سۋرەت: facebook.com@auylpartiasykz
فەستيۆالدىڭ رەسمي اشىلۋىنا دەيىن كۇندىزگى ۋاقىتتا كىتاپ باسپالارى مەن دۇكەندەرىنىڭ كورمە-جارمەڭكەسى ۇيىمداستىرىلدى. سونىمەن قاتار شەت مەملەكەتتەر ەلشىلىكتەرىنىڭ كىتاپتارى دا ەل نازارىنا ۇسىنىلدى.
العاشقى بولىپ ءسوز العان ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي ەلىمىزدە كىتاپ وقۋ مادەنيەتىنىڭ ارتىپ كەلە جاتقانىن ايتىپ, پارلامەنت سەناتىنىڭ توراعاسى م.اشىمباەۆ پەن مادەنيەت جانە اقپارات ءمينيسترىنىڭ مىندەتىن اتقارۋشى ق.ىسقاقوۆتىڭ قۇتتىقتاۋ حاتىن جەتكىزدى. «مەملەكەت باسشىسى قاسىم-جومارت توقاەۆ ۇلتتىق قۇرىلتايدا كىتاپ وقۋ مەن كىتاپ شىعارۋدىڭ ەل بولاشاعى ءۇشىن ماڭىزدىلىعىنا توقتالىپ, شىن مانىندە, كىتاپ وقيتىن ەل زيالى ۇلتقا اينالادى دەپ اتاپ وتكەنى بەلگىلى. وسى ورايدا ءۇشىنشى رەت ۇيىمداستىرىلىپ وتىرعان فەستيۆال كىتاپ پەن ونى وقۋدىڭ مارتەبەسىن كوتەرۋ, جاس ۇرپاقتىڭ ادەبيەتكە دەگەن قىزىعۋشىلىعىن ارتتىرۋدى جانە اقپاراتتىق مادەنيەتتى قالىپتاستىرۋ, جازۋشىلار مەن وقىرماندار ءۇشىن قارىم-قاتىناس الاڭىن قۇرۋدى كوزدەيدى», دەدى ول.
فەستيۆال اياسىندا اۋە ۇشاعىنىڭ بورتىندا جولاۋشىلارعا ۇلتتىق اۋديوكونتەنت ۇسىنۋ ماقساتىندا كىتاپحانا مەن «Air Astana» اۆياكومپانياسى اراسىندا ىنتىماقتاستىق تۋرالى مەموراندۋمعا قول قويىلدى. بۇل جوبا جولاۋشىلاردىڭ ساپار بارىسىندا قازاق اۋىز ادەبيەتىنىڭ باي مۇراسىمەن سۋسىنداپ, تاعىلىم الۋىن كوزدەيدى. ەندى اۋەدەگى ءاربىر جولاۋشى قازاقتىڭ ءداستۇرلى ءان-كۇيلەرىن, باتىرلار جىرىن, سونىمەن قاتار قازاق ادەبيەتىنىڭ جاۋھار تۋىندىلارىنىڭ اۋديونۇسقالارىن ۇشاق بورتىنداعى مەديا-قۇرىلعى ارقىلى تىڭداپ, وقي الادى.
«مەملەكەتىمىزدىڭ ىرگەلى اۆياكومپانياسى رەتىندە قازاق حالقىنىڭ ادەبيەتى مەن مادەنيەتىنە باسىم باعىت بەرۋ ماقساتىمىز. ۇلتتىق اكادەميالىق كىتاپحانا اراسىنداعى سەلبەستىگىمىز – سونىڭ جارقىن دالەلى. الداعى ۋاقىتتا بۇل بايلانىسىمىز بەكي ءتۇسىپ, تىڭ جوبالاردى بىرگە اتقارامىز دەگەن سەنىمدەمىز», دەدى «Air Astana» بورتتىق قىزمەت كورسەتۋ جونىندەگى ۆيتسە-پرەزيدەنت ەلەنا وبۋحوۆا.
بۇعان قوسا رۋحانيات مەرەكەسىنە كەلگەن جۇرتشىلىق قولونەر شەبەرلەرى مەن سۋرەتشىلەردىڭ «Art-الەم», «كوشپەلىلەر عالامى» اتتى كورمەسى مەن بالالارعا ارنالعان ينتەراكتيۆتى ويىن-ساۋىق ءىس-شارالارىن تاماشالادى.
وسى كەزدە كىتاپحانانىڭ اتاۋلى زالدارىندا ادەبي شىعارمالاردىڭ تانىستىرىلىمى, قالام قايراتكەرلەرىنىڭ شەبەرلىك ساعاتى, ينتەللەكتۋالدى ويىندار مەن ترەنينگتەر ءوتىپ جاتتى. سونداي-اق وقىرمان قاۋىم «قالامگەر قولتاڭباسى» بۇرىشىندا قازاق اۆتورلارىمەن كەزدەسىپ, جاڭادان جارىق كورگەن شىعارمالارىن قولتاڭباسىمەن الۋ مۇمكىندىگىنە يە بولدى.
فەستيۆالدىڭ قورىتىندى بولىمىندەگى ەلوردالىق اقىنداردىڭ قاتىسۋىمەن وتكەن «سەزىمدەر سويلەگەندە» ادەبي-سازدى كەشى پوەزياسۇيەر جۇرتشىلىقتىڭ كوڭىلىنەن شىقتى. كەش بارىسىندا تاناكوز تولقىنقىزى, ۇلاربەك نۇرعالىم, ماقپال مىسا سىندى اقىندار ولەڭ وقىپ, ادەبيەت توڭىرەگىندە وي-پىكىرىن ورتاعا سالدى.
كىتاپحانا ديرەكتورى عازيزا قۇدايبەرگەننىڭ ايتۋىنشا, ەلىمىزدە كىتاپ وقيتىن جاستاردىڭ سانى كۇننەن-كۇنگە ارتىپ كەلەدى. «زاماناۋي تىلمەن ايتساق, كىتاپ وقۋ ترەندكە اينالدى», دەيدى. سونىمەن قاتار كىتاپحانا جۇيەسى الداعى ۋاقىتتا وقىرمان تالاپ-تالعامىنا قاراي كەمەلدەنە بەرەتىنىن جەتكىزدى.
