بۇل جوبانى دامىتۋعا بەلسەندى كرەاتور ساياحاتشىلاردىڭ تيگىزەر كومەگى زور. سولاردىڭ ءبىرى – ايبار تولەۋبەك (@aibar_toleubekov). ونىڭ قازاقستاننىڭ ءار ايماعىنا جاساعان اۆتو ساياحاتتارىن قىزىعا تاماشالايتىن مىڭداعان جازىلۋشىلارى ءار ساپارىن ىنتىعا كۇتەدى. ايبار قازاقستاندى ساياحاتتاۋ ارقىلى دا ناسيحاتتاپ, پلاتفورمانىڭ كومەگىمەن وزگەلەرگە تۋعان جەردىڭ مادەني مۇراسى مەن تابيعي قازىناسىن تانىستىرۋدى ازاماتتىق پارىزى سانايتىنىن جەتكىزدى.
– قازاقستاندى ارالاپ ساياحاتتاۋدى قاشان باستادىڭ؟ TikTok الەۋمەتتىك جەلىسىندە ساپاردىڭ قىزىقتى ساتتەرىن ءبولىسۋ وڭتايلى شەشىم بولعان ەكەن.
– 3-4 جىل بۇرىن قازاقستاندا ساياحاتتاۋعا جانە ىشكى ءتۋريزمنىڭ دامۋىنا ءوزىمنىڭ ۇلەسىمدى قوسسام دەگەن وي تۋدى. ءوزىم ۇنەمى ەلىمىزدىڭ تابيعاتىنىڭ الۋان تۇرلىگى مەن تاڭعاجايىپ كەرەمەتىنە ءتانتى بولىپ, كوزىم تويات تاپقان تاڭعاجايىپ مەكەندى وزگە دە ازاماتتار تاماشالاسا دەۋشى ەدىم. وسىلايشا قىسقا بەينە روليكتەر ءتۇسىرىپ, كونتەنتتى جاندى جانە ينتەراكتيۆتى ەتىپ ازىرلەۋگە كۇش سالدىم.
– الەۋمەتتىك جەلىدەگى جازىلۋشىلارىڭىزعا كوبىنەسە نە ۇنايدى؟
– مەن ءوزىم اۆتوكولىكپەن ساياحاتتاۋدى وڭتايلى كورەمىن. بۇل جاي عانا ا نۇكتەسىنەن ۆ نۇكتەسىنە جەتۋ ەمەس, ءار جەردىڭ اتموسفەراسىنا ەنۋ, بەيمالىم تۇسقا توقتاپ, ەلدىڭ جاسىرىن بۇرىشتارىن زەرتتەۋگە تاپتىرماس مۇمكىندىك. مەنىڭ جازىلۋشىلارىم بۇل فورماتتى جىلى قابىلدايدى.
- جابايى جانۋارلار: ايۋ, جابايى قاباندار قالاي نىساناڭىزعا ءىلىنىپ ءجۇر؟
– تۇركىستان وبلىسىنىڭ تۇلكىباس اۋدانىنداعى اقسۋ-جاباعىلى مەملەكەتتىك قورىعىندا مەكەندەيتىن قوڭىر ايۋ – وبەكتيۆىمە ىلىنگەن العاشقى اڭ بولعاندىقتان دا مەن ءۇشىن ەرەكشە جۇمىس سانالادى.
ايتا كەتەتىن جايت, جابايى جانۋارلاردى ءتۇسىرۋ ءبىزدىڭ زاڭنامامەن قاتاڭ رەتتەلەدى. ارنايى قۇجاتتار مەن رۇقساتتاردى الۋ كوپتەگەن قيىندىقتار تۋعىزدى, بىراق ءبىز ونى ۇزاق قاشىقتىقتان ساپالى كادرلار تۇسىرۋگە مۇمكىندىك بەرەتىن دروندى ۇشىرۋ ارقىلى ءتۇسىرىپ الدىق. بۇدان وزگە دە بىرنەشە باسقا قورىققا باردىم, ول جاقتاعى «قىزىل كىتاپقا» ەنگەن جابايى جان-جانۋار مەن اڭ-قۇستاردى ارنايى رۇقساتپەن عانا فوتو, ۆيدەوعا تۇسىرە الدىم.
– قازاقستاننىڭ كورىكتى جەرلەرىن كورۋدى ماقسات تۇتقان ساياحاتشىلارعا قانداي كەڭەس ايتار ەدىڭ؟
– ساياحاتتاۋعا قىزىعۋشىلىق تانىتقاندارعا تەك باعىتتىڭ وزىنە عانا ەمەس, ساپاردا ءسىزدىڭ جانىڭىزداعى ادامدارعا دا ەرەكشە نازار اۋدارۋعا كەڭەس بەرەمىن. ساپارلاس سەرىگىڭىزدىڭ ءسىزدى قولداعانى, ىنتالاندىرعانى جانە كومەكتەسكەنى ماڭىزدى. جوعارىدا ايتقانىمداي, ساپاردى الدىن الا جوسپارلاپ, تاجىريبەلى دوستارىڭىزبەن باعىتتى تالقىلاۋ جانە ناقتى ساياحات باعىتىن ءتۇزۋ كەرەك. سونداي-اق, ەگەر ءسىز بەلگىلى ءبىر ءوڭىردى تاڭداساڭىز, ول تۋرالى الەۋمەتتىك جەلىلەر نەمەسە Google ارقىلى مۇمكىندىگىنشە كوبىرەك اقپارات جيناڭىز. مىسالى:وندا قانداي قىزىقتى ورىندار بار؟ جەرگىلىكتى حالىقتىڭ ەرەكشەلىكتەرى قانداي؟بۇل تۋريستىك باعىت قانشالىقتى تانىمال؟ وندا قانداي قوناق ۇيلەر بار جانە قىزمەت كورسەتۋ ساپاسى سىن كوتەرە مە؟
مىسالى, ءسىز التىن ەمەل قورىعىنا بارعىڭىز كەلسە, الدىمەن جازيرالى جەتىسۋ ءوڭىرى تۋرالى ماڭىزى زور پايدالى اقپاراتقا كەنەلتىپ, ءجون سىلتەيتىن «VisitZhetysu» اقپاراتتىق ورتالىعىنا حابارلاسقانىڭىز ابزال.
اڭگىمەلەسكەن
قۋانىش نۇردانبەك ۇلى
