«تەحنيكا ساتىپ الۋعا ارنالعان 6 پايىزدىق جەڭىلدەتىلگەن نەسيە باعدارلاماسى اياسىندا مەملەكەت قازىناسىنان 100 ملرد تەڭگە قارجى بولىنگەن سوڭ, ءبىزدىڭ ونىمدەرگە دەگەن سۇرانىس تا كۇرت ءوستى. تامىز باستالعالى دەمالىسسىز جۇمىس ىستەپ جاتىرمىز. اتالعان باعدارلامانىڭ ناتيجەسىندە تەحنيكانىڭ كەم دەگەندە 6 پايىزى جاڭارادى», دەيدى «اگروماش» زاۋىتىنىڭ پرەزيدەنتى دينارا شۇكىجانوۆا.
كاسىپورىن بىلتىر 1 200-دەن اسا وتاندىق تراكتور, كومباين شىعارعان. اسىرەسە «Lovol» تراكتورىنا دەگەن سۇرانىس جوعارى بولدى.
ماسەلەن, 2023 جىلى زاۋىت 939 بىرلىك «Lovol» تراكتورىن قۇراستىرسا, سونىڭ ءبارى كونۆەيەردەن شىعا سالا ساتىلىپ كەتكەن. «اگروماش» وتكەن جىلدان باستاپ «Lovol» كومبايندارىنىڭ ءوندىرىسىن دە قولعا العان. ونىڭ ونشاقتىسى سول جىلعى جيىن-تەرىم ناۋقانىنا قاتىسىپ, قۋاتتى ءارى ءتوزىمدى تەحنيكا ەكەنىن دالەلدەپ ۇلگەردى.
بۇگىندە ەلىمىزدىڭ ءار وڭىرىندە «اگروماشتىڭ» 9 فيليالى جۇمىس ىستەپ تۇر. 2023 جىلى جەلتوقساندا كوكشەتاۋدا زاۋىتتىڭ تەحنيكالىق قىزمەت كورسەتۋ ورتالىعى اشىلدى. كاسىپورىن بۇل ورتالىقتىڭ قۇرىلىسىنا 250 مىڭ تەڭگە جۇمساعان.
«اگروماش» الداعى جىلدى «قىزمەت كورسەتۋ جىلى» دەپ بەلگىلەپ قويعان. 2024 جىلى كاسىپورىن «Lovol», «Essil», «Deutz-Fahr» كومبايندارىنىڭ اناعۇرلىم جوعارى قۋاتقا يە ۇلگىلەرىن شىعارا باستادى. بيىلعى ماۋسىمدا كومباين, تراكتور ءوندىرىسىنىڭ اۋقىمىن 35 پايىزعا دەيىن ۇلعايتۋ كوزدەلىپ وتىر. تاياۋدا «Aگروماش» لوكاليزاتسيالىق ورتالىعى «ست ەسەمبلي» زاۋىتىمەن سەرىكتەستىك اياسىندا «Claas» تراكتورلارى مەن كومبايندارىنىڭ بىرقاتار قوسالقى بولشەگىن شىعارۋدى قولعا الدى.
«لوكاليزاتسيالىق ورتالىق ەكىجاقتى ونەركاسىپتىك كووپەراتسيا اياسىندا «Claas» تراكتورلارىنا ارنالعان الدىڭعى سالماق تۇسىرگىشتەر, «Cerio» جانە «Vario» وراقتارىنا ارنالعان تىركەمە اربالار, وزگە دە قوسالقى بولشەكتەر شىعارادى. وتكەن جىلدىڭ وزىندە زاۋىت قابىرعاسىندا 250 مىڭنان استام كومپونەنت دايىندالدى», دەيدى كاسىپورىننىڭ وپەراتسيالىق تيىمدىلىك جونىندەگى ديرەكتورى باحتيار بالعوجين.
لوكاليزاتسيالىق ورتالىقتىڭ اۋماعى 36 مىڭ شارشى مەتردەن اسادى. مۇنداعى امبەباپ تسەحتاردا زاماناۋي قۇرىلعىلاردىڭ تۇتقاسىن ۇستاعان 700 ادام جۇمىس ىستەيدى.
قوستاناي وبلىسى
