سۋرەت: elordainfo.kz
ءتۋرنيردى ۇيىمداستىرۋشى, «زاعيپتار ۇستەل تەننيسى فەدەراتسياسى» رقب پرەزيدەنتى سەرىك ءجۇزباي ساياسي پارتيالار اراسىندا دودا وتكىزۋ ارقىلى وسى سپورت ءتۇرىن كەڭىنەن ناسيحاتتاۋدى كوزدەيتىنىن جەتكىزدى.
«بىزگە قارجىلاي قولداۋ, قامقورلىق قاجەت. بۇگىنگى ساياسي پارتيا وكىلدەرى اراسىنداعى ءتۋرنيردى دە دەمەۋشىلەر كۇشىمەن ۇيىمداستىرىپ وتىرمىز. قولبايلاۋ بولىپ تۇرعانى – تەننيس ۇستەلى. شەتەلدەن جاساتۋعا قوماقتى قاراجات كەرەك. استانا قالاسىنداعى ورتالىقتا ءبىر عانا ۇستەل بار. وسى اياداي عانا ورتالىقتا التى ساياسي پارتيا وكىلدەرى سپورتتىق سايىستا تارتىسقا ءتۇستى. قاتىسۋشىلار شوۋداۋن ۇستەل تەننيسى سپورتىنىڭ قالاي دامىپ, وركەندەپ كەلە جاتقانىنان قۇلاعدار بولدى. ءبىزدىڭ ءۇنىمىزدى ءتيىستى ورىندارعا جەتكىزىپ, مۇقتاجدىعىمىزدىڭ وتەلۋىنە سەپتىگىن تيگىزسە دەيمىز. كەلەشەكتە كەنجەلەپ كەلە جاتقان وسى سپورت ءتۇرىن كەڭىنەن ناسيحاتتاپ, دامىتقىمىز كەلەدى. سايىستى «پارتيا كۇشى – بىرلىكتە, كوز جانارى – جۇرەكتە» دەپ اتاۋىمىزدىڭ دا وزىندىك سىرى بار. «ساۋساق بىرىكپەي, ينە ىلىكپەيدى» قاشاندا. فەدەراتسيا جۇمىسىن جانداندىرۋعا بيلىك تارابى دا قولداۋ كورسەتىپ, قامقورلىق تانىتسا, اۋقىمدى جوبالاردى جۇزەگە اسىرۋعا قايراتىمىز جەتەدى», دەگەن سەرىك ءجۇزباي كاسىپكەرلەردى دە قولداۋعا, دەمەۋشىلىك تانىتۋعا ۇندەدى.
اينالمالى جۇيە بويىنشا وتكەن سايىستا «بايتاق» پارتياسى چەمپيون اتانىپ, «Respublika» پارتياسىنىڭ وكىلدەرى كۇمىس مەدالدى يەلەندى. قولا جۇلدە «اۋىل» حالىقتىق-دەموكراتيالىق پاتريوتتىق پارتياسىنىڭ وكىلدەرىنە بۇيىردى. جەڭىمپاز اتانعان, جۇلدە يەلەنگەن كوماندا مۇشەلەرىنە مەدالدار مەن ارنايى سىيلىقتار تابىستالدى.
ەلىمىزدە شوۋداۋن سپورتىنا قىزىعۋشى زاعيپ جانداردىڭ دا قاتارى ارتىپ كەلەدى ەكەن. ءى توپتاعى مۇمكىندىگى شەكتەۋلى جان نۇرلان جەتپىسباەۆ ءار وڭىردە اشىلعان فيليالداردىڭ دا جۇمىسى جاندانىپ كەلە جاتقانىن جەتكىزدى.
ء«بىز زاعيپ جانداردى قولداۋ, جىگەرلەندىرۋ ماقساتىندا جىل سايىن ءتۇرلى سايىستار وتكىزەمىز. 2022 جىلى العاش ۇيىمداستىرعاندا 12 وبلىستان قاتىسۋشىلار كەلسە, بىلتىر 16 وبلىستان ۇمىتكەرلەر جينالدى. جىلدان-جىلعا شوۋداۋن ۇستەل تەننيسىنە قاتىسۋعا ىقىلاس تانىتۋشىلاردىڭ قاتارى ارتىپ كەلەدى. ءبىزدىڭ سپورتشىلار قاراشا ايىندا پولشاعا, شۆەيتسارياعا حالىقارالىق سايىسقا قاتىسۋعا بارادى. الداعى ۋاقىتتا استانا قالاسىندا حالىقارالىق تۋرنير وتكىزىپ, ەلىمىزدە وسى سپورت ءتۇرىنىڭ قالاي قارقىن الىپ كەلە جاتقانىن پاش ەتسەك دەيمىز. بىراق بارلىعىنا قاراجات قولبايلاۋ بولاتىنى قىنجىلتادى. دەمەۋشىلەر تاراپىنان قولداۋ تاپساق, قارجىلىق قاجەتتىلىگىمىزدى وتەپ بەرەتىن اتىمتاي-جومارت ازاماتتار دەمەۋشىلىك تانىتسا, قۋانار ەدىك», دەيدى ن.جەتپىسباەۆ.
