانعا قانداستاردىڭ 45,8%-ى قىتايدان, 39% – وزبەكستاننان, 5,9% – موڭعوليادان, 5,2% – تۇرىكمەنستاننان, 2,9% – رەسەيدەن جانە 1,2% باسقا ەلدەردەن كەلگەن.
2024 جىلعى 1 قازانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 57,6%-دى, ەڭبەككە قابىلەتتى جاستان كىشى 33,1%-دى جانە زەينەتكەرلەر 9,3%-دى قۇراعان. ال ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 17,9%-ى جوعارى ءبىلىمدى, 24,4%-ى ورتا كاسىبي ءبىلىمدى, 54,4%-ى جالپى ورتا ءبىلىمدى, جانە 3,3%-ىندا ءبىلىمى جوق.
«قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى. سونىمەن بىرگە قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارى. قونىستاندىرۋ وڭىرلەرىندە 2024 جىلعا ارنالعان قانداستاردى قابىلداۋ كۆوتاسى 3 033 ادامدى قۇرايدى. 2024 جىلعى 1 قازانداعى جاعداي بويىنشا قونىستاندىرۋ وڭىرلەرىنە 2 477 قانداس قونىس اۋداردى», دەلىنگەن مينيسترلىك حابارلاماسىندا.
ايتا كەتەيىك, جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى: ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە.
سونىمەن قاتار جىل باسىنان بەرى 2140 قانداسقا ءتۇرلى قولداۋ شارالارى كورسەتىلگەن. اتاپ ايتقاندا, 575 ادام تۇراقتى جۇمىسقا ورنالاستىرىلعان.
