فوتو: aikyn.kz
مينيسترلىكتىڭ حابارلاۋىنشا, ۋچاسكەلىك دارىگەرلەر ونىڭ دەنساۋلىعىنىڭ يندەكسىن انىقتاۋ ءۇشىن فەرتيلدىك جاستاعى ءاربىر ايەلدى تەكسەرەدى. سونداي-اق جۇكتىلىكتى جوسپارلايتىن ايەلدەر, جاس قىزدار مەن جاسوسپىرىمدەر ەرەكشە باقىلاۋدا بولادى.
قاۋىپسىز جۇكتىلىكتى قامتاماسىز ەتۋ ءۇشىن ساۋىقتىرۋ شارالارى جۇكتىلىك باستالعانعا دەيىن گراۆيدارالدى دايارلىق تۇرىندە جۇرگىزىلەدى. گراۆيدارالدى دايارلىق - دەنساۋلىق جاعدايىن باعالاۋعا جانە ەرلى-زايىپتىلاردى بالا كوتەرۋگە, كەيىننەن جۇكتىلىككە جانە ساۋ بالانىڭ تۋىنا دايارلاۋعا باعىتتالعان دياگنوستيكالىق, پروفيلاكتيكالىق جانە ەمدەۋ ءىس-شارالارىنىڭ كەشەنى.
«ەلىمىزدىڭ ءاربىر ايەلى جاس كەزىنەن باستاپ ۋاقتىلى جانە ساپالى مەديتسينالىق كومەك الۋى ماڭىزدى. ەلىمىزدىڭ ءاربىر ايەلىن ەمحاناعا بارىپ, جۇكتىلىكتى جوسپارلاۋ الدىندا تەكسەرۋدەن وتۋگە شاقىرامىز. بۇگىنگى تاڭدا ءبىزدىڭ ەلدە 10 ميلليوننان استام ايەل تۇرادى, ونىڭ 4,7 ميلليونى - فەرتيلدىك جاستاعى ايەل. ولار وتباسىلاردا ورتالىق ءرول اتقارادى. ايەلدەر دەنساۋلىعىن ساقتاۋ جانە نىعايتۋ - ءبىزدىڭ تۇراقتى الەۋمەتتىك-دەموگرافيالىق دامۋىمىزدىڭ نەگىزى», دەلىنگەن حابارلامادا.
