وڭىرلىك كوممۋنيكاتسيا قىزمەتى ورتالىعىندا وتكەن ءباسپاسوز جيىنىندا باعدارلامانىڭ بيىلعى شارتى, تالابى, ماقساتى جونىندە ايتىلدى.
«اتالعان باعدارلاما ءوڭىردىڭ بارلىق قالالارى مەن اۋداندارىندا ءتۇرلى سالادا ەڭبەك ەتىپ جۇرگەن 34 جاسقا دەيىنگى جاس ماماندارعا ارنالعان. وتىنىمدەر 21 قازاننان باستاپ 1 قاراشاعا دەيىن قابىلدانادى. ۇمىتكەردىڭ كەم دەگەندە ءبىر جەردە التى ايلىق جۇمىس ءوتىلى جانە وبلىس اۋماعىندا تىركەلگەن تۇراقتى مەكەنجايى بولۋى كەرەك. باعدارلاماعا وتباسى مۇشەلەرىنىڭ بىرەۋى عانا قاتىسا الادى. قاتىسىپ جاتقان ۇمىتكەرلەردى ارنايى كوميسسيا انىقتايدى. قاتىسۋشىلاردى ىرىكتەۋ اشىق تۇردە وتەدى, ول كونكۋرستىق كوميسسيا وتىرىسىندا بالدىق ءجۇي بويىنشا جۇرگىزىلەدى. ۇمىتكەرلەر بىردەي ۇپاي جيناعان جاعدايدا, جاسى ۇلكەن قاتىسۋشىعا ارتىقشىلىق بەرىلەدى», دەيدى وبلىستىق قوعامدىق دامۋ باسقارماسى باسشىسىنىڭ ورىنباسارى اسەل قۇلماعامبەت.
«وتباسى بانك» اق قوستاناي فيليالىنىڭ ديرەكتورى اسەل اسقاروۆانىڭ ايتۋىنشا, اتالعان باعدارلاما اياسىندا جاس كاسىپكەرلەرگە دە قولجەتىمدى باسپانا الۋ مۇمكىندىگى بەرىلىپ وتىر.
«باعدارلاماعا قاتىسۋشىلاردىڭ ايلىق تابىسى دا ەسكەرىلەدى. مىسالى, ەرلى-زايىپتىلاردىڭ, ولارمەن بىرگە تۇراتىن اتا-اناسىنىڭ سوڭعى جارتى جىلدىق تابىسىن التى ايعا شاققاندا اي سايىن 150 اەك-تەن, ياعني 553 مىڭ 800 تەڭگەدەن اسپاۋعا ءتيىس. سونىمەن قاتار ءوتىنىم بەرۋشىنىڭ باسىندا سوڭعى بەس جىل ىشىندە تىركەلگەن باسپاناسى بولماۋى كەرەك», دەيدى فيليال باسشىسى.
جالپى, «قوستاناي جاستارى» وڭىرلىك تۇرعىن ءۇي باعدارلاماسى اياسىندا ءار سالادا قاراپايىم ەڭبەك ەتىپ جۇرگەن كوپتەگەن جاس وتباسىنىڭ جايلى باسپاناعا قول جەتكىزىپ جاتقانى قۋانتادى. ايلىعى اسىپ-تاسىپ بارا جاتپاسا دا, وبلىس اكىمدىگى مەن «وتباسى بانكتىڭ» ۇتىمدى شەشىمىنىڭ ناتيجەسىندە قىسقا مەرزىم ىشىندە ء«وز ءۇيى – ولەڭ توسەگىنە» قول جەتكىزىپ, باسپانا قۋانىشىنا كەنەلىپ جاتقان قاراپايىم ەڭبەك جاستارى كوپ. سونىڭ ءبىرى – وبلىستىق جەدەل جاردەم كولىگىنىڭ جۇرگىزۋشىسى باقىتبەك دوسماعۇلوۆ.
