اراعا ەكى جىل سالىپ ۇيىمداستىرىلاتىن ەتنوسپورت الامانى بەسىنشى رەت جالاۋىن جەلبىرەتسە, قۇسبەگىلەردىڭ بەكزادا ونەرىن دارىپتەۋشىلەر دىتتەگەن ماقساتىنا وسى جولى عانا قول جەتكىزدى. بۇركىت, قارشىعا, يتەلگى قۇستارى بويىنشا سىنعا تۇسكەن قۇسبەگىلەر الدىمەن قولعا شاقىرۋدان سايىسسا, ەكىنشى كۇنى قىراندارىنىڭ قىراعىلىعىن سىناپ, شىرعاعا سالۋدان دوداعا ءتۇستى. «كوشپەلىلەر الەمى» ەتنواۋىلىندا وتكەن قۇسبەگىلىك سايىستى تاماشالاۋعا شەتەلدەن كەلگەن تۋريستەردىڭ شوعىرى قالىڭ بولدى. بۇل اتا-بابالارىمىزدىڭ بايىرعى ونەرىنىڭ جۇلگەسىن بۇگىنگە جالعاپ كەلە جاتقان قۇسبەگىلەرمەن تايتالاسقا تۇسكەن شەتەلدىك ساياتشىلاردىڭ دا قىران باپتاۋعا دەگەن قۇلشىنىسى قۋانتتى.
قۇسبەگىلىك فەدەراتسياسىنىڭ ۆيتسە-پرەزيدەنتى باعدات مۇپتەكەقىزى ەكى كۇنگە ۇلاسقان ساياتشىلار سايىسىنىڭ ىرىكتەۋ, جارتىلاي فينالدىق تارتىسىنا كورەرمەن كوپ جينالعانىن اتاپ ءوتتى. «دۇنيەجۇزىلىك كوشپەلىلەر ويىندارىنىڭ ءتورتىنشى سايىس كۇنىندە سىنعا تۇسكەن قۇسبەگىلەردىڭ دوداسى كوكپاردىڭ فينالدىق سايىسىمەن ءبىر كۇندە, ءبىر ۋاقىتتا وتكەنىنە قاراماستان, جانكۇيەرلەردىڭ شوعىرى قالىڭ بولدى. ءتىپتى قۇسبەگىلىك تارتىسىنىڭ بيلەتى كۇنى بۇرىن تۇگەلدەي ساتىلىپ تا كەتىپتى. كورەرمەندەر اراسىندا شەتەلدىكتەر وتە كوپ بولدى. ءبىزدىڭ ماقساتىمىز دا وسى ەدى. ۇلىق ونەرىمىزدى, بابالارىمىزدان مۇراعا قالعان قۇسبەگىلىكتى قالاي قاستەرلەپ كەلە جاتقانىمىزدى دۇنيە ءجۇزىنىڭ نازارىنا ۇسىنساق دەپ تالپىنىپ, قام-قارەكەت جاساپ كەلەمىز. ەركىندىكتىڭ, العىرلىقتىڭ ءرامىزى سانالاتىن قىران قۇستاردىڭ قىراعىلىعىنا قىزىعۋشىلاردىڭ دا قاتارى ارتقانى قۋانتادى», دەيدى باعدات مۇپتەكەقىزى.
دۇنيەجۇزىلىك كوشپەلىلەر ويىندارى 2014 جىلدان بەرى تۇراقتى وتكىزىلىپ كەلەدى. قىرعىزستاندا ءۇش مارتە, تۇركيادا ءبىر رەت ۇيىمداستىرىلعان ءدۇبىرلى دوداعا قۇسبەگىلىك سايىسىن قوسۋ جونىندە فەدەراتسيا تالپىنىس جاساعانىمەن, ناتيجە شىقپاعان. ء«وز ەلىمىزدە وتەتىن ۇلى الاماندا مەملەكەتىمىزدىڭ ءرامىزى سانالاتىن كوك تۋىمىزدا بەينەلەنگەن ەركىندىكتىڭ بەلگىسى قىران قۇسىمىزدىڭ مارتەبەسىن نەگە اسىرمايمىز؟ وسى ماقساتقا ۇيىپ, بۇركىت, قارشىعا, يتەلگى قۇستارىنىڭ قاسيەتىن دۇنيە جۇزىنە كورسەتۋگە بارىمىزدى سالدىق. تاۋبە, تۇڭعىش رەت وتكەن قۇسبەگىلىك سايىسىنا 10 ەلدەن ساياتشىلار كەلىپ قاتىستى. كەلەشەكتە كوكجيەگى كەڭي تۇسپەك», دەدى ۇلتتىق سپورت قايراتكەرى.
