«ۇمىتتەن» قولداۋ تاپقان كاسىپكەر
ناتاليا اماننىڭ قوستانايدا بىرنەشە جەكەمەنشىك بالاباقشاسى بار. «دامۋدىڭ» دەمەۋىمەن تاياۋدا تاعى ءبىر بالالار كلۋبىن اشتى. بۇگىندە «ليا پەرلا» جشس-عا قاراستى ءۇش بوبەكجايعا 170-كە جۋىق بالدىرعان بارىپ ءجۇر.
«العاشقى فيليالدى 2014 جىلى اشتىق. قازىر التىنسارين جانە ءال-فارابي كوشەلەرىنىڭ بويىندا ەكى بالاباقشامىز بار. بۇل – ءۇشىنشى فيليالىمىز. مۇندا 1 جاستان 4 جاسقا دەيىنگى بالالار تاربيە الادى. ماۋسىم ايىندا «دامۋ» كاسىپكەرلىكتى دامىتۋ قورىنىڭ» ء«ۇمىت» باعدارلاماسى ارقىلى 60 ملن تەڭگەنى جىلىنا 16,5%-بەن 7 جىل مەرزىمگە الدىق. بالالار ءتورت مەزگىل تاماقتانادى. جيھازدىڭ ءبارى ەكولوگيالىق تازا ءارى ساپالى اعاشتان جاسالعان. ءوز باسىم وسى جاعىنا باسا ءمان بەرەمىن. ارزان دۇنيەگە قىزىقپايمىز. ءبىز ءۇشىن بالالاردىڭ دەنساۋلىعى مەن تاربيە, ءبىلىم ساپاسىنىڭ دۇرىس بولعانى ماڭىزدى», دەيدى سەرىكتەستىك ديرەكتورى ناتاليا امان.
ناتاليا باسقاراتىن زاماناۋي بالاباقشالار جەلىسىندە بالانى جان-جاقتى دامىتۋ ساباقتارى, مەكتەپكە دەيىنگى بىرجىلدىق قارقىندى دايىندىق, مەكتەپكە دەيىنگى ەكىجىلدىق دايىندىق, ءتۇرلى تانىمدىق ۇيىرمەلەر مەن ءتىل ۇيرەتۋ, كەسكىندەمە ساباقتارى جۇمىس ىستەيدى.
بەيىمدەۋ ورتالىعى جاڭا عيماراتقا كىرەدى
باقىتگۇل وتەبەكوۆا باسشىلىق ەتەتىن توبىل قالاسىنداعى مەديتسينالىق وڭالتۋ ورتالىعى كۇندىز ءارى تاۋلىك بويى ەرەسەكتەر مەن بالالارعا وڭالتۋ قىزمەتىن كورسەتەدى. ورتالىق وسىدان ءبىراز جىل بۇرىن مىندەتتى مەديتسينالىق ساقتاندىرۋ قورىمەن تۇراقتى كەلىسىمشارتقا وتىرعاندىقتان, مۇندا كەلۋشىلەردىڭ ءبىرازىنا قىزمەت تەگىن ۇسىنىلادى.
«20 ملن تەڭگەگە جۋىق نەسيە قارجىسىنا جوعارى جيىلىكتى لازەر اپپاراتىن ساتىپ الدىق. بۇل روبوت لازەر دەپ تە اتالادى. ياعني باعدارلامانى تاڭداپ, ماماننىڭ كومەگىنسىز ەمدەلۋشى ءوزى ەم قابىلدايدى. ورتوپەديالىق ناۋقاسى بار ەمدەلۋشىلەرگە ارنالعان. بىزدە جاڭا, زاماناۋي قۇرىلعىلار جەتكىلىكتى. ماماندارىمىز ەلدىڭ جانە شەتەلدىڭ وزىق رەابيليتولوگتەرىنەن ءدارىس الىپ, ۇنەمى ءبىلىمىن جەتىلدىرەدى. ەم قابىلداۋشىلاردىڭ ەرەكشەلىگىن جانە ونىڭ فيزيكالىق مۇمكىندىگىن ەسكەرە وتىرىپ, ناۋقاستىڭ دەنساۋلىعىن قالپىنا كەلتىرۋدىڭ جەكە ستراتەگياسى تاڭدالادى. ورتالىقتا رەابيليتولوگ, نەۆروپاتولوگ, حيرۋرگ, تەراپەۆت, دەرماتولوگ, ۋدز, فيزيوتەراپيا, ماسساج جاساۋشى, فيزيوتەراپيا, كينەزو جانە مەحانوتەراپيا, فيتنەس جاتتىقتىرۋشى, پسيحولوگ, لوگوپەد ماماندار جۇمىس ىستەپ جاتىر», دەيدى ورتالىق ديرەكتورى ب.وتەبەكوۆا.
ورتالىق جىلىنا شامامەن 500-دەن اسا ادامدى قابىلدايدى. 12 ورىندىق ستاتسيونار, 30 ورىندىق كۇندىزگى ستاتسيونار تاۋلىك بويى جۇمىس ىستەيدى. كۇنارا كەلىپ ارنايى ماماننىڭ كومەگىمەن 1-2 ساعات جاتتىعۋ جاساپ, ەم-دوم الىپ كەتەتىندەر دە كوپ. مىسالى, ورتالىق مامانى نۇرلان ساپا ناۋقاستاردى «Redcord» دەپ اتالاتىن اسپالى قۇرىلعىمەن ەمدەيدى.
