سوڭعى بىرنەشە جىل بەدەرىندە ءوڭىردىڭ ونداعان اۋىلىندا تۇراتىن قاراپايىم حالىق ءدال وسى «اۋىل اماناتى» جوباسىنىڭ پايداسىن كورگەنىنە ەشكىمنىڭ داۋى جوق. باستاپقىدا ءىرى قارا مال ءوسىرۋ ماقساتىندا جەڭىلدەتىلگەن پايىزبەن بەرىلەتىن نەسيەگە قول جەتكىزگەن اۋىل تۇرعىندارى كەيىن وزگە كاسىپكە دە بەت بۇرا باستادى. اتاكاسىپتى قولعا العاندار دا تولايىم تابىسقا قول جەتكىزە باستادى.
«پرەزيدەنت پارمەنىمەن ەلىمىزدىڭ ءار قيىرىندا جالعاسىپ جاتقان «اۋىل اماناتى» جوباسى ءوزىنىڭ تيىمدىلىگىن كورسەتكەنىنە ەشكىمنىڭ كۇمانى جوق. جەرگىلىكتى اۋىل شارۋاشىلىعى تاۋارىن وندىرۋشىلەردى جان-جاقتى قولداۋعا, اۋىل حالقىن كاسىپكەرلىككە تارتۋعا باعىتتالعان باعدارلامانىڭ شاراپاتىن كورىپ وتىرعان وتباسىلار جەتكىلىكتى. ولاردىڭ سانى جىل وتكەن سايىن ارتا تۇسەتىنى دە ءمالىم. ناتيجەسىندە, جاڭا جۇمىس ورىندارى پايدا بولىپ, اۋىل حالقىنىڭ تابىسى ەسەلەنە ءتۇستى. جوبا اياسىندا اتقارىلعان جۇمىس جەتكىلىكتى. 2023 جىلى 25,5 ملرد تەڭگە قاراجات قاراستىرىلعان بولاتىن. بولىنگەن قارجى ەسەبىنەن 4 076 جوبا ۋاقتىلى قارجىلاندىرىلدى. 51 اۋىلدىق وكرۋگ تۇرعىندارى باعدارلامانىڭ شاراپاتىن كوردى», دەيدى جامبىل وبلىسىنىڭ اكىمى ەربول قاراشوكەەۆ.
ءوڭىر باسشىسى كەلتىرگەن دەرەككە جۇگىنسەك, وتكەن جىلى جوبا اياسىندا نەسيە العاندار 152,2 مىڭ باس مال, 65 بىرلىك اۋىل شارۋاشىلىعى تەحنيكاسىن ساتىپ الىپتى.
راسىندا, اۋقىمدى جوبا اياسىندا جەڭىلدەتىلگەن پايىزبەن نەسيە العان ازاماتتار جەتكىلىكتى. وبلىس اكىمىنىڭ ورىنباسارى ءابىلحايىر تامابەكتىڭ ايتۋىنشا, وتكەن جىلى مال ساتىپ الۋعا نيەت بىلدىرگەن 4 012 اۋىل تۇرعىنىنىڭ ءوتىنىشى قاناعاتتاندىرىلعان. سونداي-اق جەكە كاسىبىن اشۋعا نيەتتەنگەن 43 ازاماتتىڭ جوباسى قارجىلاندىرىلىپتى. اتقارىلعان جۇمىستىڭ ناتيجەسىندە 4 152 جاڭا جۇمىس ورنى اشىلعان.
اۋىلدان ىرگەسىن الىستاتپاي, باياندى باستامانىڭ پايداسىن كورىپ وتىرعان وتباسىلار جەتكىلىكتى. ولاردىڭ دەنى مال الىپ, اتاكاسىپتى دامىتۋعا دەن قويعان. ماسەلەن, جۋالى اۋدانىنا قاراستى الاتاۋ اۋىلىنىڭ تۇرعىنى اسەمگۇل توقتاسىنوۆا كورشىلەس جامبىل اۋدانىنان 110 باس قوي ساتىپ العان ەكەن.
«قازىر قانداي دا ءبىر ءىستى باستايمىن, كاسىپ اشامىن دەگەن ازاماتقا مەملەكەت تاراپىنان ايتارلىقتاي قولداۋ كورسەتىلىپ جاتىر. «اۋىل اماناتى» باعدارلاماسى ارقىلى ءبىز دە نەسيە الىپ, اتاكاسىپتى جالعاستىرۋعا دەن قويدىق. قازاقتا «ەلدە بولسا, ەرىنگە تيەدى» دەگەن ءسوز بار. قىسقاسى, شامامىز كەلگەنشە ەڭبەكتەنىپ جاتىرمىز. ادال ەڭبەكپەن ناپاقاسىن ايىرامىن دەگەندەردە مۇمكىندىك مول. تەك نيەت كەرەك. سوندا عانا تابىستى بولاسىڭ», دەيدى ول.
ەرىنبەگەن ادامعا جۇمىس ىستەۋگە مۇمكىندىك جەتكىلىكتى. ءوڭىردىڭ ون اۋدانىنداعى «اۋىل اماناتى» باعدارلاماسىنا ەنگەن اۋىل تۇرعىندارىنىڭ بارلىعى دا وسىنى ايتىپ ءجۇر.
«وسى جىلدىڭ اياق تۇسىندا رەسپۋبليكالىق بيۋدجەتتەن 10,5 ملرد تەڭگە كولەمىندە قاراجات ءبولۋدى كۇتىپ وتىرمىز. بۇل قارجىعا كەم دەگەندە 1 200 جوبا قارجىلاندىرىلادى. الداعى ۋاقىتتا شاعىن ورتا بيزنەستى, ماسەلەن, قۇرىلىس, كونديتەرلىك, تىگىن تسەحتارىن, اۋىل شارۋاشىلىعى ونىمدەرىن قايتا وڭدەۋ مەن شاعىن تسەحتاردى دامىتۋدى قولعا الامىز. وسى باعىتتاردى قارجىلاندىرۋعا كوڭىل بولەمىز», دەيدى ءوڭىر باسشىسى.
جالپى, «اۋىل اماناتى» باعدارلاماسى اياسىندا 2,5 پايىزبەن جەكە كاسىپكەرلىك اشۋعا نيەت بىلدىرۋشىلەردىڭ 7 جىلعا دەيىنگى مەرزىمگە 9,5 ملن تەڭگەگە دەيىن نەسيە الۋعا مۇمكىندىگى بار. ال كووپەراتيۆتەرگە 29,2 ملن تەڭگە سوماسىندا نەسيە بەرىلەدى.
جامبىل وبلىسى
