كەنتاۋدا بولعان ورتتەن 21 ادام زارداپ شەكتى

شىمكەنت. 15 ماۋسىم. كەنتاۋدا كوپ قاباتتى ۇيلەردىڭ بىرىندە ءورت شىعىپ, سالدارىنان 21 ادام زارداپ شەكتى. بۇل تۋرالى وڭتۇستىك قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابرلادى. اتالعان دەپارتامەنت تاراتقان مالىمەتكە سۇيەنسەك, 13 ماۋسىمدا ساعات تاڭەرتەڭگى 04:00-دە كوپ قاباتتى ءۇي وتقا ورانعان. ءتىلسىز جاۋ تەك ەكى ساعاتتان كەيىن ءوشىرىلدى. ءورت سالدارىنان 4 ادام جانساقتاۋ بولىمىنە ءتۇستى جانە ءبىر ادام حيرۋرگيالىق بولىمگە جاتقىزىلدى. سونداي-اق,16 ادام مەديتسينالىق كومەككە جۇگىنگەن. زارداپ شەككەندەردىڭ 12-ءسى بالا. 5 جانە 3 جاستاعى ەكى بالا ازداعان كۇيىكتەرمەن اۋرۋحانادا جاتىر. ال دارىگەرلەر بىرنەشە تاۋلىكتەن بەرى ەكى ادامنىڭ ءومىرىن اجالدان امان الىپ قالۋ ءۇشىن كۇرەسۋدە. «جاسى 67-دەگى ايەل مەن ونىڭ 8 جاستاعى نەمەرەسى كۇيىك شالىپ قانا قويماي, ءيىس تيگەن. ەكەۋى دە ەس-ءتۇسسىز جاتىر», – دەيدى كەنتاۋ قالالىق كلينيكالىق اۋرۋحانا دارىگەرلەرى. ءورتتى سوندىرۋگە 41 قۇتقارۋشى, ءاىىد 100 قىزمەتكەرى جۇمىلدىرىلدى, 6 جەدەل جاردەم بريگاداسى ءازىر تۇردى. ءۇش پاتەر تولىعىمەن ورتەنىپ كەتتى. جالىن 129 شارشى مەتردى قامتىدى. كەنتاۋ اكىمدىگى پاتەرلەردى جوندەۋگە كومەك بەرىپ, دەمەۋشىلەردى تارتۋعا ۋادە بەردى. وقيعا ورنىندا ارنايى كوميسسيا جۇمىس ىستەۋدە. جالىننىڭ تۇتانۋ سەبەپتەرى انىقتالۋدا. الدىن الا دەرەكتەر بويىنشا ءورت 3 قاباتتان شىققان. باقتيار تايجان. دەرەك, سۋرەت: egemen.kz.