كاسىپقوي بوكستا 15 جەكپە-جەك وتكىزىپ, بارلىعىندا جەڭىسكە جەتكەن جانىبەك جاڭازەلانديالىق اندرەي ميحايلوۆيچكە قارسى ايقاسقا تۇسەدى. وسى كۇنگە دەيىن كاسىپقوي بوكستا 21 جەكپە-جەك وتكىزىپ, ءالى دە جەڭىلىستىڭ كەرمەك ءدامىن تاتپاعان ا.ميحايلوۆيچ – چەمپيوندىق بەلبەۋىنەن باستى ۇمىتكەردىڭ ءبىرى. 4 قازان كۇنى اۋستراليانىڭ استاناسى سيدنەي قالاسىندا وتەتىن جەكپە-جەككە جانىبەك تىڭعىلىقتى ازىرلىك جۇرگىزىپ جاتىر.
«قازاق سپورتىنا سيدنەي ءتورى قۇتتى قاشاندا. 2000 جىلى وتكەن جازعى وليمپيا ويىندارىنا جەتى بوكسشىمىز قاتىسىپ, اۋستراليا رينگىندە تورتەۋى فينالدىق جەكپە-جەكتە وليمپيادا التىنى ءۇشىن ايقاستى. بەكزات ساتتارحانوۆ پەن ەرماحان ىبىرايىموۆ اعالارىمىز ءانۇرانىمىزدى شىرقاتسا, بولات ءجۇمادىلوۆ, مۇحتارحان دىلدابەكوۆ كۇمىس مەدالمەن ورالدى. مەن دە بالا كۇنىمدە وسى اعالارىم سەكىلدى ەلىمىزدىڭ مارتەبەسىن اسقاقتاتسام دەپ ارماندادىم. مىنە, ارادا 24 جىل وتكەندە سيدنەي قالاسىندا جەكپە-جەككە تۇسەتىنىمە قۋانىشتىمىن. الەمگە ەلىمىزدىڭ كوك تۋىن تاعى ءبىر مارتە ايگىلەۋگە دايارمىن. اندرەي ميحايلوۆيچكە قارسى ايقاسقا شىعۋ مەن ءۇشىن اسا ماڭىزدى, سەبەبى ول الەم چەمپيونى دەگەن اتاقتان ۇمىتكەرلەردىڭ كوشىن باستاپ تۇر. ماعان ول كۇن كوزىن كولەگەيلەپ تۇرعان بۇل سەكىلدى, سول بۇلتتى ىدىراتىپ, كۇننىڭ جارقىراپ شىعۋىنا كۇش سالامىن. ءبارى دە ونىڭ نوكاۋتپەن جەڭىلەتىنىن بىلەدى», دەدى جانىبەك ءالىمحان ۇلى.
جانىبەك ءالىمحان ۇلى مەن اندرەي ميحايلوۆيچ اراسىنداعى ايقاس شىلدە ايىندا اقش-تىڭ لاس-ۆەگاس قالاسىندا وتۋگە ءتيىس ەدى. سالماق ءتۇسىرۋ كەزىندە بۇيرەگى سىر بەرگەن جەرلەسىمىز اۋرۋحاناعا جەتكىزىلىپ, ەم-دوم الدى. «قارسىلاستىڭ دەنساۋلىعىنا بايلانىستى جەكپە-جەك وتپەيتىنىن لاس-ۆەگاسقا ۇشىپ كەلگەن سوڭ ەستىپ ءبىلدىم. مۇنداي جاعدايدا ەشتەڭە ىستەي المايمىز, قولدان كەلەر قايران جوق», دەگەن اندرەي ميحايلوۆيچ. رەسەيدە تۋىپ, جاڭا زەلانديانىڭ ازاماتتىعىن العان بوكسشى ءالىمحان ۇلىن ورتا سالماقتا الەم چەمپيونى اتاعىنان ايىرۋعا ءالى جەتەتىنىن مالىمدەدى. جانىبەك اۋسترالياعا اتتانعانعا دەيىن جەكپە-جەككە دايىندىعىن ەلىمىزدە وتكىزبەك. ۇزاق جىل ۇلتتىق قۇرامانىڭ باس باپكەرى بولعان مىرزاعالي ايتجانوۆتىڭ اقىل-كەڭەسىمەن جاتتىعۋىن جالعاستىرىپ, سپاررينگ جەكپە-جەك وتكىزۋگە بوكسشى امان قونىسبەكوۆتى شاقىرتقان.