«بۇل قۇرىلعى قىسىلعان بۇلشىق ەتتى بوساڭسىتۋعا ارنالعان. قانداي دا ءبىر جاراقات العان ادامنىڭ جانسىزدانعان بۇلشىق ەتىنە قان جۇگىرتىپ, قاتايتۋ ءۇشىن دە پايدالانامىز. قۇرىلعى ەمدەلۋشىنىڭ بۇلشىق ەتىن تەرەڭىرەك ەمدەپ, قالپىنا كەلتىرۋگە مۇمكىندىك بەرەدى», دەيدى مامان.
شاعىن جانە ورتا بيزنەستى قولداۋعا – 20 ملرد تەڭگە
«دامۋ» قورىنىڭ وبلىستىق فيليالى ديرەكتورىنىڭ ورىنباسارى ەلەنا ماتۆەەۆانىڭ ايتۋىنشا, بيىل قوستاناي وبلىسىنىڭ شاعىن, ورتا كاسىپورىندارى ۇسىنعان 787 جوباعا 20,61 ملرد تەڭگە كولەمىندە قارجىلاي قولداۋ كورسەتىلدى. 407 جوباعا 6,93 ملرد تەڭگەگە سۋبسيديا, 380 جوباعا 13,68 ملرد تەڭگەگە كەپىلدىك بەرىلدى. 167 جوبا جەڭىلدىكپەن 109,6 ملرد تەڭگە نەسيە العان.
«سۋبسيديانىڭ ءتيىمدى تۇسى – مەملەكەت كاسىپكەر نەسيەسىنىڭ پايىزىن ازايتادى. ناتيجەسىندە, كاسىپكەر ۇنەمدەلگەن قاراجاتتى ءىسىن دامىتۋعا جۇمساي الادى. بيزنەس اشقىسى نەمەسە كاسىبىن كەڭەيتكىسى كەلگەن كاسىپكەردىڭ مۇلكى نەسيە الاردا بانك كەپىلدىككە سۇراعان تالاپقا ساي كەلمەسە, وعان قوردىڭ كەپىلدىگى كومەكتەسەدى. بيىل ماۋسىم ايىنان باستاپ «دامۋ» قورى اگروونەركاسىپ سەكتورى جوبالارىنا, ونىڭ ىشىندە «كەڭ دالا 2» جاڭا باعدارلاماسى اياسىندا كوكتەمگى ەگىس جانە ەگىن جيناۋ جۇمىستارىنا نەسيە الاتىن كاسىپكەرلەرگە كەپىلدىك بەرە باستادى. كەپىلدىك كەپىلمۇلكى از كاسىپكەردىڭ جىلىنا 5%-دىق نەسيەسىنە بەرىلەدى. قوستاناي وبلىسىندا باعدارلاما جۇزەگە اسىرىلا باستالعالى بەرى جالپى نەسيە سوماسى 20,49 ملرد تەڭگە بولاتىن 39 جوبا قولداۋ الدى. «دامۋ» قورى ۇلتتىق دامۋ ينستيتۋتى بولعاندىقتان, بارلىق وڭىردەگى شاعىن جانە ورتا بيزنەستىڭ ساپالى دامۋىنا جاردەمدەسەدى. بۇل – ەكونوميكاعا ايتارلىقتاي سەرپىن بەرەدى», دەيدى فيليال باسشىسىنىڭ ورىنباسارى.
2010-2023 جىلدار ارالىعىندا مەملەكەتتەن قولداۋ العان كاسىپكەرلەر 7,7 مىڭ جاڭا جۇمىس ورنىن اشىپ, بيۋدجەتكە 388 ملرد تەڭگە سالىق تولەگەن. سونداي-اق جىل اياعىنا تامان «بيزنەس-كومەك» اتتى وڭىرلىك باعدارلاما ىسكە قوسىلدى. باعدارلاما شارتى بويىنشا قوستاناي وبلىسىنىڭ ارقالىق قالاسى, امانگەلدى مەن جانگەلدى اۋداندارى اۋماعىندا تىركەلگەن كاسىپكەرلەر 1 پايىزدىق جەڭىلدەتىلگەن نەسيە الا الادى. باعدارلاما جۇزەگە اسىرىلا باستالعالى, جالپى سوماسى 703,8 ملن تەڭگە بولاتىن 16 سۋبسيديا شارتىنا قول قويىلعان.
«پرەزيدەنت جولداۋدا ء«ار كاسىپكەر قولداۋدىڭ قانداي ءتۇرى بار جانە وعان قالاي قول جەتكىزە الاتىنىن ەش قيىندىقسىز ءبىلىپ وتىرۋى قاجەت» دەگەن ەدى. مەملەكەت باسشىسى 2029 جىلعا قاراي ورتا بيزنەستىڭ ەل ەكونوميكاسىنداعى ۇلەسى 15 پايىزعا جەتۋى كەرەك دەگەن مىندەت قويىپ وتىر. ءبىز وسىعان وراي, كاسىپكەرلىكتى قولداۋدىڭ مەملەكەتتىك باعدارلامالارىن كەڭىرەك ناسيحاتتاۋدى كوزدەيمىز», دەيدى ە.ماتۆەەۆا.
قوستاناي وبلىسى
