فوتو: قر سۋ رەسۋرستارى جانە يرريگاتسيا مينيسترلىگى
اتالعان جوسپار قۇرىلتايشى مەملەكەتتەردىڭ باسشىلارى مەن حاقق پرەزيدەنتىنىڭ تاپسىرمالارىن ىسكە اسىرۋدى, قوردىڭ ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋدى, حالىقارالىق ىنتىماقتاستىقتى نىعايتۋ مەن كەڭەيتۋدى, حاقق اتقارۋ كوميتەتىنىڭ قۇرىلىمدىق بولىمشەلەرىنىڭ جۇمىسىن ۇيلەستىرۋدى, تابيعي رەسۋرستاردى قورعاۋ جونىندەگى اقپاراتتىق, تالدامالىق جانە ۇگىت جۇمىستارىن, وڭىرلىك جانە حالىقارالىق ءىس-شارالاردى ۇيىمداستىرۋدى, وتكىزۋدى جانە ولارعا قاتىسۋدى قامتيدى.
سونداي-اق جوسپاردا ەكى اۋقىمدى جوبانى ودان ءارى ىسكە اسىرۋ كوزدەلگەن. بۇل - ارال تەڭىزى باسسەينى ەلدەرىنە كومەك كورسەتۋ جونىندەگى ءىس-قيمىل باعدارلاماسى, ونىڭ شەڭبەرىندە وڭىردە 35 جوبا ىسكە اسىرىلىپ جاتىر. بۇدان بولەك, قور قازاقستان, قىرعىزستان, تاجىكستان, تۇرىكمەنستان جانە وزبەكستان كىرەتىن مەملەكەتارالىق سۋ شارۋاشىلىعىن ۇيلەستىرۋ كوميسسياسىنا جانە حاقق ورنىقتى دامۋ جونىندەگى مەملەكەتارالىق كوميسسياعا بەلسەندى تۇردە جاردەمدەسۋگە نيەتتى.
«وزدەرىڭىز بىلەتىندەي, بۇگىنگى تاڭدا پرەزيدەنتىمىز حالىقارالىق ارالدى قۇتقارۋ قورىنىڭ باسشىسى بولىپ سايلاندى. قوردىڭ توراعاسى رەتىندە ءبىزدىڭ ەلىمىزگە ۇلكەن جاۋاپكەرشىلىك جۇكتەلگەن جانە ءبىز ورتالىق ازيانىڭ باسقا مەملەكەتتەرىمەن تىعىز قارىم-قاتىناستا بولامىز. ءبىز بىرلەسىپ ارال تەڭىزىن ساقتاۋ بويىنشا ەلەۋلى ناتيجەلەرگە قول جەتكىزدىك جانە وسى باعىتتاعى جۇمىستى ءارى قاراي جالعاستىرۋعا نيەتتىمىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
