فوتو: Astana Hub ءباسپاسوز قىمەتى
ايتا كەتەيىك, اتالعان جوبا «دەنى ساۋ ۇلت» ۇلتتىق باعدارلاماسى اياسىندا حالىقتىڭ دەنساۋلىعىن جاقسارتۋعا باعىتتالعان.
يننوۆاتسيالىق مەديتسينا عىلىمي-كلينيكالىق ورتالىعى دارىگەرلەرىنەن قۇرالعان كوماندانىڭ ايتۋىنشا, جوبانىڭ نەگىزگى ماقساتى - حالىققا تەگىن ءارى قولجەتىمدى سكرينينگ ۇسىنۋ. پلاتفورما جالپى قان ءاناليزىنىڭ ناتيجەلەرىنە نەگىزدەلگەن يممۋنولوگيالىق دەرەكتەردىڭ كەڭ اۋقىمىن تالدايدى. سونىمەن قاتار جاسىرىن ينفەكتسيالاردى انىقتاپ, ورگانيزمنىڭ اۋرۋ-سىرقاۋعا, ەكپەگە, فيزيكالىق جۇكتەمەلەر مەن سترەسسكە اسەرىن باقىلاۋعا كومەكتەسەدى. سونداي-اق يممۋنيتەتتى قالىپتا ۇستاپ, نىعايتۋ ءۇشىن ۇسىنىمدار بەرەدى.
«ويىمىزدا جوبانىڭ العاشقى ۇشقىنى پايدا بولعان 2016 جىلدان بەرى پلاتفورمانى ازىرلەۋگە 8 جىلدان استام ۋاقىت جۇمسادىق. وسى ۋاقىت ىشىندە 4 اۆتورلىق قۇقىق الىپ, ساۋدا ماركاسىن تىركەپ قانا قويماي, پلاتفورمانىڭ قۇرىلىمىن قايتا قاراپ, جاساندى ينتەللەكت كىرىكتىردىك. بيىل شىلدەدە ءونىمدى وندىرىسكە ءساتتى ەنگىزىپ, بەلسەندى قولدانىپ جاتقان كلينيكالار مەن ەمحانالاردا جاقسى كورسەتكىشتەر بايقاپ وتىرمىز. پلاتفورما ۇسىنعان ناتيجەلەردىڭ دالدىگى ورتاشا ەسەپپەن 98,7%-دى قۇرايدى. مۇنىڭ تاجىريبە مەن عىلىمي تۇرعىدا دالەلى بار», دەدى ImmuniGuide نەگىزىن تەڭ قالاۋشى, مەديتسينا عىلىمدارىنىڭ دوكتورى, دارىگەر-ونكولوگ نۇرلىبەك ودەرباەۆ.
جوبانىڭ باستى ارتىقشىلىعى – مەديتسينالىق دەرەكتەردى جوعارى جىلدامدىقپەن جانە دالدىكپەن وڭدەي الاتىن جاساندى ينتەللەكت, بۇل ەگجەي-تەگجەي جەكەلەندىرىلگەن ەسەپتەردى كەز كەلگەن تىلدە ۇسىنۋعا مۇمكىندىك بەرەدى.
وتاندىق ءونىم دەنساۋلىق ساقتاۋ سالاسىن جاقسارتۋ ءۇشىن جوعارى الەۋەت كورسەتىپ, حالىقارالىق الاڭعا شىعۋعا دايىن ەكەنىن كورسەتكەن. جوبا شەت ەلدەردە قىزىعۋشىلىق تۋدىرىپ, اتاپ ايتقاندا, مالايزيا تاراپىمەن پلاتفورمانى سول ايماقتا سىناقتان وتكىزۋ بويىنشا كەلىسسوزدەر جۇرگىزىلىپ جاتىر. الداعى ۋاقىتتا تەحنولوگيا اياسىن كەڭەيتىپ, ازيا, ەۋروپا مەن اقش ەلدەرىنە ەنگىزۋ جوسپارلانىپ وتىر.
