فوتو: Zakon.kz
سوڭعى ءۇش كۇندە ءۇش قىلمىستىق توپتىڭ زاڭسىز ارەكەتى توقتاتىلدى.
ماسەلەن, ورال قالاسىندا ۇيىمداسقان قىلمىسقا قارسى كۇرەس ءبولىنىسىنىڭ قىزمەتكەرلەرى وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە كورسەتىپ, زورلىق-زومبىلىقپەن وقۋ ورىندارىنىڭ ءبىرىنىڭ ستۋدەنتىنەن 500 مىڭ تەڭگە بوپسالاعان جەرگىلىكتى جاستار توبىن ۇستادى. كۇدىكتىلەر قاماۋعا الىندى.
ال شىمكەنتتە ەكى تۇرعىن ۇستالىپ, ۋاقىتشا ۇستاۋ يزولياتورىنا قامالدى. ۇستالعاندار جەرگىلىكتى تۇرعىننان ءبىر ميلليون تەڭگە بوپسالاپ, وعان قاتىستى اقپارات تاراتامىز دەپ قورقىتقان.
«اقتوبەدە ۇيىمداسقان قىلمىسقا قارسى كۇرەس ءبولىنىسىنىڭ قىزمەتكەرلەرى ءبىر ميلليون تەڭگە مەن Subaru اۆتوكولىگىن الۋ كەزىندە قىلمىستىق توپتىڭ مۇشەسىن ۇستادى. ول ءوزىنىڭ ءۇش سىبايلاسىمەن عيمارات جەرتولەسىندە جابىرلەنۋشىگە مورالدىق جانە فيزيكالىق قىسىم كورسەتىپ, 8 ميلليون تەڭگە بوپسالاعان. سوتقا دەيىنگى تەرگەۋ جۇرگىزىلىپ جاتىر. بوپسالاۋ فاكتىلەرىن انىقتاۋ جانە ولاردىڭ الدىن الۋ جۇمىستارى جالعاسادى», دەپ ءتۇسىندىردى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
