ولجاس بەكتەنوۆ مەملەكەت باسشىسىنىڭ تاپسىرمالارىن جۇزەگە اسىرۋ اياسىندا ەكونوميكانى ءارتاراپتاندىرۋ شارالارى كۇشەيتىلگەنىن اتاپ ءوتتى:
– ەسەپتى كەزەڭدە شيكىزاتتىق ەمەس سەكتوردى دامىتۋ ناتيجەسىندە ىشكى جالپى ءونىمنىڭ ءوسىمى 4 پايىزدى قۇراعان. ەڭ جوعارى ءوسىمدى اۋىل شارۋاشىلىعى (11,4%), قۇرىلىس (10,1%), كولىك (8%), بايلانىس (6,4%), ساۋدا (6,3%), وڭدەۋ ونەركاسىبى (4,8%) سالالارى كورسەتكەن. 14 وڭىردە وڭدەۋ ونەركاسىبىندەگى ءوندىرىس كولەمى ارتقان;
– بيىلعى قاڭتار-تامىز ايلارىندا سىرتقى تاۋار اينالىمى 91,7 ميلليارد دوللاردى قۇراعان, ونىڭ ىشىندە ەكسپورتتىڭ ۇلەسى 3,3 پايىزعا كوبەيگەن. وڭ ساۋدا بالانسى 34,8 پايىزعا ءوسىپ, 15,4 ميلليارد دوللارعا جەتكەن;
– ەل بيۋدجەتىنە 14,9 تريلليون تەڭگە تۇسكەن.
ۇكىمەت باسشىسى سونىمەن قاتار زاڭسىز يەلەنگەن اكتيۆتەردى قايتارۋ جونىندەگى تاپسىرمالارىنىڭ ورىندالۋ بارىسىنا توقتالدى:
– جىل باسىنان بەرى كوميسسيا 450 ميلليارد تەڭگەگە جۋىق اكتيۆتەردى قايتارۋ جونىندەگى كەلىسىمدەردى ماقۇلداعان; – بۇگىندە مەملەكەتكە 265 ميلليارد تەڭگەنى قۇرايتىن اكتيۆتەر, سونىڭ ىشىندە اقشالاي 177 ميلليارد تەڭگە قايتارىلعان. بارلىق قايتارىلعان قاراجات الەۋمەتتىك ماڭىزى زور جوبالارعا جۇمسالىپ جاتىر;
– «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭنىڭ سۋبەكتىلەرى بىرقاتار جوبالاردى, اتاپ ايتقاندا, مۇقتاج ادامداردى وڭالتۋ جانە الەۋمەتتەندىرۋ باعدارلامالارىن, مادەني-ءبىلىم بەرۋ ورتالىعى مەن سپورتتىق مانەج قۇرىلىسىن قارجىلاندىرۋدى باستاعان;
يسلامابادتا وتكەن شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەت باسشىلارى كەڭەسى وتىرىسىنىڭ قورىتىندىسى جونىندە باياندادى.
پرەزيدەنت ۇكىمەتتىڭ جۇمىسىن جانداندىرۋ قاجەت ەكەنىن اتاپ ءوتتى. بۇل رەتتە ەل ەكونوميكاسىن ءارتاراپتاندىرۋ ارقىلى ونىڭ تۇراقتى ءوسىمىن قامتاماسىز ەتۋ, شاعىن جانە ورتا بيزنەستى قولداۋ, اگروونەركاسىپ كەشەنىندە يننوۆاتسيانى دامىتۋ, ءىرى يندۋستريالدىق جانە ينفراقۇرىلىمدىق جوبالاردى جۇزەگە اسىرۋ شارالارىن جالعاستىرۋدى تاپسىردى.
