«تۇمار» دەپ اتالعان تۇرعىن ءۇي كەشەنىنىڭ اشىلۋ راسىمىنە وبلىس اكىمىنىڭ ورىنباسارى ارمان ابەنوۆ پەن وسى ءۇيدى ءبىر جازدا سالىپ شىققان «Bazis» قۇرىلىس كومپانياسىنىڭ باسشىسى پاۆەل بەلوۆيچ قاتىستى.
سۋ تاسقىنى كەزىندە وڭىرگە ارنايى كەلىپ, ەل جاعدايىنا قانىققان پرەزيدەنت قاسىم-جومارت توقاەۆ مەملەكەت باسپاناسىنان ايىرىلعانداردى دالادا قالدىرمايتىنىن, الايدا بۇل ىسكە ءىرى بيزنەس وكىلدەرى دە بەلسەندى اتسالىسۋى كەرەك ەكەنىن قاداپ ايتقان. كاسىپكەرلەردى الەۋمەتتىك جاۋاپكەرشىلىككە ۇندەگەن مەملەكەت باسشىسىنىڭ وسى سوزىنەن كەيىن-اق «Bazis» كومپانيالار توبى وزىنە قاراستى «وزاتقازقۇرىلىس» سەرىكتەستىگىن باس مەردىگەر ەتىپ بەكىتىپ, ارقالىقتاعى شاقشاق جانىبەك كوشەسىنىڭ بويىنان 5 قاباتتى ءۇيدىڭ قۇرىلىسىن باستاپ كەتكەن. قۇرىلىس جۇمىسى مەرزىمىندە اياقتالىپ, ءۇي دايىن بولعان قىركۇيەك ايىنىڭ ءۇشىنشى كۇنى ءانۋار بورانباەۆ اتىنداعى كينوتەاتردا ويناتىلعان جەرەبە ارقىلى ءۇشىنشى, ءتورتىنشى, بەسىنشى قابات تۇرعىندارى وزدەرىنە بۇيىرعان پاتەردى انىقتاپ الدى.
ال ءبىرىنشى, ەكىنشى قاباتقا كوپبالالى, ۇيىندە جەتپىستەن اسقان قارياسى بار وتباسىلار مەن مۇمكىندىگى شەكتەۋلى جاندار ورنالاستى.
ادەتتە بەس قاباتتى ۇيلەردە ليفت بولمايتىن ەدى, ال بۇل ۇيدە ليفت جۇمىس ىستەپ تۇر. كىرەبەرىس ەسىكتەرىنە بەينەشاقىرعىش قۇرىلعى ورناتىلعان. اينالاسى اباتتاندىرىلعان. ادەمى اللەياسى, بالالارعا ارنالعان ويىن الاڭى, كولىك تۇراعى بار. پاتەرلەردىڭ بارىنە اسۇيگە كەرەك تەحنيكا, توڭازىتقىش, جيھازدار ورناتىلعان.
تۇرعىندارعا پاتەر كىلتتەرىن تاپسىرۋ راسىمىندە قونىس يەلەرىن وبلىس اكىمىنىڭ ورىنباسارى ارمان ابەنوۆ قۇتتىقتادى.
