تاراز قالاسىنىڭ اكىمى باقىتجان ورىنبەكوۆتىڭ ايتۋىنشا, وبلىس ورتالىعىندا جاڭا جۇمىس ورىندارىن قۇرۋ باعىتىندا اۋىز تولتىرىپ ايتارلىقتاي جۇمىس اتقارىلىپ جاتىر. قالا بيلىگى تۇرعىنداردى جۇمىسپەن قامتۋ ماقساتىندا جاڭا ءوندىرىس ورىندارىن اشۋدىڭ ماڭىزى زور ەكەنىن العا تارتادى.
جەرگىلىكتى اتقارۋشى بيلىك قالا ەكونوميكاسىنىڭ تۇراقتى ءوسىمىن قامتاماسىز ەتۋ ماقساتىندا ينۆەستيتسيا تارتۋعا باسىمدىق بەرىپ وتىرعانىن ايتا كەتكەن ءجون. ب.ورىنبەكوۆتىڭ ايتۋىنشا, الداعى ۋاقىتتا جالپى قۇنى 34,7 ملرد تەڭگەنى قۇرايتىن 5 ينۆەستيتسيالىق جوبانى ىسكە اسىرۋ جوسپارلانعان. قولعا الىنعان جوبالاردى جۇزەگە اسىرۋ ارقىلى 944 جاڭا جۇمىس ورنىن اشۋ كوزدەلگەن.
بىرەر كۇن بۇرىن تاراز قالاسىندا «الەل اگرو» اكتسيونەرلىك قوعامىنا قاراستى وندىرىستىك ينكۋباتور ىسكە قوسىلدى. دەرەككە جۇگىنسەك, وندىرىستىك ينكۋباتور جىلىنا 38 ميلليون بالاپان باسىپ شىعارۋعا قاۋقارلى ەكەن. ءوندىرىس وشاعى 50 ازاماتتى جۇمىسپەن قامتيدى.
«كەز كەلگەن مەملەكەتتىڭ الەۋمەتتىك الەۋەتى ارتۋىن ءبىرىنشى كەزەكتە ءوندىرىستى وركەندەتۋدىڭ ماڭىزى زور. ءبىر سوزبەن ايتقاندا, ەكونوميكالىق ءوسىمدى تۇراقتى قامتاماسىز ەتۋ دە جاڭا ءوندىرىس ورىندارىن اشىپ, ەكونوميكانىڭ ناقتى سەكتورىنا ينۆەستيتسيا تارتۋىمىز كەرەك. بۇل – مەملەكەتتىك ساياساتتىڭ باستى باسىمدىقتارىنىڭ ءبىرى. قازىر وسى باعىتتاعى ءىرى جوبالاردى جۇزەگە اسىرۋدا ناقتى جۇمىس اتقارىپ جاتىرمىز.
ەل بيلىگىنىڭ جان-جاقتى قولداۋىنىڭ ناتيجەسىندە وبلىس ورتالىعى تاراز قالاسى دا ينۆەستيتسيا يگىلىگىن سەزىنىپ وتىرعانىن اتاپ وتكەن ءجون. وبلىس ورتالىعىندا جالپى قۇنى 35 ميللياردقا جۋىق قارجىنى قۇرايتىن بىرنەشە ينۆەستيتسيالىق جوبا بار. بۇل جوبالار جۇزەگە اسىرىلعان كەزدە 944 جاڭا جۇمىس ورنى اشىلادى دەپ بولجاپ وتىرمىز.
بۇدان بولەك, جالپى قۇنى 48 ميلليارد تەڭگەنى قۇرايتىن 3 ينۆەستيتسيالىق جوبانى ىسكە اسىرۋعا قاتىستى ارنايى كەلىسسوزدەر جۇرگىزىلۋدە. بۇگىن ءوز جۇمىسىن باستاعان «الەل اگرو» اكتسيونەرلىك قوعامىنىڭ وبلىستىق فيليالى قالامىزداعى كاسىپكەرلىكتىڭ كوكجيەگىن كەڭەيتىپ, دامۋدىڭ جاڭا بەلەسىنە باستايدى دەگەن سەنىم زور», دەيدى تاراز قالاسىنىڭ اكىمى ب. ورىنبەكوۆ.
جوعارىدا ايتقانىمىزداي, جىلىنا 38 ميلليون بالاپان باسىپ شىعارۋعا قاۋقارلى ءوندىرىس وشاعىندا قىزمەتكەرلەردىڭ الاڭسىز جۇمىس ىستەۋىنە بارلىق جاعداي قاراستىرىلعان. قالالىق كاسىپكەرلىك ءبولىمى كەلتىرگەن دەرەككە جۇگىنسەك, جالپى قۇنى 2 ميلليارد 689 ميلليون تەڭگەنى قۇرايتىن ءوندىرىس ورنى زاماناۋي قۇرال-جابدىقتارمەن قامتاماسىز ەتىلگەن. ينكۋباتورعا قاجەتتى شيكىزات كومپانيانىڭ ىشكى ءوندىرىسى ارقىلى جۇزەگە اسىرىلادى.
جالپى العاندا, جەرگىلىكتى اتقارۋشى بيلىك قالادا جۇمىسسىزدىق دەڭگەيىن تومەندەتۋ ماقساتىندا اۋقىمدى جۇمىس اتقارىپ كەلەدى. ماسەلەن, وسى جىلدىڭ العاشقى 8 ايىنداعى قورىتىندى دەرەككە سەنسەك, جۇمىسسىزدىق دەڭگەيى وتكەن جىلمەن سالىستىرعاندا 0,8 پايىزعا تومەندەپتى. ستاتيستيكالىق كورسەتكىش قولعا الىنعان وزگە شارالاردان بولەك, قالاعا تارتىلعان ينۆەستيتسيا ەسەبىنەن دە جوعارىلاعانىن ايتا كەتكەن ءلازىم.
تاراز