فۋتزال: ساڭلاقتار سەنىمدى اقتادى
وزبەكستاندا فۋتزالدان ءوتىپ جاتقان الەم چەمپيوناتىنىڭ توپتىق كەزەڭىندەگى ەكىنشى ماتچتا ەل قۇراماسى جەڭىسكە جەتتى. D توبىندا سىنعا تۇسكەن جىگىتتەر ليۆيا قۇراماسىن 4:1 ەسەبىمەن ۇتتى.
ءسۋحايبتىڭ اۆتوگولىنان كەيىن العا شىققان جەرلەستەرىمىزدى ليۆيالىق ويىنشىلار ايتارلىقتاي ساستىردى. ءتىپتى حاميس گول سوعىپ, تارازى باسىن تەڭەستىرىپ تە كەتتى. بىراق تاجىريبەلى ءبىرجان ورازوۆ, جاھانگەر ءراشيت, البەرت اقبالىقوۆ ەنشىسىنە گول جازىپ, ايقىن باسىمدىقپەن ۇتۋعا سەپتەستى.
ۇلتتىق قۇرامانىڭ باس باپكەرى پاۋلو ريكاردو كاكا جىگىتتەردىڭ تارتىستى ماتچتا جەڭىسكە جەتكەنى ماڭىزدى ەكەنىن اتاپ ءوتتى. ء«ىرى ەسەپپەن ۇتۋ كەرەك دەپ ورشەلەنگەن جوق جىگىتتەر. ولارعا جەڭىسكە جەتۋ كەرەك دەگەن تاپسىرما جۇكتەلدى, سونى ورىندادى. ونىڭ ۇستىنە ۇلتتىق قۇرامانىڭ شابۋىل شەبىن نىعايتاتىن داۋرەن تۇرساعۇلوۆ پەن ازات ۆاليۋلين بۇل ماتچقا قاتىسپادى. سوعان قاراماستان جىگىتتەر بارىن سالىپ وينادى. ۇلتتىق قۇراما ساپىنا العاش شاقىرىلعان, توماعاسىن سىپىرىپ, الەمدىك دوداعا تۇڭعىش قاتىسقان جاس ويىنشىلار دا وزدەرىنىڭ تالانتىن ايگىلەدى. وكىنىشكە قاراي, ءبىرجان ورازوۆ جاراقاتتاندى. تەزىرەك ساۋىعىپ قاتارىمىزعا قوسىلادى دەپ سەنەمىز. قۇراما كوماندانىڭ دارىگەرلەرى شەشىمىن ايتادى», دەدى باس باپكەر.
ماتچتا ەنشىسىنە گول جازعان البەرت اقبالىقوۆ جانكۇيەرلەردىڭ قولداۋى ەرەكشە بولعانىن جەتكىزدى. «باس باپكەر كاكا الاڭعا شىعار كەزدە بىزگە تەك جەڭىس ءۇشىن بارىمىزدى سالۋعا جىگەرلەندىردى. ءبىز ءۇشىن ەكىنشى ماتچتا 3 ۇپاي الۋ اسا ماڭىزدى بولدى. وزبەكستاندا ءوتىپ جاتقان الەم چەمپيوناتىندا ەلىمىزدەن بارعان جانكۇيەرلەر عانا ەمەس, باۋىرلاس وزبەك, قىرعىز, تۇرىك كورەرمەندەرى دە قوسىلا قولداۋ كورسەتىپ, تىك تۇرىپ جانكۇيەر بولدى. زالدى تۇندىرا قيقۋلاپ, بىزگە ەرەكشە دەم بەردى», دەدى سپورتشى.