ء«بىراز جىل پاتەر جالداپ كەلدىك. «قوستاناي جاستارى» باعدارلاماسى شىقتى دەگەندى ەستىپ, قۇجاتتارىمدى جيناپ, قالالىق اكىمدىكتىڭ جانىنا جۇمىس ىستەيتىن «Ikomek» ورتالىعىنا بارىپ كەزەككە تۇردىم. جارتى اي وتپەي, ء«سىز اتالعان باعدارلاما بويىنشا كونكۋرستان ءوتتىڭىز» دەگەن حابار الدىق. وسىلايشا, 7 جىلعا 5 پايىزدىق جىلدىق سىياقىمەن (جتسم 5,2% باستاپ 5,5% دەيىن) نەسيە الىپ, ءۇش بولمەلى پاتەر الدىق. «وتباسى بانكىندە» 1 ملن 500 مىڭ تەڭگە دەپوزيتىمىز بار ەدى, ونى باستاپقى جارنا رەتىندە كادەگە جاراتتىق. نەسيە شارتى باسقا باعدارلامالارعا قاراعاندا كوپ جەڭىل. ءۇش بالامىز بار. ۇشەۋى دە ءۇيدىڭ جانىنداعى مەكتەپكە بارىپ ءجۇر. ەڭ باستىسى, بۇرىن ءوزىمىز جالداپ تۇرىپ جاتقان پاتەردىڭ اقىسىنا كەتەتىن قارجىنى, ءوز مەنشىگىمىزدەگى ءۇيدىڭ قارىزىن جابۋعا جۇمساپ جاتىرمىز», دەيدى باقىتبەك.
اتالعان باعدارلامانىڭ شاراپاتىن قالا جاستارىمەن قاتار, اۋىلدا تۇرىپ جاتقان جاس وتباسىلار دا كورىپ وتىرعانىن ايتپاي كەتۋگە بولماس. مىسالى, قوستاناي اۋدانىنداعى وزەرنىي اۋىلىنىڭ ۋچاسكەلىك مەدبيكەسى ليۋبوۆ بۋتەنكو وسى «قوستاناي جاستارى» باعدارلاماسى ارقىلى اۋدان ورتالىعىنان ءۇش بولمەلى پاتەر ساتىپ الىپ وتىر.
«باسقا يپوتەكالىق باعدارلامالارعا قاتىسۋ ءۇشىن پاتەر قۇنىنىڭ 50 پايىزىن جيناۋ كەرەك. ال ءبىز 10-اق پايىز باستاپقى جارنا جينادىق. نەسيە پايىزى كوپ ەمەس, 5-اق پايىز بولادى (جتسم 5,2% باستاپ 5,5% دەيىن). ءبىر-ەكى جىلدان كەيىن 2 پايىزعا تۇسەدى. بۇل – ءبىز سياقتى قاراپايىم وتباسىلار ءۇشىن وتە قولايلى باعدارلاما», دەيدى ل.بۋتەنكو.
«قوستاناي جاستارى» باعدارلاماسى اياسىندا وڭىردە 2022 جىلى – 49 وتباسى, 2023 جىلى 159 وتباسى باسپانالى بولعان. بيىل تاعى 127 جاس وتباسى قونىس تويىن اتاپ وتەدى.
ء«بىز كۆوتا بولگەندە, قالالار مەن اۋىلدا تۇرىپ جاتقان جاستاردىڭ سانى جونىندەگى ستاتيستيكالىق مالىمەتكە سۇيەنەمىز. بىلتىر 140 ادامعا كۆوتا بولگەنبىز, بىراق 159 ادام باسپانالى بولدى. بيىل 127 ادام دەپ ەسەپتەپ وتىرمىز. بىراق جاڭا باسپاناعا قول جەتكىزگەن جاس وتباسىلاردىڭ سانى ودان دا كوپ بولۋى مۇمكىن», دەيدى وبلىستىق قوعامدىق دامۋ باسقارماسىنىڭ ورىنباسارى اسەل قۇلماعامبەت.
قوستاناي وبلىسى
