جول قاۋىپسىزدىگىن قامتاماسىز ەتۋ ءىس-شارالارىنا پوليتسيا دەپارتامەنتى مەن توتەنشە جاعداي قىزمەتىنىڭ دروندارى پايدالانىلادى. ۇشقىشسىز اۋە اپپاراتى 50 شاقىرىمعا دەيىن بارا الادى. جىلدامدىعى ساعاتىنا 100 كم-عا دەيىن جەتەدى. جول ەرەجەسىن بۇزعان كولىكتىڭ ءنومىرىن 2 شاقىرىم قاشىقتىقتان انىقتاپ, جادىنا تىركەپ قويادى.
ءتارتىپ ساقشىلارىنىڭ ايتۋىنشا, دروندار اۋەدە جۇمىس ىستەگەن ەكى كۇن ىشىندە رۇقسات ەتىلمەيتىن جەردە قارسى جولعا شىعىپ كەتكەن 6 جۇرگىزۋشى ۇستالعان. ونىڭ بىرەۋى زاڭسىز جولاۋشى تاسىمالداۋمەن اينالىسىپ جۇرگەنى انىقتالدى. جول ءتارتىبىن بۇزعانداردىڭ ءبارى التى اي مەرزىمگە دەيىن جۇرگىزۋشى كۋالىگىنەن ايىرىلۋى مۇمكىن.
«مىسالى, 15 قىركۇيەك كۇنى تۇستەن كەيىن كۆادروكوپتەر قارسى جولاققا شىعىپ كەتكەن «Jac Sanray» اۆتوكولىگىن تىركەدى. جول ەرەجەسىن بۇزعان 35 جاستاعى جۇرگىزۋشىگە قاتىستى ماتەريالدى پوليتسەيلەر سوتقا فوتو جانە بەينەدالەلدەرمەن بىرگە جىبەردى», دەيدى وبلىستىق پد ءباسپاسوز حاتشىسى كارينا بازارباەۆا.
سونىمەن قاتار دروندار قاۋىپسىزدىك بەلدىگىن تاقپايتىن, جول سىزىعى مەن جول بەلگىلەرىن ەسكەرمەيتىن, كولىك جۇرگىزىپ كەلە جاتىپ ۇيالى تەلەفونمەن سويلەسەتىن جۇرگىزۋشىلەردى دە انىقتايدى.
وبلىستىق پوليتسيا دەپارتامەنتى جۇرگىزۋشىلەردى مۇقيات بولۋعا, جول قوزعالىسى ەرەجەلەرىن ساقتاۋعا شاقىرادى.
قوستاناي وبلىسى
