ەلىمىزدە مۇگەدەكتىكتى بەلگىلەۋ ءۇشىن تاۋەلسىز ساراپشىلار تارتىلا باستادى

بيىل ءساۋىر ايىندا ازاماتتاردى كۋالاندىرۋ پروتسەسىنە تاۋەلسىز ساراپشىلاردى ەنگىزۋ تەتىگىن سىناقتان وتكىزۋ ءۇشىن ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى بىرلەسكەن بۇيرىق قابىلدادى. ول ۇمىتكەرلەردىڭ تەستىلەۋدەن ءوتۋ جانە تالاپ ەتىلەتىن قۇجاتتار توپتاماسىن ۇسىنۋ ءتارتىبىن رەتتەيدى.

ساراپشىلىققا ۇمىتكەرلەرگە قويىلاتىن نەگىزگى تالاپتاردىڭ ءبىرى جوعارى مەديتسينالىق ءبىلىمى, دەنساۋلىق ساقتاۋ سالاسىنداعى مامان سەرتيفيكاتى, سونداي-اق مەديتسينالىق-الەۋمەتتىك ساراپتاما جۇرگىزۋ ماسەلەلەرى بويىنشا سوڭعى 5 جىلدا وقۋدان وتكەنىن راستايتىن قۇجاتى بولۋى ءتيىس. وسىلايشا, تاۋەلسىز ساراپشىلاردى ىرىكتەۋ بىلىكتىلىك دەڭگەيى مەن جۇمىس ءوتىلى ەسكەرىلە وتىرىپ, كونكۋرستىق نەگىزدە جۇزەگە اسىرىلاتىن بولادى.

ءماس-كە تاۋەلسىز ساراپشىلاردى تارتۋ بويىنشا جاڭا جوبانى ىسكە قوسۋ شەڭبەرىندە كونكۋرسقا 50-گە جۋىق ادام قاتىستى. ىرىكتەۋدىڭ بارلىق كەزەڭدەرىنەن 18 ساراپشى دارىگەر ءوتىپ, جۇمىسقا كىرىستى.

مەديتسينالىق قۇجاتتار مەملەكەتتىك ورگاندار مەن دەنساۋلىق ساقتاۋ مينيسترلىگىنىڭ اقپاراتتىق جۇيەلەرىنەن الىنعان دەرەكتەر نەگىزىندە ساراپشىعا اۆتوماتتى تۇردە تۇسەدى. ىستەردى ءبولۋ ەكساۋماقتى تارتىپپەن جۇزەگە اسىرىلادى. بۇل الماتىدا تۇراتىن ساراپشىعا الماتىدان باسقا ەلىمىزدىڭ وزگە وڭىرلەرىنەن قۇجاتتار كەلىپ تۇسەتىنىن بىلدىرەدى.

تاۋەلسىز ساراپشىلار ينستيتۋتىن ەنگىزۋدىڭ ماقساتى ازاماتتاردىڭ ساراپشىلارمەن جانە تيىسىنشە سىبايلاس جەمقورلىق قۇرامداس بولىكتەرىمەن تىكەلەي بايلانىسىن بولدىرماۋعا باعىتتالعان.

مەديتسينالىق-الەۋمەتتىك ساراپتاما راسىمدەرىن جۇرگىزگەننەن كەيىن, مۇگەدەكتىك توبى انىقتالعان كەزدە, ءتيىستى الەۋمەتتىك تولەمدەر مەن ارناۋلى الەۋمەتتىك قىزمەتتەردى ودان ءارى تاعايىنداۋ ءوتىنىش بەرۋشىنىڭ قاتىسۋىنسىز پرواكتيۆتى تۇردە جۇرگىزىلەدى. ەستەرىڭىزگە سالا كەتەيىك, ءماس وتكىزۋدىڭ سىرتتاي فورماتى بويىنشا قاناتقاقتى جوبا 2022 جىلدىڭ 1 قاڭتارىنان باستاپ قازاقستاننىڭ بارلىق اۋماعىندا سىناقتان ءساتتى ءوتىپ جاتىر. بۇگىنگى كۇنى سىرتتاي پرواكتيۆتى فورماتتا كۋالاندىرۋ 30 نوزولوگيالىق نىسان بويىنشا جۇرگىزىلەدى. جىل باسىنان باستاپ رەسپۋبليكانىڭ بارلىق وڭىرىندە 60,4 مىڭنان استام ءوتىنىم قارالعان.

قر الەۋمەتتىك كودەكسىندە 2025 جىلعى 1 قاڭتاردان باستاپ ەلىمىزدە تاۋەلسىز ساراپشىلار ينستيتۋتىن تولىق كولەمدە ەنگىزۋ كوزدەلگەن.