ءىس-شارا اباي وبلىسىندا 2023 جىلدىڭ جازىندا بولعان الاپات ءورت كەزىندە قازا تاپقان 15 ورمانشىنى ءبىر مينۋت ۇنسىزدىكپەن ەسكە الۋمەن باستالدى. بۇل وقيعا ورمانشىلاردىڭ تابيعاتتى قورعاۋداعى كۇردەلى مىندەتتەرىن, قاۋىپ-قاتەرمەن بەتپە-بەت كەلەتىن اۋىر ەڭبەكتەرىن تاعى ءبىر رەت ەسكە سالدى.
جيىنعا جەرگىلىكتى بيلىك وكىلدەرى, قوعام قايراتكەرلەرى مەن ورمان شارۋاشىلىعى ارداگەرلەرى قاتىستى. قازاقستاننىڭ ەكولوگيالىق الەۋەتىن ارتتىرۋعا ءوز ۇلەسىن قوسىپ جۇرگەن مامانداردىڭ ەڭبەگى اتاپ ءوتىلدى. ورمان شارۋاشىلىعى قىزمەتكەرلەرىنىڭ كۇنى 2017 جىلدان بەرى اتالىپ كەلەدى جانە بۇل مەرەكە – تابيعات قورعاۋشىلارىنىڭ ەڭبەگىنە دەگەن قۇرمەتتىڭ ايعاعى.
سالتاناتتى جيىندا اباي وبلىسى بويىنشا ورمان شارۋاشىلىعى جانە جانۋارلار دۇنيەسى كوميتەتى باسشىسىنىڭ مىندەتىن اتقارۋشى ەۆگەني سۋرگۋتانوۆ قۇتتىقتاۋ ءسوز سويلەپ, ورمانشىلاردىڭ قىزمەتىنە جوعارى باعا بەردى.
«قۇرمەتتى ورمان شارۋاشىلىعى قىزمەتكەرلەرى مەن ارداگەرلەرى! سىزدەردىڭ ەڭبەكتەرىڭىز تەك ەكولوگيالىق ەمەس, ەكونوميكالىق تۇراقتىلىقتى دا قامتاماسىز ەتەدى. قيىن جاعدايلارعا قاراماستان, سىزدەر ورماندى قالپىنا كەلتىرىپ, تابيعاتتى قورعاۋدان تالمايسىزدار, راسىمەن دە قۇرمەتكە لايىقتىسىزدار. سىزدەرگە دەنساۋلىق, كۇش-قۋات جانە ەڭبەكتەرىڭىزدە تابىس تىلەيمىن», دەدى ەۆگەني سۋرگۋتانوۆ.
رەسمي بولىمنەن كەيىن ەڭبەگىمەن ەرەكشە كوزگە تۇسكەن ورمانشىلارعا قۇرمەت گراموتالارى مەن العىس حاتتار تابىستالدى. ولاردىڭ ەرتىس ءوڭىرىنىڭ قاراعايلى ورمانىن قالپىنا كەلتىرۋگە قوسقان ۇلەستەرى جوعارى باعالاندى. ءىس-شارانىڭ سالتاناتتى بولىگى كونتسەرتتىك باعدارلامامەن اياقتالدى.