قۇسبەگىلىك سايىسىندا جەڭىمپاز اتانعان بۇركىتشىگە تەمىر تۇلپار تارتۋ ەتىپ, مەرەيىن وسىرگەن كاسىپكەر تالعات ساقان قىران بۇركىتتىڭ كوك تۋىمىزدا بەينەلەنۋى رۋحىمىزدىڭ اسقاق ەكەنىن ايگىلەي تۇسەتىنىن ايتادى. «استانا قالاسىندا وتكەن دۇنيەجۇزىلىك كوشپەلىلەر ويىندارىنىڭ اشىلۋ سالتاناتى شىلدەدە پاريجدە وتكەن ءحححىىى جازعى وليمپيادانىڭ اشىلۋ سالتاناتىنان كەم سوققان جوق, ءتىپتى مادەني كوركەمدىگى جاعىنان اسىپ ءتۇستى. قۇسبەگىلىك فەدەراتسياسىنىڭ پرەزيدەنتى بەرىك ءۋالي مىرزا ارنايى شاقىرعان سوڭ, ەل مەرەيىن اسىرعان ساڭلاقتاردى قولداۋ ماقساتىندا بۇركىتشىلەر اراسىندا توپ جارعان سەرىكبەك كۇنتۋعانعا اۆتوكولىك تارتۋ ەتتىم. قۇسبەگىلەر اراسىندا بۇركىت سالۋدان سىنعا تۇسۋشىلەردىڭ جەڭىمپازىنا تەمىر تۇلپار سىيلاۋدىڭ وزىندىك ءمانى بار. كوك تۋىمىزدا قالىقتاعان قىران بەينەسى اسقاقتىعىمىزدى ايقىنداپ, كەلەشەكتە ەلىمىزدىڭ تەك كوككە قاراي سامعايتىنىن ايگىلەيدى. ءبىزدىڭ Q4 Tulpar كومپانياسى ەلىمىزدىڭ سالت-ءداستۇرىن, مادەنيەتىن, ونەرىن, سپورتىن, عىلىمىن ۇلىقتايتىن ءىس-شارالارعا ارقاشان قولداۋ ءبىلدىرىپ كەلەدى. جۋىردا اباي وبلىسىندا وتكەن «شىعىس التىن تايى» ات بايگەسىنە دە ەكى كولىكتى بايگەنىڭ جۇلدەسىنە بايلادىق. جۋىردا 100 يگى ءىس چەللەندجىن باستاپ, ەلىمىزدىڭ كاسىپكەرلەرىنە ۇندەۋ جولدادىق. مىنە, سول باتالى باستامانىڭ العاشقى يگىلىگىن استانادا وتكەن كوشپەلىلەر ويىندارىندا جۇرتقا ۇسىنىپ, قۇسبەگىلەردىڭ مەرەيىن وسىردىك. ۇلتتىق قۇندىلىعىمىزدى ۇلىقتاپ جۇرگەن ازاماتتار قانداي قۇرمەت-قوشەمەتكە دە لايىق», دەگەن كاسىپكەر ەتنوسپورت دوداسى ءتول ونەرىمىزدىڭ دامۋىنا ەرەكشە سەرپىن بەرەتىنىن جەتكىزدى.
كاسىپكەر «اعايىننىڭ اتى وزعانشا, اۋىلداستىڭ تايى وزسىن» دەگەن اتالى سوزگە توقتاپ, بۇركىت سالۋدان جۇلدەلى ءىى ورىن يەلەنگەن جەرلەسى, ءۇرجار اۋدانىنىڭ تۋماسى, بۇركىتشى ەرزات بايقاداموۆقا دا تەمىر تۇلپار سىيلادى. كاسىپكەر قۇسبەگىلىك ونەردىڭ كەز كەلگەن جانعا قونبايتىنىن, ۇلىق ونەردىڭ اۋىرتپالىعىن ارقالاپ, قيىندىعىنا شىداپ كەلە جاتقان جاندار قاشاندا قۇرمەتكە لايىق ەكەنىن ايتتى.
