ماتچ اسا تارتىستى ءوتتى. 2021 جىلعى الەم چەمپيوناتىنىڭ جارتىلاي فينالى كوز الدىمىزدا قايىرا كولبەڭدەدى. ليتۆادا وتكەن الەمدىك دودادا پورتۋگالدىقتار پەنالتي سەرياسىندا ءبىزدىڭ جىگىتتەردى قاپى قالدىرىپ, فينالعا شىقتى. ارگەنتينا قۇراماسىن 2:1 ەسەبىمەن ۇتىپ, الەم چەمپيونى اتانعان ەدى. جەڭىلىستىڭ كەرمەك ءدامى قالاي بولارىن قارسىلاسقا ءبىزدىڭ جىگىتتەر بۇل جولى دالەلدەدى. ءسوز جوق, پورتۋگاليا قۇراماسى – الەمدەگى تەڭدەسسىز ۇجىمنىڭ ءبىرى. ماتچتىڭ ءون بويىندا الاڭداعى باسىمدىقتىڭ تىزگىنىن ۋىسىندا ۇستاۋعا ۇمتىلدى. بىراق شىڭعىس ەسەنامانوۆتىڭ (11-مينۋت) بۇرىشتامادان جەتكەن دوپتى شىرەنە تارتىپ ەسەپ اشۋى ولاردىڭ كادىمگىدەي ەسەڭگىرەتىپ تاستادى. ءتىپتى ءبىرىنشى تايم ءبىزدىڭ جىگىتتەردىڭ باسىمدىعىمەن اياقتالدى.
ۇزىلىستەن شيراپ شىققان پورتۋگاليا ويىنشىلارى ستاندارتتى شابۋىلدى گولعا ۇلاستىرىپ, ەسەپتى تەڭەستىرىپ, 21-مينۋتتا يساكۋەل زيكي تە ەنشىسىنە گول جازدى. ەكىنشى تايمنىڭ ۋاقىتى ءسات ساناپ كەمىپ, سوڭعى مينۋتى سىرعىپ جاتقان. تارتىس ءدال وسىلاي ءوربىپ, ەكسترا تايمعا ۇلاسسا, ودان كەيىن پەنالتي سەرياسىنا جالعاسسا, ءۇش جىل بۇرىنعى كەتكەن ەسەمىزدى قايىرا جىبەرىپ الامىز با دەگەن كۇدىكتى ويعا بەرىلگەنىمىز راس. بىراق ەلدىڭ سەنىمىن ارقالاپ شىققان سەركەلەر كەمەل ويىننىڭ كەرەمەتىن كورسەتتى. نەگىزگى ۋاقىتتىڭ بىتۋىنە 18 سەكۋند قالعاندا بۇرىشتامادان كوماندالاستارىن ىزدەگەن داۋرەن تۇرساعۇلوۆ دۋگلاسقا پاس بەردى. ول وڭ قاپتالدان جەتكەن ارنولد كناۋفتىڭ الدىنا سالىپ بەردى. تۋ سىرتىنا كەلگەن دوپتى وڭ اياعىنا يكەمدەپ الدى دا قاقپانى كوزدەي شىرەنە تارتتى. مەندوكا ەريك ەش قايران كورسەتە العان جوق. بۇل ساتتە داۋرەن تۇرساعۇلوۆ پورتۋگاليا قاقپاسىنىڭ الدىنا كەلىپ ۇلگەردى دە, جواۋ ماتۋشتىڭ اياعىنا دا ىركىلمەي جەر باۋىرلاي جەتكەن دوپتى قاقپاشىنىڭ كەۋدەسىنەن اسىرا تۇرتە سالدى. ەسەپ – 1:2.
ودان كەيىنگى ماتچتىڭ سوڭعى 3 سەكۋندى بىزگە «عاسىردان دا ۇزاق كۇندەي» بولدى. بۇرىشتامادان ورىستەتكەن شابۋىل كەزىندە ءبىزدىڭ ويىنشىلار ەرەجە بۇزدى دەگەن پورتۋگالدىقتاردىڭ شاعىمىنان كەيىن ەكرانعا ءۇڭىلىپ, ارپالىستى ءساتتى قايتا سۇزگەن تورەشىلەر كىلتيپان تاپقان جوق.
ءبىز بۇل ماتچتان نەنى كوردىك؟ ۇجىمنىڭ ىنتىماعىن, قۇرامانىڭ قۇرىشتاي قايراتىن سەزىندىك. پاۋلو ريكاردو كاكا باس باپكەر باستاعان, كاپيتان يگيتا, دۋگلاس سىندى برازيليالىق ساڭلاقتاردىڭ ساپىنا قوسىلىپ, شاربولاتتاي شىڭدالعان شىڭعىس ەسەنامانوۆ, داۋرەن تۇرساعۇلوۆ, ءبىرجان ورازوۆ, البەرت اقبالىقوۆ, جاھانگەر ءراشيت, اقجول ءدارىباي سىندى تالانتتار شىقتى. مىنە, ىنتىماقتى ۇجىمنىڭ ولشەۋسىز توككەن تەرىنىڭ وتەۋى.
باس باپكەر ريكاردو كاكا ماتچتان كەيىن پىكىر ءبىلدىردى. «جىگىتتەردىڭ بۇدان بۇرىن دا مەرەيىمىزدى اسىرعان تابىستارى بولدى. بىراق ءدال وسىنداي اسەرگە بولەنبەگەن ەدىم. ويىننان كەيىن جىگىتتەرگە جەڭىستىڭ ءدامىن سەزىنىپ, مەرەكەلەۋ كەرەك, بىراق بۇل باستاماسى عانا دەگەندى ايتتىم. الدا ءالى ماڭىزدى ماتچتار بار. ەندى 30 قىركۇيەكتە وتەتىن شيرەك فينالعا تىڭعىلىقتى ازىرلەنەمىز. بۇل جەڭىس ءبىزدىڭ جانكۇيەرلەر عانا ەمەس, وزبەكستانعا ارنايى كەلىپ قولداۋ كورسەتكەن وزگە ەلدەردىڭ كورەرمەندەرىنىڭ دە جەڭىسى», دەدى باس باپكەر.
ۇلتتىق قۇرامانىڭ قورعاۋشىسى شىڭعىس ەسەنامانوۆ: «جەڭىستىڭ اسەرىن ءالى تولىق سەزىنە الماي جاتىرمىز. ءبىز اقىرىنا دەيىن تارتىسىپ, جەڭىسكە جەتۋگە دەگەن سەنىمدى ءبىر ءسات تە جوعالتپادىق. بۇل – كوماندالىق ويىن بولعاندىقتان, ۇجىمدىق ىنتىماقپەن جەڭىسكە جەتتىك», دەدى.
