بۇدان بىلاي گ.گولوۆكين حالىقارالىق فەدەراتسيانىڭ مارتەبەسىن نىعايتۋ ماقساتىندا اتقارىلاتىن جۇمىستاردىڭ اشىق جۇرگىزىلۋىنە, حالىقارالىق سپورتتىق ۇيىمدارمەن قاناتتاسا جۇمىس اتقارۋعا كۇش سالادى. كوميسسيا باسشىسىنا جۇكتەلگەن نەگىزگى مىندەت – بوكستىڭ وليمپيادا باعدارلاماسىنان سىزىلىپ قالماۋىنا كۇش سالىپ, حالىقارالىق وليمپيادا كوميتەتى مەن World Boxing اراسىنا التىن كوپىر ورناتۋ.
«ەلىمىزگە, بارشا سپورت الەمىنە بوكستى وليمپيادالىق سپورت ءتۇرى تەرىندە ساقتاپ قالۋ ماڭىزدى, بۇل مەنىڭ قىزمەتىمدەگى ەڭ باستى باسىمدىق بولماق. بوكس سپورتى وليمپيادالىق قۇندىلىقتارعا ساي ءادىل ءارى اشىق بولۋى ماقساتىندا حالىقارالىق وليمپيادا كوميتەتىمەن تىعىز ارىپتەستىك ورناتۋدى كوزدەپ وتىرمىن. مەنىڭ كاسىبي سپورتشى رەتىندە جيعان تاجىريبەم ۇيىم جۇمىسىن ءبىر جۇيەگە كەلتىرەرىنە سەنەمىن, كۇشىمىزدى بىرىكتىرە وتىرىپ بوكستىڭ دامۋىنا جاڭا سەرپىن بەرەمىز. وعان جەتۋ جولىندا اتقاراتىن شارۋا شاش ەتەكتەن», دەدى گەننادي گولوۆكين.
World Boxing پرەزيدەنتى گ.گولوۆكينمەن تىزە قوسىپ جۇمىس ىستەۋ كەلەشەكتىڭ ەنشىسىندەگى جوبالاردىڭ جۇزەگە اسۋىنا سەرپىن بەرەتىنىن ايتادى. «اۋەسقوي بوكستا جازعى وليمپيادانىڭ كۇمىس مەدالىن, الەم چەمپيوناتىنىڭ التىن جۇلدەسىن العان, كاسىپقوي بوكستا دا دۇنيە ءجۇزىنىڭ ۇزدىگى اتانعان ماماننىڭ بوكستىڭ وليمپيادا باعدارلاماسىندا قالۋىنا قوسار ۇلەسى وراسان. ءتورت جىلدىق دوداسىندا بوكستىڭ بولۋى اۋەسقويلارعا, كاسىپقوي بوكستى ورىستەۋگە تىڭ سەرپىن بەرەدى. وسى سپورت ءتۇرىن دامىتۋ جولىندا بىرلەسە جۇمىس اتقاراتىن شاقتى اسىعا كۇتەمىز», دەدى بوريس ۆان دەر ۆورست.
بىلتىر ساۋىردە حالىقارالىق بوكس فەدەراتسياسى قۇرىلدى. بۇگىنگە دەيىن الەمنىڭ 44 مەملەكەتىنىڭ بوكس فەدەراتسيالارى مۇشەلىككە ءوتتى. قازاقستان بوكس فەدەراتسياسى دا World Boxing قاتارىنا وتۋگە ءوتىنىش بەردى. فەدەراتسيا پرەزيدەنتى شاحمۇرات ءمۇتالىپ: «بۇگىنگى كۇندە بوكستىڭ جازعى وليمپيادا باعدارلاماسىنان الىنىپ قالماۋى ماسەلەسى حوك-ءتىڭ كۇن تارتىبىندە تۇر. بوكستى وركەندەتىپ, وليمپيا ويىندارىنىڭ باعدارلاماسىندا قالۋى جولىندا بارلىق ەلدەرمەن بىلەسە جۇمىس اتقارۋعا ەسىگىمىز اشىق. مۇنداي قادامعا بارۋىمىز ەلىمىزدە بوكستى دامىتا تۇسۋگە مۇمكىندىك تۋدىرادى. World Boxing وليمپيادالىق كوميسسياسىنىڭ توراعاسى, ۇلتتىق وليمپيادا كوميتەتىنىڭ پرەزيدەنتى گەننادي گولوۆكينمەن كەزدەسۋ بارىسىندا وتاندىق بوكستى وركەندەتۋ جايىن تالقىلادىق», دەدى.
