فوتولار: «بۋراباي» مۇتپ ءباسپاسوز قىزمەتى
براكونەرلەر ينسپەكتورلىق رەيد كەزىندە ۇستالعان. ولاردان بارلىعى 640,3 كەلى بالىق تاركىلەندى, ونىڭ 631,6 كەلىسى - سازان بولسا, 8,7 كەلىسى - تابان بالىق.
«بۋراباي» مۇتپ ءباسپاسوز قىزمەتىنىڭ ءمالىم ەتۋىنشە, ەلوردالىق تۇرعىندار «تەمنوبور» ورمانشىلىعىنىڭ ەرەكشە قورعالاتىن تابيعي اۋماعىندا كولگە اۋ سالعان. زالال سوماسى 9 132 827 تەڭگەنى قۇراعان. قۇقىق بۇزۋشىلىق ماتەريالدارى ءبىرجان سال اۋدانىنىڭ پوليتسيا بولىمىنە بەرىلگەن.
ايتا كەتەيىك, اتالعان پاركتىڭ ديرەكتسياسى كولدەردىڭ جاعاسىندا Smart National Park Burabay اقىلدى بەينەباقىلاۋ جۇيەلەرىن ورناتا باستاعان. جىل سوڭىنا دەيىن كامەرالار تولىق ورناتىلماق. بۇل – سۋ ايدىنىنداعى جاعدايدى ءتيىمدى باقىلاۋعا جانە براكونەرلىك فاكتىلەرىن جەدەل تۇردە توقتاتۋعا مۇمكىندىك بەرەدى.
«كولدەردە زاماناۋي بەينەباقىلاۋ تەحنولوگيالارىن ەنگىزۋ جارتاستاردى بۇلدىرەتىن, قوقىس تاستايتىندارعا دا توسقاۋىل بولادى دەپ ۇمىتتەنەمىز», دەيدى «بۋراباي» مۇتپ ديرەكتورى سەرگەي بىكوۆ.
