فوتو: senate.parlam.kz
پلاتفورمانى پايدالانۋشىلاردىڭ كوبەيىپ بارا جاتقانىن جانە ونىڭ ىشىندە جاسوسپىرىمدەردىڭ كوپتىگىن ايتقان دەپۋتات اتالعان پلاتفورما مازمۇنىنىڭ تەرىس اسەرىنە الاڭداۋشىلىق ءبىلدىرىپ, ماسەلە كوتەردى.
سەناتوردىڭ ايتۋىنشا, كەيبىر پايدالانۋشىلار TikTok-تى جاقسى ماقساتتا پايدالانىپ جاتسا دا, بۇل شولگە تامعان تامشىداي. ءبىلىم دەڭگەيىن ارتتىرۋ, تاريحتى زەردەلەۋ, ت.ب. دايەكتى تاقىرىپتارعا قىزىعۋشىلىق تانىتاتىندار وتە از.
دەپۋتاتتىڭ پىكىرىنشە, بالالاردىڭ پسيحيكاسى مەن جالپى دەنساۋلىعىنا تەرىس اسەر ەتەتىن, سونداي-اق كيبەرقاۋىپسىزدىك پەن دەرەكتەردىڭ قۇپيالىلىعىنا قاۋىپ توندىرەتىن بەينەكورىنىستەر پلاتفورمادا كەڭىنەن تارالىپ جاتىر. فرانتسيا, كانادا, قىرعىزستان سياقتى كوپتەگەن ەلدەر TikTok-تى پايدالانۋدى شەكتەۋ جونىندە شارالار قابىلداعان.
گەننادي شيپوۆسكيح بالالاردى قورعاۋ جانە ۇلتتىق قاۋىپسىزدىكتى نىعايتۋ ماقساتىندا بىرقاتار ۇسىنىس تاستادى.
«TikTok پلاتفورماسى ەكسترەميزمدى, راديكاليزمدى, سەپاراتيزمدى, شەكتەن تىس قاۋىپتى جانە مورالدىق قۇندىلىقتارعا قايشى كونتەنتتەردى انىقتاۋ جانە شەكتەۋ بويىنشا ناقتى الگوريتمدى ۇسىنۋى كەرەك. سونداي-اق TikTok پلاتفورماسى جاس بالالاردى ونلاين قاۋىپتى كونتەنتتەن قورعاۋ ماقساتىندا YouTube Kids سەكىلدى بالالارعا ارنالعان ارنايى جەلى ۇسىنۋى ءتيىس. 13 جاسقا تولماعان بالالاردىڭ TikTok-قا اتا-اناسىنىڭ تەلەفونىنان كىرگەن جاعدايدا FaceID تەحنولوگياسى ارقىلى بۇعاتتاۋ مەحانيزمىن قاراستىرۋ كەرەك. ولاي بولماعان جاعدايدا ەلىمىزدە TikTok پلاتفورماسىن بۇعاتتاۋدى سۇرايمىز. بۇل ماسەلەلەردىڭ شەشىمىن تابۋ ەل ازاماتتارىنىڭ دەنساۋلىعىن جانە مورالدىق قۇندىلىقتارىن ساقتاپ قالۋعا, سونداي-اق جاستار اراسىندا تارالىپ جاتقان قاۋىپتى ادەتتەردى ازايتۋعا باعىتتالعان قادام بولماق», دەدى سەناتور گەننادي شيپوۆسكيح.
