پەتروپاۆلدىق بالالار مۇگەدەك اجەلەرىنە كونتسەرت قويدى

پەتروپاۆل. 15 ماۋسىم.  اسىراۋىندا مۇگەدەك بالالار بار «اسىل انا» وبلىستىق قوعامدىق ۇيىمى مەكتەپ بۇلدىرشىندەرىندە قوناقتا بولدى. بۇل تۋرالى egemen ءتىلشىسى حابارلادى. اسىراۋىندا مۇگەدەك بالالار بار «اسىل انا» وبلىستىق قوعامدىق بىرلەستىگى 18 جىلدان بەرى قايىرىمدىلىق شارالارمەن اينالىسىپ كەلەدى. بۇگىندە ونىڭ قۇرامىندا تاعدىردىڭ جازۋىمەن ءارتۇرلى مۇگەدەكتىككە ۇشىراعان 73 انا بار.  ءومىردىڭ قيىندىعىن كوپ كورسە دە, مويىماعان, العاشقى كۇننەن نەگىزىن قالاپ, ونىڭ جۇمىسىنا بەلسەنە قاتىسىپ كەلە جاتقان تەڭدىك سارسەكەەۆا ۇيىمعا جەتەكشىلىك ەتەدى. ىرگە كوتەرگەن ۋاقىتتان بەرى ونىڭ مۇشەلەرى ونداعان وتباسىلار مەن مۇگەدەك بالالارعا دەمەۋشى تاۋىپ, ورنىعۋىنا, جۇمىسقا ورنالاسۋعا كومەكتەستى. بۇل جولى «جاس دارىن» ونەر مەكتەبىنىڭ كىشكەنتاي بالعىندارى مۇگەدەك اجەلەرىن قوناققا   شاقىرىپ, ەرەكشە قۇرمەت كورسەتتى. اق داستارحان جايىپ, كونتسەرت قويدى. وزدەرىنىڭ قىلقالامدارىنان شىققان شىعارمالارىن ۇسىندى. ساحناعا شىعارىپ, ىزەت ءبىلدىردى.  تاقپاق وقىپ, ءان ايتىپ, كوڭىلدەرىن كوتەردى. «مەن ءۇشىنشى توپتاعى مۇگەدەكپىن. ءبىر جىلدان بەرى وسى ۇيىمنىڭ مۇشەسىمىن. تەڭدىك شايقىزىنىڭ جاس ۇرپاق بويىنا قازاقستاندىق پاتريوتيزم رۋحىن دارىتىپ جۇرگەن ەرەن ىستەرىنە ريزامىن. ءبىز ول كىسىنىڭ جەتەكشىلىگىمەن قوعامدىق شارالارعا ۇنەمى ارالاسىپ وتىرامىز», دەيدى قارلىعاش شايمەرگەنوۆا. ءومىر ەسقالي. دەرەك, سۋرەت: egemen.kz