فوتو: حالىق ءۇنى
ۆەدومستۆو مالىمەتىنشە, قىركۇيەك ايىندا Enbek.kz ەلەكتروندىق ەڭبەك بيرجاسىندا 136,6 مىڭ بوس جۇمىس ورنى ورنالاستىرىلعان, بۇل كورسەتكىش تامىز ايىمەن سالىستىرعاندا 4% - عا (4,9 مىڭ) ارتىق. بۇل رەتتە جۇمىس ىزدەۋشىلەردىڭ بەلسەندىلىگى تومەندەۋ ءۇردىسىن ساقتاپ قالعان, ياعني 122,5 مىڭ تۇيىندەمە جاريالانعان, بۇل تامىزعا قاراعاندا 5% - عا (6,4 مىڭ) از ەكەنىن بەلگىلى بولدى.
ايتا كەتەيىك, كادرلارعا سۇرانىستىڭ ايتارلىقتاي ءوسۋى كۇزگى-قىسقى جىلىتۋ ماۋسىمى مەن ونەركاسىپ, قۇرىلىس جانە كولىك جۇمىسشىلارى الدىنداعى جۇمىس كولەمىنىڭ ۇلعايۋىنا بايلانىستى.
سونىمەن قاتار ءبىلىم بەرۋ سالاسى ەڭ سۇرانىسقا يە سالا بولىپ قالا بەرەدى, سەبەبى ورنالاستىرىلعان بوس جۇمىس ورىندارىنىڭ ۇشتەن بىرىنەن استامىن دا وسى سالا (53,2 مىڭ) قۇراعان.
ءبىلىم بەرۋ سالاسىندا تاربيەشىلەر (2,7 مىڭ بوس جۇمىس ورنى), ماتەماتيكا مۇعالىمدەرى (2,1 مىڭ) جانە باستاۋىش سىنىپ مۇعالىمدەرى (2,1 مىڭ بوس جۇمىس ورنى) ۇلكەن سۇرانىسقا يە بولعان. ال, دەنساۋلىق ساقتاۋ سالاسىندا سانيتارلار (1,3 مىڭ بوس جۇمىس ورنى), مەدبيكەلەر (1,3 مىڭ) جانە جالپى پراكتيكا دارىگەرلەرى (604 بوس جۇمىس ورنى) اسا سۇرانىسقا يە.
«قىركۇيەك ايىندا جۇمىس بەرۋشىلەر كەلەسى ماماندارعا ەڭ جوعارى جالاقىنى ۇسىندى: باس قۇرىلىسشىلارعا – ايىنا 716 مىڭ تەڭگەدەن, اۆياتسيا سالاسىنداعى ينجەنەرلەرگە – 565 مىڭ تەڭگەدەن جانە تاۋ-كەن ونەركاسىبىندەگى قىزمەت باستىقتارىنا – 502 مىڭ تەڭگەدەن», دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى.
جۇمىس ىزدەۋشىلەر, ءوز كەزەگىندە, كەلەسى پوزيتسيالار ءۇشىن ەڭ جوعارى جالاقىنى سۇرادى: ءوندىرۋشى ونەركاسىپتىڭ قۇرىلىمدىق بولىمشەلەرىنىڭ باسشىلارى – 1,2 ملن تەڭگە, اقپارات جانە بايلانىس سالاسىنداعى باسشىلاردىڭ ورىنباسارلارى – 858 مىڭ تەڭگە, سونداي-اق كوممەرتسيالىق سەكتورداعى ماركەتينگ قىزمەتىنىڭ باسشىلارى – ايىنا 847 مىڭ تەڭگە.
