فوتو: Olympic.kz
تاراز قالاسىنىڭ تۇرعىندارى رەفەرەندۋمعا بەلسەندى قاتىستى. قاراپايىم قازاق بالاسى رەتىندە ناۋقاننان مەن دە قالىس قالا المادىم. ويتكەنى ەل ەرتەڭى ءۇشىن جاسالىپ جاتقان كەز كەلگەن قادامعا ازامات رەتىندە ءۇن قاتۋىمىز كەرەك. تاڭداۋ جاساۋ – بورىشىمىز.
قالاي بولعان كۇندە دە پرەزيدەنت ەڭ وزەكتى ماسەلەنى حالىقپەن كەڭەسىپ, جۇرتتىڭ كوزقاراسىن ءبىلىپ بارىپ شەشۋگە بەل بۋعانى قۋانتادى. تاۋەلسىز ەلىمىزدىڭ بولاشاعى تالقىعا ءتۇسىپ جاتقان كەزدە ەلىن سىيلايتىن كەز كەلگەن ازامات سىرتتا وتىرىپ تون پىشپەسە كەرەك. ءاربىر ادام ءوزىنىڭ كونستيتۋتسيالىق قۇقىن پايدالانىپ, داۋىس بەرگەنى ءسوزسىز. ويتكەنى بارلىق وتانداسىمىزدىڭ تاڭداۋى مەملەكەت ءۇشىن ماڭىزدى.
جۇرەگى ەلىم دەپ سوققان ازاماتتىڭ بارلىعى رەفەرەندۋم ۋچاسكەسىنە باردى دەپ ويلايمىن. مەن دە مەكەنجايىم بويىنشا قالاداعى №41 مەكتەپتە ورنالاسقان №82 رەفەرەندۋم ۋچاسكەسىنە ارنايى بارىپ, ءوز تاڭداۋىمدى جاسادىم. تاۋەلسىز ەلىمىزدىڭ ەرتەڭى جارقىن, باياندى بولسىن.
ەلدوس سمەتوۆ,
پاريج وليمپياداسىنىڭ چەمپيونى