ۇلتتىق قۇراما توپتىق كەزەڭدەگى سوڭعى ماتچتى ەرتەڭ تاشكەنت قالاسىنداعى «حۋمو ارەنا» كەشەنىندە جاڭا زەلانديا قۇراماسىنا قارسى وتكىزەدى. ازىرگە يسپانيا قۇراماسى سوققان گول سانىنىڭ باسىمدىعى بويىنشا كوش باستاپ كەلەدى, ەكىنشى ساتىدا ءبىزدىڭ قۇراما تۇر. الەم بىرىنشىلىگىنىڭ العاشقى ماتچىندا يسپانيا قۇراماسىمەن تەڭ تارقاسقان (1:1) جىگىتتەر ەرتەڭ جاڭا زەلانديا قۇراماسىن ءىرى ەسەپپەن جەڭسە, توپتان كوش باستاپ, پلەي-وفف كەزەڭىنە ءوتۋى مۇمكىن. يسپانيا قۇراماسى توپتىق كەزەڭدەگى ەكىنشى ماتچتى جاڭا زەلانديا قۇراماسىنا قارسى وتكىزىپ, 7:1 ەسەبىمەن ويسىراتا ۇتتى.
بوكس: «ۇزدىكتەر ءتۋرنيرى» مىقتىلاردى انىقتايدى
بوكستان ايەلدەر اراسىندا 22–28 قازان ارالىعىندا قاراعاندى قالاسىندا «ۇزدىكتەر ءتۋرنيرى» وتەدى. ۇلتتىق قۇرامانىڭ باس باپكەرى ەلدوس سايدالين ازيا چەمپيوناتىنا كىمدەردىڭ باراتىنى قاراعاندى رينگىندە انىقتالاتىنىن ايتتى.
«پاريج جازعى وليمپياداسىنان كەيىن ۇلتتىق قۇراما مۇشەلەرىنىڭ كەيبىرەۋى سالماق دارەجەسىن وزگەرتتى. «ۇزدىكتەر تۋرنيرىنە» ەكى دۇركىن الەم چەمپيونى, پاريج جازعى وليمپياداسىنىڭ قولا جۇلدەگەرى نازىم قىزايباي قاتىسپايدى. بۇل ءتۋرنيردىڭ ەرەكشەلىگى – دۋلىعاسىز (شلەم) وتەدى. جاڭا ەرەجە بويىنشا ايەلدەر اراسىنداعى سايىس ەندى دۋلىعاسىز وتەتىندىكتەن, بوكسشىلار بەيىمدەلۋى كەرەك», دەدى باس باپكەر. ە.سايدالين ازيا چەمپيوناتى اياقتالعان سوڭ, جىل سوڭىنا قاراي قازاقستان چەمپيوناتى ۇيىمداستىرىلىپ, قۇراما ساپىندا بۋىن الماسۋ ۇدەرىسى جۇرەتىنىن دە جەتكىزدى. ياعني جاستار اراسىندا جارقىراپ كورىنگەن تالانتتار قۇراماداعى تاجىريبەلى بوكسشىلاردىڭ كەيبىرىن ىعىستىرۋى مۇمكىن.
الەم چەمپيوناتىنىڭ جۇلدەگەرى الۋا بالقىبەكوۆا 50 كگ سالماق دارەجەسىنە تۇپكىلىكتى اۋىسقانىن ءمالىم ەتتى. ء«بىز ءۇشىن دۋلىعاسىز جەكپە-جەك وتكىزۋ تاڭسىق. جۋىردا پولشادا حالىقارالىق تۋرنير ءوتتى, دۋلىعا كيمەگەندىكتەن قاتىسۋشىلاردىڭ كەيبىرىنىڭ قاباعى جارىلىپ, جاراقات الدى. دەمەك قورعانىسقا باسا ءمان بەرۋ كەرەك. قاراعاندى قالاسىندا وتەتىن تۋرنير ازيا چەمپيوناتىنا كىمدەردىڭ باراتىنىن ايقىندايتىندىقتان دا باسەكە جوعارى بولماق», دەگەن بوكسشى 50 كگ سالماقتا توپ جارۋعا بارىن سالاتىنىن, سول ماقساتتا جەكە جاتتىعۋ جۇرگىزىپ جاتقانىن دا ايتتى.
