وسىدان ءۇش جىل بۇرىن وبلىستا نەبارى ءتورت-اق ينكليۋزيۆتى قولداۋ كابينەتى بولسا, بۇگىندە ونىڭ سانى 24-كە جەتكەن. بيىل اۋليەكول, فەدوروۆ, جانگەلدى, قامىستى اۋداندارىندا تاعى ءتورت كابينەت اشىلدى. جاڭا كابينەتتەردى قاجەتتى دۇنيەلەرمەن جابدىقتاپ, بالالاردىڭ يگىلىگىنە وتكىزىپ بەرۋ ءۇشىن ءوڭىر بيۋدجەتىنەن 34 ملن تەڭگە بولىنگەن.
مۇنداي كابينەتتەردىڭ, اسىرەسە شالعاي اۋىل مەكتەپتەرىندە اشىلىپ جاتقانى قۋانتادى. شالعاي ەلدى مەكەندەردەگى ينكليۋزيانى قولداۋ سىنىپتارى بالانىڭ الىستاعى قالاعا سابىلماي-اق, ءوز اۋىلىندا, اتا-اناسى مەن باۋىرلارىنىڭ جانىندا ءبىلىم الۋىنا, قاتارلاستارىمەن ارالاسىپ, كوپشىلىك ورتاعا تەز بەيىمدەلىپ كەتۋىنە مۇمكىندىك تۋعىزىپ وتىر.
تاياۋدا فەدوروۆ اۋدانىنداعى اباي مەكتەبىندە تاعى ءبىر ينكليۋزيانى قولداۋ كابينەتى اشىلدى. كابينەتتە پەداگوگ-پسيحولوگ, لوگوپەد-مۇعالىم, پەداگوگ-اسسيستەنت جۇمىس ىستەيدى. مامانداردىڭ ايتۋىنشا, مۇندا ەرەكشە بالالاردىڭ مەكتەپ ومىرىنە ارالاسىپ كەتۋىنە بار جاعداي جاسالعان. بالالاردى بەيىمدەۋگە ارنالعان زاماناۋي جابدىقتار, ترەناجەرلەر, سپورتپەن اينالىساتىن, دەمالاتىن, بالانى سەرگىتەتىن ارنايى ورىندار بار.
«كابينەتتىڭ اشىلعانىنا كوپ بولعان جوق. ءبارىمىز قۋانىپ جاتىرمىز. وسىنىڭ ارقاسىندا بالامىز قىركۇيەك ايىنان بەرى قاتار-قۇربىلارىمەن بىرگە وقىپ, ارالاسىپ, دوس تاۋىپ جاتىر. كوپتەن كۇتكەن ارمانىمىز وسى بولاتىن. بالاما دا ۇنايدى. مەكتەپتە جاسالىپ جاتقان جان-جاقتى قولداۋ ءوز ناتيجەسىن بەرەدى. بالامىزدىڭ دەنساۋلىعىنىڭ جاقسارۋىنا, ساپالى ءبىلىم الۋىنا پايداسىن تيگىزەدى دەپ ويلايمىن», دەيدى اباي مەكتەبىندە ءبىلىم الىپ جاتقان ەرەكشە بالانىڭ اناسى اسەل سۇلتان-ءماجيت.
بۇگىندە وڭىردەگى جيىرمادان استام ينكليۋزيانى قولداۋ كابينەتى ەرەكشە ءبىلىم الۋعا مۇقتاج 280 بالاعا جان-جاقتى كومەك كورسەتەدى.
قوستاناي وبلىسى