حالىقارالىق تۋرنير وتكىزۋ ءۇشىن ستاندارتقا ساي جابدىقتى قامتاماسىز ەتۋ ماڭىزدى. مۇنداي ۇستەلدى يتاليادا ساپالى جاسايتىندىقتان, تاپسىرىس بەرۋگە قوماقتى قاراجات قاجەت. بۇل سپورت تۇرىنە قاتىسامىن دەگەن جاندارعا ەشقانداي شەكتەۋ جوق. ن.جەتپىسباەۆ ورتالىقتا جاسى جەتپىستىڭ ءىشىن قۋالاعان زەينەتكەر كىسى دە ۇستەل تەننيسىن وينايتىنىن جەتكىزدى. «مۇندا اياق-قول قيمىلداپ, ادامدى شيراتادى, ەستۋ قابىلەتىن دە جاقسارتادى. جەتپىستەن اسقان قاريا سەرگەك جۇرەدى, ءابجىل قيمىلدايدى. ءتىپتى جارىس كەزىندە وزىنەن الدەقايدا جاسى كىشى ويىنشىلاردى دا ىعىستىرىپ كەتەدى», دەيدى ن.جەتپىسباەۆ.
«اۋىل» پارتياسى استانا قالالىق جاستار قاناتىنىڭ توراعاسى ءمادي جۇزبەك مۇمكىندىگى شەكتەۋلى جاندارعا جاستار تاراپىنان قولداۋ كورسەتۋ ماقساتىندا تۋرنيرگە قاتىسۋعا كەلگەنىن ايتتى. «كورۋ قابىلەتىنەن, ءتىپتى كوز جانارىنان ايىرىلعان جانداردىڭ قايسارلىعىنا تاعى دا ءتانتى بولدىق. راسىندا دا شوۋداۋن ۇستەل تەننيسىن ويناۋ, ءادىس-ءتاسىلىن ۇيرەنۋ ايتارلىقتاي قيىن ەكەن. كوزىمىزدى تۇمشالاپ بەتپەردەمەن جاۋىپ, قولىمىزعا تەننيس قالاعىن بەرگەندە قوبالجۋ دا بولدى. زاعيپ جاندار قاشاندا قوعامنىڭ مۇشەسى, ەشقاشان شەتقاقپاي كورمەۋگە ءتيىس. ءبىز الداعى ۋاقىتتا وسى سپورت ءتۇرىن جاستار اراسىندا ناسيحاتتاۋ ماقساتىندا تۋرنير وتكىزۋدى جوسپارلاپ وتىرمىز. «كوزىمنىڭ قاراسى» زاعيپتار ورتالىعىنداعى تۋرنير تارتىسقا تولى بولدى. چەمپيون اتانۋعا بارىمىزدى سالىپ ەدىك, بۇيىرعانى قولا جۇلدە. بۇل سپورتتى تەرەڭدەي يگەرۋ ءۇشىن ءجيى ويناپ, تاجىريبە جيناۋ ماڭىزدى. الداعى ۋاقىتتا دامۋىنا ءوزىمىز دە ۇلەسىمىزدى قوسامىز», دەيدى م.جۇزبەك.
«زاعيپتار ۇستەل تەننيسى فەدەراتسياسى» رەسپۋبليكالىق قوعامدىق بىرلەستىگى بىرنەشە وبلىستا فيليالىن اشىپ, جۇمىستى جۇيەلى جۇرگىزىپ كەلەدى. زاعيپ جانداردىڭ قۇقىقتارىن قورعاپ, الەۋمەتتىك ماسەلەسىن وڭىنان شەشۋگە, قوعامعا بەيىمدەۋ جولىندا تاپ بولاتىن كەدەرگىلەردى جويۋعا سەلبەسەتىن بىردەن-ءبىر ۇيىم.
شوۋداۋن ۇستەل تەننيسىنىڭ تاريحى 1960 جىلدان تامىر تارتادى. كانادالىق دجو ليۋيس پەن پاتريك يورك جانارى جارىق الەمدى كورمەيتىن زاعيپتار ءۇشىن ويلاپ تاپتى دەلىنەتىن بۇل سپورت ءتۇرى كەيىن جازعى پاراليمپيا ويىندارىنىڭ باعدارلاماسىنا دا ەنگەن. 1980 جىلى نيدەرلاندتا وتكەن تورتجىلدىق دوداسىنىڭ باعدارلاماسىندا شوۋداۋننان دا سپورتشىلار سىنعا ءتۇستى. ودان كەيىن الەم بىرىنشىلىگى دە ۇيىمداستىرىلدى. دەگەنمەن دە ناقتى ەرەجەسى ۇزاق تالقىلاۋدىڭ ناتيجەسىندە ءپىسىپ-جەتىلىپ, 2009 جىلى بەكىتىلدى.
