فوتو: who.int
جان كاسەيانىڭ مالىمەتىنشە, سوڭعى ءبىر اپتادا وسى ىندەتتەن 50 ادام قايتىس بولعان. سونداي-اق ول جاعدايدىڭ باقىلاۋدان شىعىپ بارا جاتقانىن ايتىپ, حالىقارالىق سەرىكتەستەردى كومەككە شاقىردى.
ء«بىز بۇل ىندەتپەن كۇرەسۋدى جالعاستىرىپ جاتىرمىز جانە ونىڭ بارلىق افريكا ەلدەرىنە تارالۋىن قالامايمىز. ءبىز ءتيىمدى ارەكەت ەتۋ ءۇشىن ۋادەلەردى ناقتى قارجىلىق قۇرالدارعا تەز اينالدىرۋىمىز كەرەك», دەدى جان كاسەيا.
ايتا كەتەيىك, افريكانىڭ CDC جانە دۇنيەجۇزىلىك دەنساۋلىق ساقتاۋ ۇيىمى ۇسىنعان التى ايلىق جوسپاردىڭ بولجامدى بيۋدجەتى شامامەن 600 ميلليون دوللاردى قۇرايدى, ونىڭ 55% قازىردىڭ وزىندە بولىنگەن.
سونىمەن قاتار زامبيا مەن زيمبابۆە وسى اپتادا مايمىل شەشەگىن جۇقتىرۋ جاعدايلارىنىڭ بار ەكەنىن راستاعان, ال كەنيادا ۆيرۋستان العاشقى ءولىم تىركەلگەن. بۇل رەتتە رۋاندا مەن كونگو ەلدەرىندە ىندەتكە قارسى ۆاكتسيناتسيا باستالعان.
جىل باسىنان بەرى افريكادا مايمىل شەشەگىن جۇقتىرعانداردىڭ جالپى سانى 42 مىڭنان اسقان.
