فوتو: polisia.kz
ىشكى ىستەر مينيسترلىگىنىڭ مالىمەتىنشە, بيىل پوليتسيا قىزمەتكەرلەرى بوپسالاۋدىڭ 400-دەن استام دەرەگىن تىركەگەن. ونىڭ 39-ى مەكتەپتەر مەن كوللەدجدەردە جاسالعانى بەلگىلى بولدى. وقۋ ورىندارىندا 60 مىڭعا جۋىق پروفيلاكتيكالىق ءىس-شارا وتكىزىلىپ, وندا بوپسالاۋ, بۋللينگ جانە زورلىق-زومبىلىق كورسەتۋمەن بايلانىستى ماسەلەلەر تالقىلانعان.
سونىمەن قاتار, مەكتەپتەر مەن كوللەدجدەردە ءانونيمدى ساۋالنامالار جۇرگىزىلىپ, وقۋشىلار اراسىندا بوپسالاۋدىڭ 50-دەن استام ىقتيمال فاكتىسى انىقتالعان. بارلىق جاعدايدىڭ تەكسەرىلەتىنى حابارلاندى.
جىل باسىنان بەرى بوپسالاۋمەن اينالىساتىن 23 جاستار توبىنىڭ ارەكەتىنە توسقاۋىل قويىلعان.
«قىركۇيەك ايىندا اقتوبە قالاسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى كوللەدجدىڭ كامەلەتكە تولماعان ستۋدەنتىن ۇستادى. ول 15 جاستاعى جاسوسپىرىمنەن 50 مىڭ تەڭگە كولەمىندە اقشا بوپسالاعان. كۇدىكتى قۇرىقتالىپ, سوتقا دەيىنگى تەرگەۋ باستالدى», دەپ حابارلادى ءىىم-ءنىڭ ءباسپاسوز قىزمەتى.
تاعى ءبىر وقيعا جامبىل وبلىسىندا ءجاسوسپىرىم جەكە دەرەكتەردى تاراتامىن دەپ قورقىتۋ ارقىلى ءوز قاتارلاستارىنان اقشا بوپسالاعان. وسىنداي 8 فاكت تىركەلىپ, قىلمىستىق ءىس سوتقا جىبەرىلگەن.
ال, پەتروپاۆل قالاسىندا پوليتسيا قىزمەتكەرلەرى جاستار توبىنىڭ مۇشەلەرىن ۇستاعان. ولار زورلىق-زومبىلىق پەن قورقىتۋ ارقىلى جابىرلەنۋشىلەردى قارىز راسىمدەۋگە ماجبۇرلەپ, كەيىننەن ونى قولما-قول اقشاعا اينالدىرىپ وتىرعان. كۇدىكتىلەر قاماۋعا الىنعان.
ىشكى ىستەر مينيسترلىگى قىلمىستىڭ بۇل ءتۇرى ءۇشىن 14 جاستان باستاپ قىلمىستىق جاۋاپكەرشىلىك قاراستىرىلاتىنىن ەسكە سالدى.
