حالىقارالىق شاحمات فەدەراتسياسى (FIDE) 45-الەمدىك وليمپياداسىن ماجارستاننىڭ بۋداپەشت قالاسىندا وتكىزدى. ەلىمىزدىڭ ايەلدەر قۇراماسى تاڭعاجايىپ ناتيجە تىركەپ, جاھاندىق وليمپيادا دوداسىندا ولجا سالدى. قازاق سپورتىنىڭ تاريحىندا بۇرىن-سوڭدى مۇنداي بايگە بۇيىرعان ەمەس.
ايەلدەر اراسىندا ءۇندىستان قۇراماسى دۇنيەجۇزىلىق شاحمات وليمپياداسىنىڭ چەمپيونى اتانسا, قولا مەدال اقش كومانداسىنا بۇيىردى. ەرلەر سىنىندا دا ءۇندىستان قۇراماسىنىڭ الدىنا ەشكىم تۇسە العان جوق. كۇمىستى – اقش, قولا جۇلدەنى وزبەكستان شاحماتشىلارى يەلەندى.
بيىل العاش رەت الەمدىك وليمپياداعا قاتىسۋشى كوماندالار سانى رەكوردتىق ناتيجەگە جەتتى: ەرلەر سىنىنا 188 كوماندا قاتىسسا, ايەلدەر دوداسىنا 169 ۇجىم قوسىلدى. الەمنىڭ تاڭداۋلى قۇرامالارىنىڭ اراسىنان وزا شاۋىپ, كۇمىس مەدالعا ەنشى سالعان قىزدارىمىزدىڭ جەڭىسى ماقتاۋعا دا, ماقتانۋعا دا لايىق جەتىستىك.
ازۋى التى قارىس, وزىق ويلى گروسسمەيستەرلەرىن ۇكىلەپ اكەلگەن تەگەۋرىندى قۇرامالاردىڭ شاحماتشىلارىن قاپى قالدىرعان ءبىزدىڭ قىزدار ورە دوداسىندا وسالدىق تانىتپادى. گروسسمەيستەر پاۆەل كوتسۋر كاپيتاندىق مىندەتتى ارقالاپ, الەكساندر مويسەەنكو باپتاپ اپارعان ساڭلاقتارىمىز 11 تۋردىڭ ءار سايىسى سايىن شىڭدالىپ, تۇلەپ وتىردى. 20 جاستاعى الەم چەمپيونى ءبيبىسارا اساۋباەۆا, 19-عا ەندى تولعان مەرۋەرت قاماليدەنوۆا, 18 جاستاعى كسەنيا بالاباەۆا, ءامينا قايىربەكوۆا, 17 جاسىندا تۇڭعىش رەت ەرەسەكتەر وليمپياداسىنا قاتىسۋشى الۋا نۇرمان باستاعان ساڭلاقتار سىن ساتىندە ساقا ءجۇرىس جاساپ, سۇڭعىلالىعىن تانىتتى. بىلتىر پولشادا وتكەن كوماندالىق الەم چەمپيوناتىندا وسى قىزدار كۇمىس مەدال ولجالاعان. سول بيىگىنەن بيىل دا الاسارماي, ابىرويىمىزدى اسىرىپ وتىر.
ارۋلاردىڭ دۇنيەجۇزىلىك وليمپيادادا كۇمىس مەدال يەلەنۋىن تاريحي جەڭىس دەۋدىڭ نەگىزى جوق ەمەس. بۇعان دەيىن 2022 جىلى ءۇندىستاننىڭ چەنناي قالاسىندا وتكەن عالامدىق دودادا 5-ورىن بۇيىردى, 2018 جىلى گرۋزيانىڭ باتۋمي قالاسى قابىلداعان وليمپيادا سايىسىندا 11-ورىندى مىسە تۇتتى. ال 2016 جىلى ازەربايجان استاناسى باكۋدە وتكەن سايىستا ءتىپتى 37-ورىنعا عانا تابان تىرەدى.
«ايەلدەر قۇراماسىنىڭ دۇنيەجۇزىلىك شاحمات وليمپياداسىنداعى كۇمىس جۇلدەسى – قازاقستان شاحماتىنىڭ الەۋەتىن الەمگە ايگىلەيتىن جەتىستىك. جاس قۇرامامىز ۇلكەن پسيحولوگيالىق قىسىم مەن 11 ماتچتىق مارافونعا قاراماستان, الەمنىڭ 169 ەلىنەن كەلگەن قارسىلاستارىن ىعىستىرىپ, ۇزدىكتەردىڭ ورتاسىنان كورىندى. مەن كوماندامەن ماقتانامىن, جاتتىقتىرۋشىلارعا, اتا-انالارعا العىسىمدى بىلدىرەمىن. ەكى جىل ىشىندە وسىنداي ناتيجەگە جەتكەنىمىزگە وتە قۋانىشتىمىن. باي تاجىريبە مەن جەڭىسكە دەگەن قۇشتارلىق ءبىزدى كەلەشەكتە كەمەل جەتىستىككە باستاپ, دۇنيەجۇزىلىك وليمپيادانىڭ التىنىن ولجالاۋعا باستايتىنىنا سەنەمىن», دەدى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ.
قىزدارىمىز بۋداپەشتتە وتكەن عالامدىق وليمپيادانىڭ ىرىكتەۋ كەزەڭىندە ۋرۋگۆاي, فينليانديا, اۋستريا, سەربيا قۇرامالارىن ايقىن ەڭسەرگەن. تەك 5-تۋردا ءۇندىستان قۇراماسىنا ەسە جىبەردى. ەكى جىل بۇرىن وتكەن دۇنيەجۇزىلىك وليمپيادانىڭ قولا مەدالىن ەنشىلەگەن ۇندىستاندىق كوماندا قالايدا چەمپيون اتانۋعا بەس قارۋىن سايلاپ كەلگەن ەكەن. دەسە دە ءبىزدىڭ قىزدار 6-تۋردان باستاپ كۋبا, ازەربايجان, فرانتسيا, پولشا كوماندالارىنان باسىم ءتۇسىپ, ءتىپتى 9 تۋردىڭ قورىتىندىسى بويىنشا كوش باستاعان ەدى. شەشۋشى 10, 11-تۋردا اقش پەن گرۋزيا قۇراماسىمەن تەڭ ءتۇسىپ, ماڭىزدى ۇپاي ەنشىلەدى. وسىلايشا, دۇنيەجۇزىلىك شاحمات وليمپياداسىندا تەك ءۇندىستان كومانداسىنا ەسە جىبەرگەن قىزدار كۇمىس مەدالعا يە بولدى.
وكىنىشكە قاراي, ەلىمىزدىڭ ەرلەر قۇراماسى سونشالىقتى ءساتتى ونەر كورسەتپەدى. جاس گروسسمەيستەرلەر دەنيس ماحنيوۆ, الەم چەمپيونى قازبەك نوگەربەك, رامازان جالماحانوۆ, الىشەر سۇلەيمەنوۆ, الديار اڭسات باستاعان جىگىتتەر جالپى ناتيجەدە 29-ورىندى قاناعات تۇتتى.