ەلوردا ءتورىن اپتا بويى دۇبىرگە بولەگەن دۇنيەجۇزىلىك كوشپەلىلەر ويىندارى قۇسبەگىلىكتىڭ وركەندەۋىنە سەرپىن بەرۋگە ءتيىس. ەلىمىزدە قۇسبەگىلىك فەدەراتسياسى قۇرىلىپ, ۇلتتىق سپورت قاۋىمداستىعىنىڭ قۇرامىنا ەندى. مەملەكەت تاراپىنان قولداۋ كورسەتىلىپ, دامۋىنا سەرپىن بەرىلىپ, فەدەراتسياسىنىڭ جۇمىسى جۇيەلى جولعا قويىلدى. «كوشپەلىلەر ويىندارىنا قاتىسۋعا كەلگەن دەلەگاتسيا مۇشەلەرى فەدەراتسيانىڭ جۇمىسىنا وڭ باعاسىن بەردى. سايىستى وتكىزۋ ەرەجەسىن اعىلشىن تىلىنە اۋدارۋدى ۇسىندى. ءسويتىپ, ءوز ەلدەرىندە ءبىزدىڭ ەرەجەمىز بويىنشا سايىستار وتكىزىپ, شىڭدالۋعا قۇمبىل ەكەندىگىن بايقاتتى. جالپى, دۇنيەجۇزىلىك كوشپەلىلەر ويىندارى ۇلتتىق سپورتىمىز, ونىڭ ىشىندە قۇسبەگىلىك ونەردىڭ قارقىن الۋىنا ايتارلىقتاي سەرپىلىس بولدى», دەيدى فەدەراتسيانىڭ ۆيتسە-پرەزيدەنتى ب.مۇپتەكەقىزى.
«العىر» اتتى قىرانىمەن بۇركىتشىلەر سايىسىندا توپ جارعان سەرىكبەك كۇنتۋعاننىڭ دا بۇگىندە تانىمالدىلىعى ارتقان. بابالارىنان ميراس بوپ قونعان قۇسبەگىلىكتى ءوزىنىڭ ۇلدارىنا ۇيرەتىپ جۇرگەن بۇركىتشى كوشپەلىلەر ويىندارى وراسان ىستەردىڭ جۇزەگە اسۋىنا قوزعاۋ سالاتىن ايتۋلى الامان بولدى دەيدى. «قىران قۇستى اسىراۋ, ونى كۇيىن كەلتىرىپ جەمىن بەرىپ, ءىشىن تازالاپ, ەتىن قاتىرۋ وڭاي ەمەس. وعان كەز كەلگەن جاننىڭ ءتوزىمى شىدامايدى. سوسىن بۇركىت وتە كەكشىل كەلەدى, بالاپان كەزىندە ءبىر قىساستىق جاساساڭ, سونى ءومىر بويى ۇمىتپايدى. كوشپەلىلەر ويىندارىنا كەلگەن تۇركيالىق, قىرعىزستاندىق, موڭعوليالىق بۇركىتشىلەردى بۇرىننان بىلەمىن, ارالاستىعىمىز بار. كانادا, يسپانيا, گرۋزيادان كەلگەن بۇركىتشىلەرمەن دە تانىسىپ, از-كەم تىلدەستىك. ءوز ەلدەرىندە بۇركىتتى قولعا ۇيرەتىپ, بالاپان شاعىنان باۋلىپ كەلە جاتقان قۇسبەگىلەر كەلەشەكتە دە حالىقارالىق تۋرنيرلەرگە قاتىسۋعا ىقىلاس تانىتتى. ۇلتتىق سپورت دارەجەسىنە كوتەرىلگەن قۇسبەگىلىكتى الەمدىك دەڭگەيگە شىعارۋ ءۇشىن وسىنداي بارىس-كەلىس ءجيى ۇيىمداستىرىلعانى دۇرىس. كەيىنگى كەزدەرى قۇسبەگىلىككە ەلىمىزدە دە باسا نازار اۋدارىلىپ كەلەدى. بۇركىتشىلەردىڭ سايىسىنا اۆتوكولىك بايگەگە تىگىلگەنىن ءبىز الدىن الا بىلمەدىك, توسىن سىي بولدى. بۇرىندارى قۇسبەگىلىككە اسا ءمان بەرە قويمايتىن جاندار قازىر بيالايدىڭ نە ەكەنىن, توماعانى كيگىزۋ كەرەگىن سۇرايدى. قىران قۇستاردى اسىرۋعا ىقىلاستى بالالاردىڭ دا قاتارى قالىڭداپ كەلەدى», دەيدى سەرىكبەك كۇنتۋعان.
قۇسبەگىلىك فەدەراتسياسى بىلتىر رەسپۋبليكالىق سايىستى 4 رەت, حالىقارالىق دودانى 5 مارتە وتكىزدى. كەلەشەكتە دە بۇل ءۇردىستىڭ جۇلگەسى ۇزىلمەگەنى ابزال.