«كوكتەمگى تابيعي اپات حالىققا ەداۋىر ماتەريالدىق شىعىن كەلتىردى. العاشقى كەزەكتە تۇرعىن ءۇي ينفراقۇرىلىمى زاقىمداندى. مەملەكەت باسشىسى تۇرعىن ءۇي ماسەلەسىن تەز ارادا شەشۋدى تاپسىردى. قالىپقا كەلتىرۋ جۇمىستارى دەرەۋ قولعا الىندى. وبلىس بويىنشا بارلىعى 1 283 ءۇي زاقىمداندى, ونىڭ ىشىندە 468 ءۇي قالپىنا كەلتىرۋگە جاتپايدى. 815 ءۇيدى جوندەۋ قاجەت بولدى. 315 وتباسىنا دايىن تۇرعان ۇيلەر ساتىپ الىندى. 153 وتباسى وزدەرى جەكە تۇرعىن ءۇي سالىپ الامىز دەپ شەشتى. بۇگىنگى تاڭدا ءۇي ساتىپ الۋ, سالۋ جانە جوندەۋ جۇمىستارىن تولىعىمەن اياقتادىق. ءدال قازىرگى تاڭدا 468 وتباسىنىڭ جاڭا, جايلى باسپاناسى بار. قونىستانۋشىلار بۇرىنعى تۇرعىن ءۇي جاعدايلارىن ەداۋىر جاقسارتتى. ءبىز مەملەكەت پەن قوعامدىق قورلاردىڭ بىرلەسكەن جەدەل كۇش-جىگەرىنىڭ ناتيجەسىندە عانا وسىنداي قۋانىشتى كۇنگە جەتىپ وتىرمىز. ەڭ باستىسى, قيىن-قىستاۋ كەزەڭدە جۇرت بولىپ جۇمىلىپ, ىنتىماق پەن بىرلىكتىڭ ۇلگىسىن تانىتا بىلدىك. مۇنىڭ ءبارى ەلىمىزدە ۇيىمشىل, مەيىرىمدى, جاناشىر ازاماتتار كوپ ەكەنىن كورسەتتى. بۇگىن مىنە, سىزدەردىڭ الدارىڭىزدا تۇرىپ, تابيعي اپاتتىڭ سالدارىن جويدىق دەپ نىق سەنىممەن ايتا الامىز», دەدى ا.ابەنوۆ.
سالتاناتتى راسىمدە قۋانىش يەلەرىنىڭ اتىنان جانگەلدين اۋدانىنا قاراستى الباربوگەت اۋىلىنىڭ بۇرىنعى تۇرعىنى ەركىن دوسبەرگەنوۆ ريزاشىلىعىن ءبىلدىرىپ, ابىز اقساقال مۇحتار حودەنوۆ اق باتاسىن بەردى. داستۇرگە ساي شاشۋ شاشىلدى. از كۇنگى قيىندىقتى ۇمىتقان اعايىن ارقا-جارقا بولىپ, ءبىرىن-ءبىرى قۇتتىقتاسىپ جاتتى.
باسپانالى بولعانداردىڭ ىشىندە كەشەگى جويقىن تاسقىندى ءبىرىنشى بولىپ قارسى العان قىزىلجۇلدىز اۋىلىنىڭ تۇرعىندارى دا بار. تابيعي اپات, اسىرەسە وسى اۋىلعا اسا اۋىر ءتيدى. بۇگىندە قىزىلجۇلدىزدىقتاردىڭ دەنى ارقالىق قالاسىندا مەملەكەت بەرگەن جايلى باسپانادا تۇرىپ جاتىر.
«كەشەگى تاسقىن سۋدان زارداپ شەككەن وتباسىلارىنا پرەزيدەنتىمىز قامقورلىق جاساپ, پاتەرمەن قامتاماسىز ەتىپ وتىر. ەل اتىنان زور ريزاشىلىعىمىزدى بىلدىرەمىز. بۇگىن مىنە, ءوز پاتەرىمىزدىڭ كىلتىن الىپ, ەرەكشە كوڭىل كۇيدە, تولقىپ تۇرمىز. وزىمە دە, بالاما دا جاڭا ۇيدەن پاتەر بەرىپ جاتىر. قۋانىشىمىزدا شەك جوق. قيىن كەزەڭدە دالادا قالدىرماي, كومەك جاساعان ەل باسشىلارىنا ريزاشىلىعىمىزدى بىلدىرەمىز. ءۇي جاقسى, جايلى. كوڭىلىمىزدەن شىقتى. قۇرىلىستى جۇرگىزگەن كومپانياعا دا شىن جۇرەگىمىزدەن العىس ايتامىز», دەيدى قىزىلجۇلدىز اۋىلىنىڭ بۇرىنعى تۇرعىنى دۇيسەنباي بەلگىباي.
قوستاناي وبلىسى,
ارقالىق قالاسى
