فوتو: ەنەرگەتيكا مينيسترلىگى
ەنەرگەتيكا مينيسترلىگىنىڭ مالىمەتىنشە, قازاقستاننىڭ بىرىڭعاي ەلەكتر ەنەرگەتيكالىق جۇيەسى رەسەي فەدەراتسياسىنىڭ جانە ورتالىق ازيا ەلدەرىنىڭ ەنەرگەتيكالىق جۇيەلەرىمەن قاتارلاس جۇمىسىن جالعاستىرا وتىرىپ, قالىپتى رەجيمدە جۇمىس ىستەيدى. 2024 جىلعا بەكىتىلگەن جوندەۋ كەستەسى اياسىندا 10 ەنەرگوبلوكتا, 55 قازاندىقتا جانە 45 تۋربينادا كۇردەلى جۇمىستار جوسپارلانعان.
قازىرگى تاڭدا 4 ەنەرگوبلوكتا, 22 قازاندىقتا جانە 16 تۋربينادا جوندەۋ جۇمىستارى جۇرگىزىلسە, 5 ەنەرگوبلوكتىڭ, 32 قازاندىقتىڭ جانە 28 تۋربينانىڭ جوندەۋ جۇمىستارى اياقتالعان.
«بارلىق ەلەكتر ستانتسيالارى جىلىتۋ ماۋسىمىنىڭ باستالۋىنا دايىن, نەگىزگى جابدىقتارمەن, سونىڭ ىشىندە قازاندىقتارمەن جانە تۋربينالارمەن قامتاماسىز ەتىلگەن. 2024 جىلى اەك-ءتىڭ (ەلەكتر جەلىلەرىن تاراتۋ كومپانيالارىنىڭ) ەلەكتر جەلىلەرىندە 20,8 مىڭ كم ەلەكتر بەرۋ جەلىلەرىن, 422 قوسالقى ستانتسيانى جانە 4054 تاراتۋ پۋنكتتەرى مەن ترانسفورماتورلىق قوسالقى ستانتسيالاردى جوندەۋ كوزدەلگەن. قازىردىڭ وزىندە 19,9 مىڭ كم ەلەكتر جەلىلەرى, 376 قوسالقى ستانتسيا جانە 4046 تاراتۋ پۋنكتى مەن ترانسفورماتورلىق قوسالقى ستانتسيالار جوندەلدى», دەلىنگەن حابارلامادا.
ايتا كەتەيىك, جىلۋمەن قامتۋ سالاسىندا 2024 جىلى 546 كم جىلۋ جەلىلەرىن كۇردەلى جوندەۋ جانە جاڭعىرتۋ جوسپارلانعان. قازىرگى ۋاقىتتا 516,3 كم جىلۋ جەلىلەرى جوندەلگەن, بۇل جىلدىق جوسپاردىڭ 94,6% قۇرايدى.
2024 جىلعى 11 قىركۇيەكتە كەزەكتى كەڭەس وتكىزىلگەن, ونىڭ قورىتىندىسى بويىنشا جوندەۋ جۇمىستارىن ۋاقىتىلى اياقتاۋ, وتىننىڭ نورماتيۆتىك قورىن ساقتاۋ جانە ەنەرگەتيكالىق جابدىقتاردى پايدالانۋدى باقىلاۋدى كۇشەيتۋ جونىندە تاپسىرمالار بەرىلگەن ەدى.
سونىمەن قاتار الداعى جىلىتۋ ماۋسىمىنا دايىندىق بارىسى 2024 جىلعى 20 تامىزداعى ۇكىمەت وتىرىسىندا تالقىلاندى. بارلىق ماسەلەلەر بويىنشا ءتيىستى شەشىمدەر قابىلدانعان.
