سۋرەتتى تۇسىرگەن – جۇماباي مۇسابەكوۆ
اۋىلدان چەمپيوندار شىعارامىز دەسەك, وسىنداي سپورت نىساندارىنىڭ كوپتەپ اشىلۋى ماڭىزدى. جەتىسۋ وبلىسى قۇرىلعالى ونداعان سپورت كەشەنى بوي كوتەرگەن. ونىڭ باسىم بولىگى اۋىلداردا ورنالاسقان. وبلىس اكىمى بەيبىت يساباەۆ اۋىل حالقىنىڭ الەۋمەتتىك دەڭگەيىن عانا كوتەرىپ قويماي, سپورت, ءبىلىم سالاسىندا دا باسەكەگە قابىلەتتى بولۋىن كوزدەپ وتىر. ونىڭ ۇستىنە بولاشاعى جوق ەلدى مەكەندەردىڭ سانى كۇننەن-كۇنگە ارتىپ كەلەدى. بۇل تۇيتكىلدىڭ الدىن الۋدا دا وسىنداي قادامداردىڭ ءرولى جوعارى.
ء«وڭىر اگرارلى بولعانىمەن, باسقا دا سالالاردى ۇمىت قالدىرۋعا بولمايدى. اسىرەسە سپورتقا قۇمار اۋىل بالالارىنىڭ بوس ۋاقىتىندا نە ىستەيتىنى ماڭىزدى. كۇش-قۋاتىن وسىنداي سپورت كەشەندەرىندە جۇمساپ, ەرتەڭ ەلىمىزدىڭ تۋىن كوككە كوتەرسە يگى. وسى رەتتە وبلىس اكىمدىگىنىڭ باستاماسىنا كوڭىل قۋانادى», دەيدى اۋىل تۇرعىنى اسكەربەك ايتمۇحامبەت.
وبلىس اكىمى ءباسپاسوز قىزمەتىنىڭ مالىمەتىنشە, بيىل وبلىستا 17 جاڭا سپورت نىسانىنىڭ قۇرىلىسىنا 4 ملرد تەڭگەدەن استام قارجى بولىنگەن. سونىڭ ىشىندە المالىداعى سپورت كەشەنى – بيىل پايدالانۋعا بەرىلىپ وتىرعان التىنشى نىسان. جاڭا سپورت كەشەنىندەگى ۆولەيبول, باسكەتبول, كۇرەس, بوكس زالدارى, شاحمات, توعىزقۇمالاق ۇيىرمەلەرىنە ارنالعان بولمەلەر بارلىق قاجەتتى قۇرال-جابدىقتارمەن قامتىلعان. سول سياقتى كيىم ىلەتىن, جۋىناتىن ورىندار قاراستىرىلعان. اۋلاسىندا شاعىن فۋتبول, باسكەتبول, ۆولەيبول الاڭدارى بار. نىسان 50 ورىنعا لايىقتالعان. بۇل جاڭالىققا اۋىل تۇرعىندارى دا ءدان ريزا.
ء«بىزدىڭ اۋىل اۋەلدەن سپورتقا جاقىن. كەزىندە ءبىزدىڭ وڭىردەن ابىلسەيىت ايحانوۆ, امانجول بۇعىباەۆ سياقتى اتاقتى پالۋاندار شىققان. مەملەكەتتىڭ وسىنداي قولداۋىنان كەيىن سونداي داڭقتى سپورتشىلاردىڭ جولىن جالعايتىن جاستارىمىز اۋىلىمىزدان كوپتەپ شىعاتىنىنا سەنەمىن», دەيدى اۋىل تۇرعىنى زاعيليا بالابەكوۆا.
اۋىلداعى سپورتتىق سەكتسياعا قاتىسۋشى جاس سپورتشىلاردىڭ ءبىرى دارحان نۇراحمەت تە پىكىر ءبولىستى: «بۇعان دەيىن جاتتىقتىرۋشىمىز اۋىلىمىزدان 3 شاقىرىم قاشىقتىقتاعى اۋدان ورتالىعىنا ءبىزدى ءوز كولىگىمەن جاتتىعۋعا اپارىپ جۇرگەن. قىستاعى سۋىقتا بارىپ-كەلۋ قيىن بولاتىن. ەندى الىسقا بارماي-اق ءوز اۋىلىمىزدا جاتتىعاتىنىمىزعا قاتتى قۋانىپ وتىرمىز. اۋىلىمىزدا سالىنعان سپورت كەشەنىندە بۇدان بىلاي تۇراقتى دايىندالا الامىز», دەيدى جاس بالۋان.
ايتا كەتەلىك, سارقان اۋدانىنا قاراستى المالى اۋىلىنداعى جالپى اۋماعى 1 343 شارشى مەتر بولاتىن بۇل سپورت كەشەنىنىڭ قۇرىلىسى وتكەن جىلى باستالعان ەدى. قىركۇيەك ايىنىڭ سوڭىندا سارقان اۋدانىنىڭ باقالى اۋىلىندا دا اۋماعى 3 200 شارشى مەترلىك جاڭا ستاديون پايدالانۋعا بەرىلدى.
جەتىسۋ وبلىسى
